ອົງການຂ່າວທາງການຂອງຈີນ ໃນວັນພຸດມື້ນີ້ໄດ້ກ່າວຍ້ອງຍໍກະຊວງ ການເງິນຂອງສະຫະລັດທີ່ບໍ່ຍອມລະບຸຊື່ກຸງປັກກິງວ່າ ເປັນຜູ້ຄວບຄຸມເງິນຕາ ໂດຍກ່າວວ່າ ມັນເຖິງເວລາທີ່ຈະກ້າວໄປສູ່ອັນທີ່ຕົນເອີ້ນວ່າ ການຜິດຖຽງທີ່ໄຮ້ປະໂຫຍດ ໄຮ້ຄວາມໝາຍກ່ຽວກັບຄ່າຂອງເງີນຢວນຂອງຈີນນັ້ນ.
ເຖິງຢ່າງໃດກໍດີ ກະຊວງການເງິນສະຫະລັດໃນວັນອັງຄານວານນີ້ກ່າວວ່າ ຄ່າຂອງເງິນຢວນຍັງມີລາຄາຕໍ່າຢ່າງຫລວງຫລາຍ ແຕ່ບໍ່ຍອມບົ່ງວ່າ ຈີນເປັນຜູ້ຄວບຄຸມເງິນຕາ ຊຶ່ງສາມາດນໍາພາໃຫ້ມີການ ເຄື່ອນໄຫວລົງໂທດໂດຍພວກສະມາຊິກສະພານິຕິບັນຍັດຂອງສະຫະລັດນັ້ນ.
ອົງການຂ່າວຊິນຫົວທາງການຈີນກ່າວຢູ່ໃນບົດວິຈານໃນວັນພຸດມື້ນີ້ວ່າ ການເຄື່ອນໄຫວດັ່ງກ່າວໄດ້ເປັນສັນຍານໃນທາງບວກອັນນຶ່ງ ທີ່ຈະຊ່ອຍບັນເທົາພວກຕະຫລາດ ແລະເປັນຜົນປະໂຫຍດແກ່ການຄ້າ.
ບັນດາເຈົ້າໜ້າທີ່ສະຫະລັດໄດ້ທໍາການກ່າວຫາຈີນມາເປັນເວລາດົນນານວ່າຮັກສາຄ່າເງິນຢວນຂອງຕົນຢູ່ໃນລະດັບຕໍ່າເກີນໄປ ເພື່ອຢາກເຮັດໃຫ້ລາຄາສິນຄ້າສົ່ງອອກຂອງຕົນຢູ່ໃນລາຄາຖືກກວ່າສິນຄ້າສົ່ງອອກໃນປະເພດດຽວກັນທີ່ຜະລິດຢູ່ໃນສະຫະລັດນັ້ນ.
