ລັດຖະມົນຕີປ້ອງກັນປະເທດ ສະຫະລັດ ທ່ານ ລອຍດ໌ ອອສຕິນ ໄດ້ລົມກັບຄູ່ຮ່ວມຕຳແໜ່ງຂອງທ່ານຈາກ ຈີນ ໃນວັນອັງຄານວານນີ້, ເຊິ່ງແມ່ນການສົນທະນາຄັ້ງທຳອິດລະຫວ່າງຫົວໜ້າກະຊວງປ້ອງກັນປະເທດ ຂອງທັງສອງປະເທດ ດັ່ງກ່າວ ໃນຮອບເກືອບ 17 ເດືອນ
ທຳນຽບຫ້າແຈໄດ້ກ່າວວ່າ ທ່ານ ອອສຕິນ ແລະ ພົນເຮືອເອກ ຈີນ ດອງ ຈຸນ ໄດ້ປຶກສາຫາ ກ່ຽວກັບ “ສາຍພົວພັນການປ້ອງກັນປະເທດ ແລະ ບັນຫາດ້ານຄວາມໝັ້ນຄົງຕ່າງໆໃນໂລກ ຈາກສົງຄາມທີ່ບໍ່ໄດ້ຖືກຍຸແຍ່ຂອງ ຣັດເຊຍ ໃນ ຢູເຄຣນ ເຖິງການຍຸແຍ່ເມື່ອບໍ່ດົນມານີ້ຈາກ ເກົາຫຼີເໜືອ. ຖະແຫຼງຂ່າວສະບັບນຶ່ງຂອງທຳນຽບຫ້າແຈ ໄດ້ກ່າວວ່າ ທ່ານ ອອສຕິນ ໄດ້ກ່າວຢ້ຳເຖິງຄວາມສຳຄັນຂອງ “ຄວາມເຄົາລົບສຳລັບເສລີພາບໃນການເດີນເຮືອໃນມະຫາສະໝຸດທີ່ເປີດກວ້າງ ດັ່ງທີ່ຖືກຮັບປະກັນພາຍໃຕ້ກົດໝາຍສາກົນ, ໂດຍສະເພາະໃນທະເລຈີນໃຕ້.”
ປັກກິ່ງ ໄດ້ຢືນຢັດຄວາມປາຖະໜາຂອງເຂົາເຈົ້າທີ່ຈະຄວບຄຸມການເຂົ້າຫາທະເລຈີນໃຕ້ ແລະ ນຳເອົາ ໄຕ້ຫວັນ ມາຢູ່ໃນການຄວບຄຸມຂອງຕົນ, ໂດຍໃຊ້ກຳລັງຖ້າມີຄວາມຈຳເປັນ. ປະທານາທິບໍດີ ໂຈ ໄບເດັນ ໄດ້ກ່າວວ່າ ກອງກຳລັງ ສະຫະລັດ ຈະປ້ອງກັນເກາະທີ່ປົກຄອງຕົນເອງແບບປະຊາທິປະໄຕຈາກການໂຈມຕີ.
ຖະແຫຼງການສະບັບນຶ່ງຂອງກະຊວງປ້ອງກັນປະເທດ ຈີນ ໄດ້ກ່າວວ່າ ບັນຫາ ໄຕ້ຫວັນ ແມ່ນ “ແກນກາງຂອງຜົນປະໂຫຍດຫຼັກຂອງ ຈີນ.”
ທ່ານ ດອງ ໄດ້ກ່າວວ່າ “ຝ່າຍ ສະຫະລັດ ຄວນຮັບຮູ້ການຢືນຢັດທີ່ໜັກແໜ້ນຂອງ ຈີນ, ເຄົາລົບຜືນແຜ່ນດິນອັນຄົບຖ້ວນຂອງ ຈີນ ແລະ ສິດທິທາງເລ ແລະ ຜົນປະໂຫຍດໃນທະເລຈີນໃຕ້ ແລະ ດຳເນີນການທີ່ມີປະໂຫຍດເພື່ອປ້ອງກັນສັນຕິພາບໃນພາກພື້ນ,” ອີງຕາມຖະແຫຼງການ.
ທ່ານ ດອງ ຍັງໄດ້ກ່າວວ່າທັງສອງປະເທດຄວນເຮັດວຽກຮ່ວມກັນເພື່ອສ້າງຄວາມເຊື່ອຖືເຊິ່ງກັນລະກັນ.
ຄວາມເຄັ່ງຕຶງແມ່ນໄດ້ທະວີຂຶ້ນລະຫວ່າງ ຈີນ ແລະ ຟີລິບປິນ ທີ່ເປັນພັນທະມິດຂອງ ສະຫະລັດ ໃນທະເລຈີນໃຕ້ ເຊັ່ນກັນ, ດ້ວຍເຈົ້າໜ້າທີ່ຍາມຝັ່ງຂອງ ຈີນ ໄດ້ໃຊ້ທໍ່ສີດນ້ຳເພື່ອຂົ່ມຂູ່ກຳປັ່ນຫາປາຂອງ ຟີລິບປິນ ໃນເດືອນນີ້. ຈີນ ຍັງໄດ້ໃຊ້ກົນລະຍຸດການຕຳ ແລະ ກະແທກໃສ່, ຕັ້ງສິ່ງກີດຂວາງໃຕ້ທະເລ ແລະ ແສງເລເຊີລະດັບທະຫານເພື່ອຢຸດພາລະກິດການຕື່ມສຳພາລະ ແລະ ການລາດຕະເວນຂອງ ຟີລິບປິນ.
ຟໍຣັມສະແດງຄວາມຄິດເຫັນ