ລັດຖະມຸນຕີການຕ່າງປະເທດສະຫະລັດ ທ່ານນາງຮີນລາຣີ
ຄລິນຕັນໄດ້ຮຽກຮ້ອງຈີນໃຫ້ຄວາມຮ່ວມໄມ້ຮ່ວມມື
ໃນການວາງແຜນເພື່ອການຕອບໂຕຂອງນາໆຊາດຕໍ່
ເກົາຫລີເໜືອແລະອິຣ່ານໃນຖ້ອຍຖະແຫລງໃນວັນຈັນມື້ນີ້
ໃນຕອນໄຂການພົບປະຫາລືກັນລະຫວ່າງສອງປະເທດ
ໃນກຸງປັກກິງ. ລັດຖະມຸນຕີການຕ່າງປະເທດຄລິນຕັນ
ກ່າວວ່າ ສອງປະເທດໄດ້ຮ່ວມມືກັນໃນປີແລ້ວນີ້
ໃນສະພາຄວາມໝັ້ນຄົງສະຫະປະຊາຊາດໃນແຜນ
ການລົງໂທດຕໍ່ເກົາຫລີເໜືອ ຫລັງຈາກເກົາຫລີເໜືອ
ທຳການທົດລອງອາວຸດນີວເຄລຍຂອງຕົນນັ້ນ.
ນອກນັ້ນທ່ານນາງຄລິນຕັນຍັງໄດ້ຊີ້ເຖິງການເຈລະຈາກັນຫວ່າງໄວໆຜ່ານມານີ້ຢູ່ໃນ
ສະພາຄວາມໝັ້ນຄົງສະຫະປະຊາຊາດທີ່ຍັງຜົນໃຫ້ມີຮ່າງການແກ້ໄຂທີ່ທຳການລົງໂທດ
ຄັ້ງໃຫມ່ຕໍ່ອີຣ່ານກ່ຽວກັບໂຄງການຜລິດນີວເຄລັຍທີ່ມີການສົງໄສກັນນັ້ນ. ເມື່ອເລົ່າເຖິງ
ຄວາມເປັນຫ່ວງດ້ານສິດທິມະນຸດ ທ່ານນາງຄລິນຕັນກ່າວວ່າ ສອງປະເທດມະຫາອຳນາດ
ຈະບໍ່ຕົກລົງເຫັນດີນຳກັນໃນທຸກໆເລື້ອງ ແຕ່ຈະທຳການໂອ້ລົມສົນທະນາກັນຢ່າງເປີດເຜີຍ.
ທ່ານຫູຈິນເຖົາ ປະທານປະເທດຈີນ ກ່າວໃນຕອນເປີດພິທີທຳການພົບປະກັນດ້ານການ
ເມືອງແລະເສດຖະກິດວ່າ ສອງປະເທດມະຫາອຳນາດໃນໂລກຈະຕ້ອງສົ່ງເສີມການ
ປະສານງານກັນໃນນະໂຍບາຍດ້ານເສດຖະກິດນັ້ນ ແຕ່ເຖິງຢ່າງໃດກໍດີ ທ່ານຫູຈິນເຖົາ
ກ່າວຕື່ມວ່າຈີນຈະສືບຕໍ່ປະຕິຮູບອັດຕາການແລກປ່ຽນເງິນຕາຂອງຕົນຕາມຈັງຫວະຂອງ
ຕົນເອງ.
