ນາຍ Chen Guangcheng ນັກເຄຶ່ອນໄຫວຊາວຈີນ ກ່າວວ່າ ຈະມີ ການອອກໜັງສືເດີນທາງຫຼືພາສພອດ ໃຫ້ລາວແລະຄອບຄົວຂອງລາວ ເພື່ອເດີນທາງໄປຕ່າງປະເທດພາຍໃນສອງອາທິດຕໍ່ໜ້ານີ້.
ນັກເຄຶ່ອນໄຫວຕາບອດຊາວຈີນຄົນນີ້ໄດ້ບອກພວກນັກຂ່າວຕາເວັນຕົກເມື່ອວັນພະຫັດມື້ນີ້ວ່າ ບັນດາເຈົ້າໜ້າທີ່ຮັກສາຄວາມປອດໄພ ແຂວງ Shangdong ໄດ້ນໍາເອົາໃບຄຳຮ້ອງຂໍວິຊ່າມາໃຫ້ລາວ ແລະຄອບຄົວຂອງລາວເພື່ອຕື່ມຂໍ້ຄວາມໃສ່ໃນມື້ກ່ອນນີ້ແລະກໍໄດ້ຖ່າຍຮູບພາສປອດນໍາ. ເມື່ອວັນພຸດວານນີ້ ນາຍ Chen ໄດ້ປຶກສາຫາລືກ່ຽວກັບບັນຫາໃນການໃຫ້ສໍາພາດກັບວີໂອເອຜະແນກພາສາຈີນ.
ຫຼັງຈາກນາຍ Chen ແລະຄອບຄົວຂອງລາວ ໄດ້ຮັບພາສປອດແລ້ວ ພວກເຂົາເຈົ້າກໍຈະສາມາດເດີນທາງມາຍັງສະຫະລັດໄດ້ບ່ອນທີ່ມະຫາວິທະຍາໄລນີວຢ໊ອກ ໄດ້ສະເໜີໃຫ້ທຶນການສຶກສາແກ່ລາວນັ້ນ.
ນາຍ Chen ໄດ້ຫຼົບເຂົ້າໄປຂໍພັກເຊົາຢູ່ສະຖານທູດສະຫະລັດທີ່ກຸງປັກກິ່ງເມື່ອເດືອນຜ່ານມາ ຫຼັງຈາກເອົາຕົວຫຼົບໜີຈາກການຖືກກັກບໍລິເວນທີ່ແຂວງ Shangdong. ຕໍ່ມານາຍ Chen ກໍໄດ້ອອກຈາກສະຖານທູດສະຫະລັດ ແລະໄປຮັກສາຕົວທີ່ໂຮງໝໍແຫ່ງນຶ່ງ ຫຼັງຈາກໄດ້ຮັບເອົາຂໍ້ຕົກ ລົງທີ່ບັນລຸໂດຍເຈົ້າໜ້າທີ່ສະຫະລັດແລະຈີນ ທີ່ຈະອະນຸຍາດໃຫ້ນາຍ Chen ອາໄສຢູ່ໃນບ່ອນທີ່ປອດໄພແຫ່ງນຶ່ງໃນປະເທດຈີນແລະສຶກສາກົດໝາຍ.
ແຕ່ນາຍ Chen ໄດ້ປ່ຽນໃຈບໍ່ເທົ່າໃດຊົ່ວໂມງລຸນຫຼັງໄດ້ອອກມາຈາກການ ພິທັກປົກປ້ອງຂອງສະຫະລັດ ໂດຍກ່າວວ່າຄອບຄົວຂອງລາວຖືກຂົ່ມຂູ່.
ເຈົ້າໜ້າທີ່ໃນແຂວງ Shangdong ໄດ້ກ່າວຫາທ້າວ Chen Kegui ຫຼານຊາຍຂອງນາຍ Chen ໃນຂໍ້ຫາພະຍາຍາມຂ້າຄົນຫຼັງຈາກທີ່ຖືກ ກ່າວຫາວ່າໄດ້ທຳຮ້າຍພວກເຈົ້າໜ້າທີ່ທ້ອງຖິ່ນທີ່ບຸກເຂົ້າໄປໃນເຮືອນ ຂອງອ້າຍລາວ ຫຼັງຈາກນາຍ Chen ໄດ້ຫຼົບໜີອອກມາ.
ກຸ່ມປົກປ້ອງສິດທິມະນຸດຈີນ ກ່າວວ່າ ຕົນໄດ້ຮູ້ເລຶ່ອງຂອງ ນາຍ Chen Guangfu ອ້າຍຂອງນາຍ Chen Kegui ວ່າ ໄດ້ຖືກທໍລະມານໂດຍ ພວກເຈົ້າໜ້າທີ່ຫຼັງຈາກນ້ອງຊາຍຂອງລາວໄດ້ຫຼົບໜີໄປນັ້ນ