ລິ້ງ ສຳຫລັບເຂົ້າຫາ

ສະຫະລັດວ່າ ຈີນທໍາຄວາມກ້າວໜ້າ ໃນການປາບປາມການຄ້າມະນຸດ

  • ໄພສານ
  • ທອງປານ

ກອງປະຊຸມຮັບຟັງຄໍາໃຫ້ການຂອງລັດຖະສະພາສະຫະລັດ ກ່ຽວກັບການຄ້າມະນຸດໃນປະເທດຈີນ, ວັນທີ 20 ສິງຫາ 2010ໃ

ຄະນະກຳມາທິການບໍລິຫານຂອງລັດຖະສະພາສະຫະລັດກ່ຽວກັບຈີນໄດ້ຕົບມື ຊົມເຊີຍປັກກິ່ງ ທີ່ໄດ້ສ້າງຄວາມກ້າວໜ້າ ໃນການຮັບຮູ້ເຖິງບັນຫາການຄ້າມະນຸດ ແຕ່ໄດ້ຮັບຂ່າວວ່າ ການ ດຳເນີນການບາງຢ່າງຂອງຈີນນັ້ນ ອາດຈະບໍ່ຖືກຈຸດ. ໃນລະຫວ່າງການສົນທະນາຫາລືໂຕະ ມົນເມື່ອວັນທີ 20 ສິງຫາ ຜ່ານມານີ້ ພວກນັກຊ່ຽວຊານໄດ້ເຕືອນວ່າ ການລັກລອບຄ້າຂາຍ ມະນຸດ ໃນຮູບແບບຕ່າງໆນັ້ນ ໄດ້ມີການປ່ຽນແປງໄປ ຕາມກາລະເວລາ.

ສະມາຊິກສະພາສູງ Byron Dorgan ຊຶ່ງເປັນປະທານ ຄະນະກຳມາທິການກ່າວວ່າໄ ດ້ມີຄວາມກ້າວໜ້າລະດັບ ຊາດບາງຢ່າງ ກ່ຽວກັບການຄ້າມະນຸດຢູ່ຈີນ ເຖິງແມ່ນ ການປະຕິບັດງານຂອງພວກເຈົ້າໜ້າທີ່ທ້ອງຖິ່ນ ບໍ່ໄດ້​ເອົາ ​ຈິງ​ເອົາ​ຈັງປານໃດກໍຕາມ. ສະມາຊິກສະພາສູງ Dorgan ກ່າວວ່າ:

“ພວກເຮົາແມ່ນສົນໃຈຫລາຍ ​ໃນ​ການຢາກຊຸກຍູ້ໃຫ້ ຈີນຈົ່ງສືບຕໍ່ສ້າງຄວາມກ້າວໜ້າທີ່ຈີນໄດ້ເຮັດມາເພື່ອ ປັບປຸງແລະ​ແກ້​ໄຂ​ເພິ່ມຂຶ້ນສິ່ງຕ່າງ​ໆ ທີ່ລັດຖະບານ ແຫ່ງຊາດຖືວ່າເປັນບັນຫານັ້ນ. ພວກເຮົາຄິດວ່າ ບັນຫາການລັກລອບຄ້າມະນຸດ ທີ່ມີມາ​ເປັນ​ເວລາດົນນານແລ້ວ ຊຶ່ງພວກເຮົາກໍຮູ້ວ່າມັນເປັນບັນຫາ​ໃຫຍ່​ ຢູ່ໃນ ປະເທດຈີນ ແມ່ນເປັນບັນຫາທີ່ພວກເຮົາທັງໝົດ ຈໍ​າ​ເປັນຕ້ອງປະຕິບັດງານຮ່ວມ​ ກັນເພື່ອພະຍາຍາມກົດດັນໃຫ້ຈີນ ທໍາການແກ້ໄຂບັນຫານີ້ຢ່າງຕັ້ງໜ້າຫລາຍ ທີ່ສຸດ.”

ທ່ານ Earl Brown ຜູ້ອຳນວຍການກ່ຽວກັບເລື່ອງຈີນຂອງສູນກາງ Solidarity ຊຶ່ງ ເປັນອົງການຈັດຕັ້ງດ້ານແຮງງງານແລະສິດທິມະນຸດທີ່ບໍ່ຂຶ້ນກັບລັດຖະບານ ກ່າວວ່າ ຈີນໄດ້ສ້າງຄວາມກ້າວໜ້າໃນການຮັບຜ່ານຮ່າງກົດໝາຍວ່າດ້ວຍແຮງງານ ແລະຮັບເອົາ ສົນທິສັນຍາຕົ້ນສະບັບ ກ່ຽວກັບເລື່ອງການຄ້າມະນຸດເກືອບທັງໝົດ ຂອງອົງການສະຫະ ປະຊາຊາດໃນຕົ້ນປີນີ້ ແຕ່ທ່ານເວົ້າວ່າການລັກລອບຄ້າມະນຸດ ທີ່ພົວພັນກັບກຸ່ມອາຊະ ຍາກຳຂອງຈີນ ຍັງສືບຕໍ່ເປັນບັນຫາແລະມີສູນກາງຢູ່ທີ່ປະເທດໄທ. ທ່ານ Brown ກ່າວ ຕື່ມວ່າ:

“ຂ້າພະເຈົ້າໄດ້ສໍາພາດເປັນເວລາຫລາຍຊົ່ວໂມງ ກັບໜຸ່ມນ້ອຍໄທຄົນນຶ່ງ ທີ່ ເຕີບໃຫຍ່ຂຶ້ນມາໃນສວນປູກໝາກນັດແຫ່ງນຶ່ງ ແລະສິ່ງດຽວທີ່ລາວຢາກຈະເຮັດ ນັ້ນ ກໍຄືໜີອອກໄປຈາກສວນປູກໝາກນັດນີ້ໃຫ້ໄດ້. ຄືຜູ້ກ່ຽວບໍ່ຢາກກັບມາເຫັນ ສວນນີ້ອີກແລ້ວ ດັ່ງນັ້ນໜຸ່ມໄທຄົນນີ້ຈຶ່ງໄດ້ເຂົ້າໄປໃນເມືອງໃຫຍ່ ແລະກໍ​ໄດ້ຖືກ ພວກແກ໊ງຄົນຈີນລັກພາຕົວໄປ ໂດຍຖືກກັກຕົວໄວ້ຢູ່ບ້ານຫລັງນຶ່ງ​ເປັນ​ເວລາ 3 ອາທິດ ແລ້ວສົ່ງຂຶ້ນເຮືອຫາປາ​ໄປ ຖືກ​ບັງຄັບໃຊ້ແຮງງານຢູ່ໃນເຮືອຫາປາພາຍ ໃຕ້ປາຍປືນ ​ໃນ​ທະ​ເລນອກເຂດນ່ານນໍ້າຂອງອິນໂດເນເຊຍ ແລະຕໍ່​ມາ ຊາຍ ໜຸ່ມໄທຄົນນັ້ນແລະໝູ່ອີກຜູ້ນຶ່ງ ກໍ​ໄດ້ພາກັນໂຕນເຮືອ ລອຍເຂົ້າໄປຝັ່ງຂອງອິນ ໂດເນເຊຍ ພາກັນລີ້ຕົວຢູ່ໃນປ່າ ​ແລ້ວ​ຫາທາງກັບຄືນມາປະເທດໄທ ແຕ່ກໍ ຖືກແກ໊ງຈີນລັກພາຕົວໄປອີກ.”

ທ່ານ Brown ເວົ້າວ່າ ເລື່ອງໃນທຳນອງນີ້ ພວມເພີ້ມທະວີຂຶ້ນ ຂະນະທີ່ວິກິດການເສດ ຖະກິດໂລກໄດ້ສ້າງຄວາມ​ເດືອດຮ້ອນ ໃຫ້ແກ່ພວກຄົນງານຢູ່ໃນທຸກຫົນແຫ່ງ ​ໃນ​ຂະນະ​ທີ່​ ພວກ​ຄົນ​ງານ​ໃນ​ຈໍານວນ​ຫລາຍ​ຂຶ້ນ ບໍ່​ໄດ້​ຮັບ​ການ​ປົກ​ປ້ອງ​ຄຸ້ມ​ຄອງ​ທາງ​ກົດໝາຍເນື່ອງ​ຈາກ ພວກນາຍຈ້າງໃນຈຳນວນເພີ້ມຂຶ້ນ ຊອກຫາຊ່ອງທາງຫຼີກລ້ຽງ ການປະຕິບັດຕາມກົດໝາຍ ແຮງງານ ໂດຍຫັນໄປໃຊ້ຕະຫຼາດແຮງງານ ທີ່ຖືກກົດໝາຍແຕ່ພຽງເຄິ່ງນຶ່ງ ແລະບໍ່ຖືກຕ້ອງ ຕາມກົດໝາຍເລີຍນັ້ນ.

ທ່ານນາງ ຕຽນຕຽນ ຈົງ ອາຈານສອນວິຊາມະນຸດວິທະຍາທີ່ມະຫາວິທະຍາໄລລັດນິວຢອກ ທີ່ໄດ້ຂຽນປື້ມຫຼາຍໆຫົວກ່ຽວກັບພວກໂສເພນີຊາວຈີນ ການຄ້າປະເວນີ ແລະການຕິດເຊື້ອ HIV ແລະໂຣກເອດສ໌ ກ່າວວ່າ ຈີນ​ໄດ້ເລີ້ມທໍາ​ການປາບປາມພວກຄ້າມະນຸດ ​ແລະພວກ ໂສເພນີໃນປີ 1989 ຊຶ່ງ​ໄດ້ຍັງຜົນໃຫ້ມີການທໍາຮ້າຍພວກແມ່ຍິງ ​ໂດຍເຈົ້າໜ້າທີ່ຕຳຫຼວດ ຢູ່​ເລື້ອຍໆ ແລະບັງຄັບໃຫ້ມີການຍົກຍ້າຍບ່ອນຢູ່ນັ້ນ.

ສາສະດາຈານຈົງກ່າວວ່າ ໃນການຄົ້ນຄວ້າຂອງທ່ານກ່ຽວກັບພວກຄ້າປະເວນີ ທີ່ມາຈາກ ເຂດຊົນນະບົດຢູ່ຈີນນັ້ນ ຕຳຫຼວດໄດ້ບຸກເຂົ້າໄປກວດຄົ້ນປາບປາມ ແລະບຸກເຂົ້າໄປຊ່ອຍກູ້ ໄພ ຊຶ່ງໄດ້ບັງຄັບໃຫ້ພວກຄ້າປະເວນີຕ້ອງໄດ້ພາກັນລັກລອບ ຫຼືເຮັດກິດຈະການ ແບບບໍ່ ມີການເປີດເຜີຍ ແລະເຮັດໃຫ້ເປັນໄພອັນຕະລາຍເພີ້ມຂຶ້ນ ພ້ອມທັງຄວາມຮຸນແຮງ ການ ສວຍໃຊ້ຕະຫຼອດທັງການລ່ວງລະເມີດຕໍ່ພວກຄ້າປະເວນີ ຮວມທັງການຈຳແນກກີດກັນ ການສືບຕໍ່ຮາວີລົບກວນຂອງຕຳຫຼວດ ແລະການກໍ່ຄວາມຮຸນແຮງທາງດ້ານຮ່າງກາຍຢ່າງ ບໍ່ເລືອກໜ້າ ຂອງກຸ່ມອັນທະພານທ້ອງຖິ່ນ ໂດຍບໍ່ໄດ້ຮັບການແກ້ໄຂໃດໆ ທາງດ້ານກົດ ໝາຍ.

ສາສະດາຈານຈົງກ່າວຕື່ມວ່າ ແມ່ຍິງຊາວຈີນຫຼາຍໆຄົນທີ່ ທ່ານນາງໄດ້ສຳພາດ ​ໄດ້​ອອກ ​ໄປເຮັດ​ວຽກ​ແບບນີ້ຢູ່ນອກປະ ເທດຈີນ ດ້ວຍຄວາມສະມັກໃຈ ເພື່ອເປັນຊ່ອງທາງໃນການຫາ ເງິນ ທີ່​ເຂົາ​ເຈົ້າຈະໃຊ້ເວລາດົນ ກວ່າ 10 ເທົ່າ ຈຶ່ງຈະຫາ ໄດ້ ຖ້າພວກເຂົາເຈົ້າຫາກຍັງຢູ່ທີ່ຈີນ. ທ່ານນາງໄດ້ສະເໜີໃຫ້ມີການ ເປັນພາຄີກັນລະຫວ່າງປະຊາຄົມ ຂອງພວກຄ້າປະເວນີ ແລະເຈົ້າ ໜ້າທີ່ປະຕິບັດກົດໝາຍ ເພື່ອ ຊ່ອຍປ້ອງກັນບໍ່ໃຫ້ ມີການບີບ ບັງຄັບໃຊ້ແຮງງານ ພ້ອມທັງໃຫ້ ມີການລະບຸໂຕ ແລະຊ່ອຍພວກ ທີ່ຕົກເປັນເຫຍື່ອຂອງການຄ້າມະນຸດ ໄດ້ດີຂຶ້ນ.

ນອກນັ້ນແລ້ວ ຄະນະກຳມາທິການຂອງລັດຖະສະພາສະຫະລັດຍັງໄດ້ຍິນ​ຄໍາ​ໃຫ້ການວ່າ ການລັກລອບ​ເອົາມະນຸດຈາກຈີນ​ເຂົ້າມາຍັງສະຫະລັດ ຍັງສືບຕໍ່ເປັນບັນຫາຮ້າຍແຮງ ທັງນີ້ ກໍຍ້ອນໄພອັນຕະລາຍທີ່ມັກຈະຕິດຕາມມາ ກັບພວກທີ່ຈ່າຍເງິນກ້ອນໃຫຍ່ໆແລະສ່ຽງຊີວິດ ຂອງພວກເຂົາເຈົ້າໃນການພະຍາຍາມດັ່ງກ່າວ. ທ່ານ Patrick Keefe ຈາກກຸ່ມຄົ້ນຄວ້າ ນະໂຍບາຍ Century Foundation ກ່າວວ່າ ໃນທຸກມື້ນີ້ ຄົນຄົນນຶ່ງ ຢູ່ປະເທດຈີນທີ່ ຢາກລັກລອບເຂົ້າມາໃນສະຫະລັດແບບຜິດກົດໝາຍ ​ແມ່ນ​ເຕັມ​ໃຈ​ທີ່​ຈະຈ່າຍເງິນຫຼາຍ ເຖິງ 70,000 ໂດລາ ໃນການພະຍາຍາມດັ່ງກ່າວ.

“ຖ້າຫາກວ່າ ພວກເຂົາເຈົ້າສາມາດເຂົ້າມາສະຫະລັດໄດ້ ​ແລະ​ນັ້ນກໍ​ເປັນ​ການ​ສົມ ມຸດ​ທີ່​ເປັນ​ໄປ​ໄດ້​ຍາກ​ຫລາຍ ເພາະວ່າ ກໍ​ຄື​ທ່ານ​ຮູ້ຫັ້ນ​ແຫລະ ​ເຂົາ​ເຈົ້າ​ຕ້ອງ​ໄດ້​ ຂີ່ເຮືອບິນຫລາຍລໍາຫລາຍ​ຕໍ່ ຕ້ອງ​ຜ່ານສະໜາມບິນຫລາຍໆແຫ່ງ ບ່ອນ​ທີ່ພວກ ເຂົາເຈົ້າອາດຖືກຈັບ​ແລະກັກຕົວ​ໄວ້ ຖ້າວ່າພວກເຂົາເຈົ້າຖືໜັງສືເດີນທາງປອມ. ​ແລະກໍມີຢູ່ເລື້ອຍ ທີ່ພວກເຂົາເຈົ້າຕ້ອງໄປທາງເຮືອ ແລະເຮືອສາມາດຈົມນໍ້າໄດ້ ຫລື​ບໍ່​ກໍ​ຖືກ​ສະກັດ​ກັ້ນ ​ແລະ​ຖືກ​ກວດ​ຄົ້ນ. ແຕ່ວ່າ ຖ້າຫາກວ່າພວກເຂົາເຈົ້າມາ​ ຮອດສະຫະລັດໄດ້ຢ່າງປອດ​ໄພ ພວກເຂົາເຈົ້າກໍຕ້ອງຈ່າຍເງິນຄ່າຈ້າງ ສ່ວນທີ່ ຍັງເຫລືອນັ້ນ.”

ທ່ານ Keefe ເວົ້າຕື່ມວ່າ ເກືອບສະເໝີ​ໄປ ຄ່າທຳນຽມນີ້ຈະມີການເກັບກັນພາຍໃນໄລຍະ 24 ຊົ່ວໂມງດ້ວຍປາຍປືນ. ຜູ້ທີ່ວ່າ​ຈ້າງ ຈະຕ້ອງ​ໄດ້ຕິດຕໍ່ໄປຍັງຜູ້ຄົນ ທີ່ເຂົາເຈົ້າຮູ້ຈັກໂດຍ ທາງໂທລະສັບ ເພື່ອຮ້ອງຂໍກູ້ຢືມ​ເງິນ ຫລືລັກເອົາເງິນຈຳນວນດັ່ງກ່າວ. ຖ້າເຂົາເຈົ້າຫາກ ຈ່າຍເງິນໃຫ້ພວກລັກລອບ​ເອົາເຂົາເຈົ້າມາ ໂດຍທັນທີນັ້ນ ພວກເຂົາເຈົ້າກໍຈະຖືກປ່ອຍ. ໃນບາງຄັ້ງ ພວກເຂົາເຈົ້າອາດຈະຂໍລີ້ໄພ ແຕ່ທ່ານ Keefe ເວົ້າວ່າ ສ່ວນໃຫຍ່ແລ້ວ ພວກເຂົາເຈົ້າຈະ​ຕ້ອງໄດ້ເຂົ້າຮ່ວມເສດຖະກິດໃຕ້ດິນ ແລະເຮັດວຽກເຮັດການເປັນຄົນງານ ບໍ່ມີເອກກະສານ ໃນອຸດສາຫະກຳຕ່າງໆ ​ແລະສ່ຽງຕໍ່ການຖືກຈັບເຂົ້າຄຸກ ຫຼື ຖືກເນລະເທດ.

ທ່ານ Keefe ເວົ້າວ່າ ຍ້ອນເສດຖະກິດຂອງ​ຈີນ​ທີ່ຂະຫຍາຍໂຕ​ໄວຂຶ້ນນັ້ນ ເຮັດ​ໃຫ້ມີການ ຫຼຸດຜ່ອນລົງໃນການຫຼັ່ງໄຫຼຂອງພວກຄົນງານຈາກເຂດພາກໃນຂອງປະເທດ ໄປຍັງເຂດ ແຄມຝັ່ງທະເລກໍ້າຕາເວັນອອກ ບ່ອນທີ່ລັກລອບມະນຸດສ່ວນໃຫຍ່ໄດ້ມີຂຶ້ນ ຍ້ອນ​ວ່າມີວຽກ ການຢູ່ຕາມໂຮງຈັກໂຮງງານ​ໃຫ້ເຮັດ ເປັນຈຳນວນຫຼວງຫລາຍນັ້ນ. ແຕ່ແນວໃດກໍຕາມ ທ່ານກ່າວວ່າ ການລັກລອບ​ເອົາຊາວຈີນທີ່ບໍ່ມີເອກກະສານ ຈາກເມັກຊິໂກເຂົ້າໄປຍັງສະຫະ ລັດ ໄດ້ມີຈຳນວນເພີ້ມຂຶ້ນ. ທ່ານເວົ້າວ່າ ແນວໂນ້ມ ຫຼື ທ່າອຽງອີກອັນນຶ່ງ ກໍຄື ມີພວກ ຊາວຈີນໜຸ່ມນ້ອຍໃນຈຳນວນເພີ້ມຂຶ້ນ ທີ່ໄດ້ຖືກພໍ່ແມ່ສົ່ງ​ເຂົ້າ​ມາເຮັດວຽກ ແບບຜິດກົດໝາຍ ຢູ່ໃນສະຫະລັດ.

XS
SM
MD
LG