ລັດຖະມົນຕີການຕ່າງປະເທດສະຫະລັດ ທ່ານນາງ Hillary
Clinton ເວົ້າວ່າ ສະຫະລັດ ແລະຈີນກຳລັງມາຮອດທາງ
ແຍກທີ່ສຳຄັນ ໂດຍການມີສາຍພົວພັນທີ່ມີການຂີດໝາຍ
ເຕັມໄປດ້ວຍຄວາມໝາຍໝັ້ນອັນຍິ່ງໃຫຍ່ ແລະກໍທັງມີ
ຄວາມເຫັນບໍ່ລົງລອຍກັນທີ່ສຳຄັນໃນຫລາຍໆ ດ້ານ.
ຢູ່ໃນຄຳປາໃສຕອນນຶ່ງທີ່ທ່ານນາງກ່າວຢູ່ກະຊວງການຕ່າງ
ປະເທດສະຫະລັດໃນວັນສຸກວານນີ້ ທ່ານນາງ Clinton
ເວົ້າວ່າ ວໍຊິງຕັນມີເຈດຈຳນົງທີ່ຈະຮັກສາສາຍພົວພັນທີ່
“ເປັນໄປໃນທາງບວກ, ມີການຮ່ວມມືກັນ ແລະຮອບດ້ານ”
ກັບຈີນ. ເພື່ອໃຫ້ບັນລຸ ຄວາມມຸ້ງຫວັງນັ້ນ ທັງສອງຝ່າຍ
ຕ້ອງໄດ້ຮັບຮູ້ເຖິງການມີຄວາມເຫັນແຕກຕ່າງກັນຢ່າງກົງ
ໄປກົງມາ. ທ່ານນາງເວົ້າວ່າ ຄວາມບໍ່ໄວ້ວາງໃຈກັນ ແມ່ນ
ໄດ້ມີມາເປັນເວລາດົນນານຂອງທັງສອງຝ່າຍ.
ຄຳປາໃສດັ່ງກ່າວນີ້ຂອງທ່ານນາງ ໄດ້ມີຂຶ້ນກ່ອນໜ້າທີ່ ປະທານປະເທດຈີນ, ທ່ານ Hu Jintao ເດີນທາງມາຢ້ຽມຢາມສະຫະລັດໃນອາທິດໜ້າຕາມແຜນການທີ່ໄດ້ວາງໄວ້.
ທ່ານນາງ Clinton ເວົ້າວ່າສະຫະລັດຈະສືບຕໍ່ກົດດັນຈີນໃນເລື້ອງສິດທິມະນຸດ, ແລະກໍຈະສະແດງຄວາມເຫັນເມື່ອໃດລັດຖະບານປັກກິ່ງຫາກຫ້າມບໍ່ໃຫ້ມີການສວດມົນຂອງພວກນັບຖືສາດສະໜາຕ່າງໆ, ມີການກວດກາການໃຫ້ຄຳເຫັນຕ່າງໆຂອງປະຊາຊົນ ແລະຈັບກຸມພວກທີ່ຄັດຄ້ານລັດຖະບານ. ທ່ານນາງເວົ້າໂດຍສະເພາະເຈາະຈົງເຖິງ ທ່ານ Liu Xiaobo ຜູ້ໄດ້ຮັບລາງວັນໂນແບລຂະແໜງສັນຕິພາບທີ່ກຳລັງຖືກຈຳຄຸກຢູ່ນັ້ນ.
ນອກນັ້ນແລ້ວ ທ່ານນາງຍັງໄດ້ເວົ້າວ່າ ຈີນຕ້ອງຢຸດເຊົາການໃຊ້ນະໂຍບາຍເສດຖະກິດ ທີ່
ມີການຈຳແນກກີດກັນຕໍ່ທຸລະກິດຂອງສະຫະລັດ ແລະຂອງຕ່າງປະເທດອື່ນໆນັ້ນ. ສະຫະ
ລັດໄດ້ຕິຕຽນຈີນທີ່ໄດ້ທຳການຄຸ້ມຄອງອັດຕາແລກປ່ຽນເງິນຕາຂອງຕົນແບບບໍ່ຍຸດຕິທຳເພື່ອ
ໃຫ້ບໍລິສັດຈີນໄດ້ປຽບນັ້ນ.
