ພວກສະໜັບສະໜູນສິດທິມະນຸດກຳລັງຊຸກຍູ້ໃຫ້ປະທານາ
ທິບໍດີສະຫະລັດ ທ່ານ ບາຣັກ ໂອບາມາ ທຳການກົດດັນ
ປະທານປະເທດຈີນ, ທ່ານ Hu Jintao ກ່ຽວກັບປະຫວັດ
ດ້ານສິດທິມະນຸດຂອງຈີນໃນລະຫວ່າງທີ່ປະທານປະເທດຈີນ
ທໍາການຢ້ຽມຢາມສະຫະລັດຢ່າງເປັນທາງການຢູ່ໃນເວລານີ້.
ມີພວກປະທ້ວງຫລາຍຮ້ອຍຄົນ ໄປໂຮມຊຸມນຸມກັນຢູ່ນອກ
ທຳນຽບຂາວໃນວັນອັງຄານວານນີ້ ໂດຍໄດ້ພາກັນຖືປ້າຍ
ຮຽກຮ້ອງໃຫ້ມີປະຊາທິປະໄຕໃນຈີນ ແລະໃຫ້ປ່ອຍຕີເບດ
ໃນເຂດພູເຂົາຫິມມະໄລທີ່ຈີນຄອບຄອງນັ້ນໃຫ້ເປັນອິດສະ
ລະ. ໃນຂະນະດຽວກັນນັ້ນ ຢູ່ທາງໃນທໍານຽບຂາວ ທ່ານ
ໂອບາມາ ກໍກໍາລັງຕ້ອນຮັບຄູ່ຕຳແໜ່ງຈີນຂອງທ່ານໂດຍ
ການຈັດງານລ້ຽງອາຫານຄໍ່າທີ່ມີການເຮັດວຽກໄປນຳ ຊຶ່ງ
ເປັນງານທຳອິດທີ່ຈັດຂຶ້ນໃນລະຫວ່າງການຢ້ຽມຢາມສະຫະ
ລັດຢ່າງເປັນທາງການເປັນເວລາ 4 ວັນຂອງທ່ານ Hu ໃນ
ຄັ້ງນີ້. ໃນກອງປະຊຸມຖະແຫລງຂ່າວສຳລັບພວກສະໜັບສະໜູນສິດທິມະນຸດໃນວັນອັງຄານ
ວານນີ້ ທີ່ລັດຖະສະພາສະຫະລັດໃນນະຄອນຫລວງວໍຊິງຕັນນັ້ນ, ຜູ້ແທນສະພາຕໍ່າ ທ່ານ
Christopher Smith ໄດ້ຮຽກຮ້ອງໃຫ້ປະທານາທິບໍດີໂອບາມາທຳການກົດດັນຕໍ່ທ່ານ Hu
Jintao ເພື່ອໃຫ້ປ່ອຍຕົວທ່ານ Liu Xiaobo, ນັກຂຽນແລະຜູ້ສົ່ງເສີມສິດທິມະນຸດທີ່ໄດ້ຮັບ
ລາງວັນໂນແບລຂະແໜງສັນຕິພາບເມື່ອເດືອນທັນວາທີ່ຜ່ານມານີ້.
