ເຈົ້າໜ້າທີ່ຂັ້ນສູງດ້ານເສດຖະກິດຈີນທ່ານນຶ່ງ ຮຽກຮ້ອງໃຫ້ມີການຮ່ວມໄມ້ຮ່ວມມືກັນ ໃນລະຫວ່າງການເຈລະຈາການຄ້າກັບຄະນະຜູ້ຕາງໜ້າສະຫະລັດໃນວັນຈັນມື້ນີ້ ໃນເມືອງ Chengdu ໃນພາກຕາເວັນຕົກສຽງໃຕ້ຂອງຈີນ.
ຮອງນາຍົກລັດຖະມົນຕີຈີນ ທ່ານ Wang Qishan ກ່າວເຕືອນພວກຜູ້ຕາງໜ້າສະຫະລັດ ຕໍ່ການເອົາເລື້ອງການເຈລະຈາກັນນີ້ໄປເປັນເລື້ອງການເມືອງ ຊຶ່ງທ່ານກ່າວວ່າ ໃນປັດຈຸບັນນີ້ ພວກເຮົາກໍາລັງປະເຊີນກັບວິກິດການເສດຖະກິດທີ່ຮ້າຍແຮງທີ່ສຸດໃນໂລກ. ການຮັບປະ ກັນສຸຂະພາບຂອງເສດຖະກິດ ແມ່ນເປັນຄວາມຮັບຜິດຊອບຂອງທຸກໆປະເທດ. ຄວາມຄືບໜ້າທີ່ບໍ່ກໍ້າເກິ່ງກັນແມ່ນດີກວ່າການຕົກຕໍ່າລົງທີ່ກໍ້າເກິ່ງກັນ.
ສ່ວນທ່ານ John Bryson ລັດຖະມົນຕີການຄ້າສະຫະລັດ ກໍເຕືອນວ່າ ທ່າທີຕໍ່ສາຍພົວພັນດ້ານການຄ້າກັບຈີນກໍາລັງຊຸດໂຊມລົງນັບມື້ທີ່ກຸງວໍຊິງຕັນ ຊຶ່ງທ່ານກ່າວວ່າ ເສດຖະກິດຂອງພວກເຮົາແມ່ນພົວພັນກັນ. ສູ່ມື້ນີ້ ການຄ້າລະຫວ່າງສອງປະເທດພວກເຮົາ ແມ່ນຢູ່ໃນລະດັບສູງສຸດທີ່ບໍ່ເຄີຍມີມາກ່ອນ ແຕ່ຄວາມເປັນຈິງກໍແມ່ນວ່າ ຫລາຍໆຄົນຢູ່ໃນສະຫະລັດ ຮວມທັງປະຊາຄົມທຸລະກິດແລະລັດຖະສະພາ ກໍາລັງເຄື່ອນໄຫວໄປສູ່ການມີທັດສະນະໃນທາງລົບກ່ຽວກັບຄວາມສໍາພັນດ້ານການຄ້າຂອງພວກເຮົາ.
ຄະນະກໍາມາທິການຮ່ວມດ້ານພານິດແລະການຄ້າລະຫວ່າງສະຫະລັດແລະຈີນ ທີ່ພົບປະກັນປີນຶ່ງສອງເທື່ອນັ້ນ ກໍາລັງພະຍາຍາມຫາທາງແກ້ໄຂຄວາມເຄັ່ງຕຶງທາງດ້ານການຄ້າລະຫວ່າງກັນ ໂດຍເພ່ງເລັງໃສ່ການແກ້ໄຂຂໍ້ຂັດແຍ່ງກັນໃນດ້ານນະໂຍບາຍ.
