ບັນດາເຈົ້າໜ້າທີ່ອາວຸໂສຂອງສະຫະລັດ ແລະ ສາທາລະນະລັດ ປະຊາຊົນ ຈີນ ໄດ້ດຳເນີນການເຈລະຈາທາງການທູດ ໃນນະຄອນຫຼວງ ວໍຊິງຕັນ ໃນວັນ ພະຫັດວານນີ້ ເພື່ອຫລຸດຜ່ອນຄວາມເຄັ່ງຕຶງ, ແລະ ປຶກສາຫາລືກ່ຽວກັບຄວາມ ພະຍາຍາມຢ່າງຕໍ່ເນື່ອງ ເພື່ອຮັກສາການຊ່ອງທາງການຕິດຕໍ່ສື່ສານ ລະຫວ່າງ ກອງທັບ ກັບ ກອງທັບ ແລະຍົກລະດັບການຮ່ວມມື.
ຮອງລັດຖະມົນຕີການຕ່າງປະເທດ ສະຫະລັດ ທ່ານ ເຄີດ ແຄັມເບລ (Kurt Campbell) ໄດ້ຕ້ອນຮັບຮອງລັດຖະມົນຕີການຕ່າງປະເທດຈີນ ທ່ານ ໝ່າ ຈ້າວຊູ (Ma Zhaoxu) ຢູ່ທີ່ກະຊວງການຕ່າງປະເທດ ໃນວັນພະຫັດວານນີ້ ເພື່ອການປຶກສາຫາລື ທີ່ມີຈຸດປະສົງເພື່ອຮັກສາຊ່ອງທາງການສື່ສານທີ່ເປີດກວ້າງ ເພື່ອປ້ອງກັນການເຂົ້າໃຈຜິດ ແລະຄວາມຂັດແຍ່ງໂດຍບໍ່ໄດ້ຕັ້ງໃຈ, ໂດຍສະເພາະຢ່າງຍິ່ງແມ່ນໃນຊ່ວງເວລາທີ່ມີຄວາມເຄັ່ງຕຶງ.
ຫຼັງຈາກການສົນທະນາກັນແບບໂຕຕໍ່ໂຕ ເປັນເວລາສອງຊົ່ວໂມງ, ເຈົ້າໜ້າທີ່ຈາກສະຫະລັດ ແລະສາທາລະນະລັດ ປະຊາຊົນ ຈີນ ໄດ້ຈັດງານລ້ຽງອາຫານທ່ຽງເພື່ອເຮັດວຽກ ຢູ່ທີ່ກະຊວງການຕ່າງປະເທດ. ຫຼັງຈາກນັ້ນໃນຕອນບ່າຍ, ຮອງທີ່ປຶກສາດ້ານຄວາມໝັ້ນຄົງແຫ່ງຊາດຂອງສະຫະລັດ ທ່ານ ຈອນ ໄຟເນີ (Jon Finer) ໄດ້ສືບຕໍ່ສົນທະນາກັບທ່ານ ໜ່າ (Ma).
ທີ່ປຶກສາດ້ານຄວາມໝັ້ນຄົງແຫ່ງຊາດຂອງທຳນຽບຂາວ ທ່ານ ເຈກ ຊຸລລີວານ (Jake Sullivan) ຍັງໄດ້ແວ່ມາທີ່ກອງປະຊຸມເພື່ອທັກທາຍທ່ານ ໝ່າ ແລະ ແລກປ່ຽນຄວາມຄິດເຫັນກ່ຽວກັບບັນຫາທີ່ສຳຄັນຕ່າງໆ.
“ທັງສອງຝ່າຍໄດ້ປຶກສາຫາລືກ່ຽວກັບວຽກງານທີ່ກຳລັງເດີນຢູ່ ເພື່ອສືບຕໍ່ການຕິດຕໍ່ສື່ສານ ລະຫວ່າງກອງທັບ ກັບ ກອງທັບ ແລະສົ່ງເສີມການຮ່ວມມືໃນດ້ານຕ່າງໆ ທີ່ຜົນປະໂຫຍດຂອງພວກເຮົາ ມີຄວາມສອດຄ່ອງກັນ, ເຊັ່ນການຕໍ່ຕ້ານຢາເສບຕິດ,” ທຳນຽບຂາວກ່າວໃນຖະແຫຼງການສະບັບນຶ່ງ, ກ່ອນກອງປະຊຸມທີ່ໄດ້ຖືກຄາດການໄວ້ ລະຫວ່າງຜູ້ນຳດ້ານປ້ອງກັນປະເທດ ສະຫະລັດ ແລະ ຈີນ ໃນລະຫວ່າງ ການປະຊຸມ ຊັງກຣີ-ລາ (Shangri-La) ຢູ່ສິງກະໂປ.
ຟໍຣັມສະແດງຄວາມຄິດເຫັນ