ນາຍ Cheng Guangcheng ນັກເຄຶ່ອນໄຫວຊາວຈີນຕາພິການ ກ່າວວ່າ ເອກະສານທຸກຢ່າງແມ່ນຄົບຖ້ວນແລະພ້ອມແລ້ວ ສໍາລັບການເດີນ ທາງມາຍັງສະຫະລັດ ແລະເວລານີ້ ມີແຕ່ລໍຖ້າໄດ້ຮັບໜັງສືເດີນທາງຫລືພາສປອດຂອງລາວ ຈາກເຈົ້າໜ້າທີ່ຈີນເທົ່ານັ້ນ.
ນາຍ Chen ໄດ້ລົມກັບພວກນັກຂ່າວໃນວັນພຸດມື້ນີ້ ຈາກໂຮງໝໍແຫ່ງນຶ່ງ ຢູ່ປັກກິ່ງ ບ່ອນທີ່ລາວໄດ້ຮັບການປິ່ນປົວບາດແຜທີ່ໄດ້ຮັບ ໃນລະຫວ່າງການເອົາຕົວຫລົບໜີອອກຈາກການຖືກກັກບໍລິເວນນັ້ນ.
ນາຍ Cheng ກ່າວອີກວ່າ ລາວໝັ້ນໃຈວ່າ ລັດຖະບານຈີນຈະອະນຸຍາດໃຫ້ລາວອອກນອກປະເທດໄດ້ ພາຍໃຕ້ການຈັດແຈງທີ່ທາງວໍຊິງຕັນ ແລະປັກກິ່ງ ໄດ້ປະກາດໃຫ້ຊາບເມື່ອອາທິດຜ່ານມານັ້ນ. ນາຍ Cheng ທະນາຍຄວາມທີ່ຮຽນເອາເອງ ອາຍຸ 40 ປີ ໄດ້ຖືກສະເໜີໃຫ້ທຶນການສຶກສາ ທີ່ມະຫາວິທະຍາໄລກົດໝາຍແຫ່ງນະຄອນນີວຢ໊ອກ.
ຫລັງຈາກໄດ້ຫລົບໜີຈາກການຖືກກັກບໍລິເວນນັ້ນ ນາຍ Cheng ໄດ້ໄປຂໍພັກເຊົາຢູ່ທີ່ສະຖານທູດສະຫະລັດທີ່ປັກກິ່ງເປັນເວລາຫົກມື້ ທີ່ໄດ້ຍັງຜົນໃຫ້ພວກເຈົ້າໜ້າທີ່ຈີນຈົ່ມວ່າໃນທັນທີວ່າ ເປັນການແຊກແຊງໂດຍສະຫະລັດ.