ລິ້ງ ສຳຫລັບເຂົ້າຫາ

ສະຫະລັດ​ວ່າ ຈີນ ​ຄວນຈະ​ເລັ່ງລັດ​ ການ​ປະຕິ​ຮູບ ​ເສດຖະກິດ​

  • ທອງປານ ເທບວົງສາ

ທ່ານ Timothy Geithner ລັດຖະມົນຕີການເງິນສະຫະລັດ

ເມື່ອ​ວັນ​ພະຫັດ​ມື້​ນີ້ ທ່ານ Timothy Geithner ລັດຖະມົນຕີ​ກະຊວງການ ​ເງິນ​ສະຫະລັດ​ຮຽກຮ້ອງ​ຈີນປ່ອຍ​ໃຫ້​ຄ່າ​ເງິນຕາ​ທີ່​ຄວບ​ຄຸມ​ຢ່າງ​ເຄັ່ງ​ຄັດຂອງ​ຕົນ​ນັ້ນສູງ​ຂື້ນ ​ໃນ​ຂະນະ​ທີ່​ບັນດາ​ນັກ​ການ​ທູດ​ລະດັບ​ສູງ​ ຈາກ​ທັງ​ສອງ​ປະ​ເທດໄປເຕົ້າ​ໂຮມ​ກັນ​ທີ່​ກຸງປັກ​ກິ່ງເພື່ອ​ປະຊຸມ​ປະ​ຈໍາປີ​ກ່ຽວ​ກັບ​ບັນຫາ​ເສ​ດຖະ ກິດແລະ​ຄວາມ​ໝັ້ນຄົງ.

ຄວາມ​ຄິດ​ເຫັນ​ດັ່ງກ່າວ​ຂອງ​ທ່ານ Geithner ​ແມ່ນ​ມີ​ຂຶ້ນ​ໃນຕອນ​ເລິ່ມ​ເປີດ ການໂອ້​ລົມ​ສົນທະນາ​ດ້ານ​ຍຸດ​ທະ​ສາດ​ສອງ​ມື້ລະຫວ່າງ​ຈີນ​ແລະ​ສະຫະລັດ ຊຶ່ງ​ໄດ້​ຖືກ​ບົດ​ບັງ​ໂດຍ​ຂໍ້​ຂັດ​ແຍ້​ງກັນ​ທາງ​ດ້ານການ​ທູດ​ ກ່ຽວ​ກັບ​ນັກ​ເຄຶ່ອນ​ໄຫວ​ຈີນ​ທີ່ຂໍ​ຄວາມ​ພິທັກ​ປົກ​ປ້ອງຈາກ​ສະຫະລັດ.

ລັດຖະມົນຕີ​ການ​ເງິນ​ສະຫະລັດ​ໄດ້​ສະ​ແດງ​ຄວາມ​ສະໜັບສະໜຸນ​ຕໍ່​ແຜນ ການຈີນ ​ທີ່​ຈະປັບປຸງ​ແກ້​ໄຂ​ລະບົບ​ການ​ເງິນ​ຂອງ​ຕົນ​ໃຫ້​ດີ​ຂື້ນ ​ເພື່ອ​ເພີ່ມ​ການສະໜັບສະ​ໜຸນ​ຈາກ​ວິສາ​ຫະກິດ​ພາກ​ເອກະ​ຊົນ ​ແລະຫຼຸດ​ຜ່ອນການ​ໃຫ້​ສິດພິ​ເສດ​ສໍາລັບ​ບໍລິສັດ​ຕ່າງໆ​ທີ່​ລັດ​ເປັນ​ເຈົ້າຂອງ​ນັ້ນ​ລົງ. ​ແຕ່​ທ່ານໄກ້​ເນີ​ກ່າວ​ອີກວ່າ ຈີນ​ຄວນຈະ​ເລັ່ງລັດ​ການ​ປະຕິ​ຮູບ​ເສດຖະກິດ​ຂອງ​ຕົນ​ໃຫ້​ໄວ​ຂຶ້ນ.

​ເຈົ້າໜ້າ​ທີ່​ອາວຸ​ໂສ​ສະຫະລັດ​ທ່ານ​ນຶ່ງ​ກ່າວ​ເມື່ອ​ວັນ​ພະຫັດ​ມື້​ນີ້​ວ່າ ມີ​ຄວາມ ກ້າວໜ້າ​ບາງ​ປະການ​ແລ້ວ​ໃນ​ການ​ເຈລະຈາ​ກັນ​ດ້ານ​ເສດຖະກິດ​ນັ້ນ. ​ເຈົ້າໜ້າ​ທີ່​ອາວຸ​ໂສ​ທ່ານ​ນີ້ ​ໄດ້​ບອກ​ພວກ​ນັກ​ຂ່າວ​ໂດຍ​ບໍ່​ຂໍ​ບອກ​ຊື່ວ່າ ຈີນ​ໄດ້​ຕົກ ລົງ​ທີ່ຈະ​ພິດ​ຈາລະ​ນາ​ນໍາ​ອອກ​ໃຊ້​ກົດລະບຽບລະຫວ່າງ​ຊາດ ​ກ່ຽວ​ກັບ​ການ​ໃຫ້ສິນ​ເຊື່ອ​ໃຫ້​ແກ່​ພວກບໍລິສັດ​ສົ່ງ​ອອກ​ຂອງ​ຕົນ.

XS
SM
MD
LG