ລິ້ງ ສຳຫລັບເຂົ້າຫາ

ສະຫະລັດ ຊອກຫາ ການສະໜັບສະໜຸນ ຈາກຈີນ ໃນການລົງໂທດຕໍ່ອີຣ່ານ

  • ສິງ ບູຣົມມະວົງ

ທ່ານ Timothy Geithner ລັດຖະມົນຕີການເງິນສະຫະລັດ ຈັບມືກັບ ທ່ານ Xi Jinping ຮອງປະທານປະເທດຈີນ. ວັນທີ 11 ມັງກອນ 2012.





















ທ່ານ Timothy Geithner ລັດຖະມົນຕີ​ການ​ເງິນຂອງສະຫະລັດໄດ້​ ​ພົບ​ປະກັນ​ກັບ​ພວກ​ເຈົ້າ​ໜ້າ​ທີ່​ຈີນ​ ທີ່​ກຸງ​ປັກ​ກີ່ງ​ໃນ​ວັນ​ພຸດ​ມື້​ນີ້ ​ເພື່ອ​ທໍາ​ການ​ໂອ້​ລົມ​ສົນທະນາ​ກັນ​ ​ທີ່ຄາດ​ວ່າຈະ​ເພ່ງ​ເລັງ​ໃສ່ສາຍພົວພັນ​ທາງ​ເສດຖະກິດ​ທີ່​ດີ​ຂຶ້ນ ​ແລະ​ການ​ລົງ​ໂທດ​ຂອງ​ສະຫະລັດ​ຕໍ່ໂຄງການ​ນີວ​ເຄລຍຂອງ​ອີຣ່ານນັ້ນ.

ໃນ​ລະຫວ່າງ​ການ​ພົບ​ປະກັນ​ກັບ​ຮອງ​ປະ​ທານ​ປະ​ເທດ​ຈີນ ທ່ານ Xi Jinping ນັ້ນ ທ່ານ Geithner ກ່າວ​ວ່າ ທ່ານ​ຫວັງ​ວ່າ​ຈະ​ສ້າງຄວາມ ສໍາພັນ​ໃນ​ການ​ຮ່ວມ​ໄມ້​ຮ່ວມມື​ກັນ ​ໃຫ້​ເຂັ້ມ​ແຂງ​ທີ່​ສຸດ ກັບ​ຈີນ​ກ່ຽວ​ກັບ​ການ​ເຕີບ​ໂຕ​ທາງ​ດ້ານ​ເສດຖະກິດ​ຂອງ​ໂລກ ​ແລະ​ການ​ຫ້າມ​ແຜ່ຜາຍ​ອາວຸດ​ນີວ​ເຄລຍນັ້ນ.

ໜັງສືພິມ​ຊິນ​ຫົວ​ຂອງທາງ​ການ​ຈີນ​ກ່າວ​ວ່າ ສອງ​ຝ່າຍ​ໄດ້​ໃຫ້​ຄໍາ​ໝັ້ນ​ສັນຍາທີ່​ຈະ​ເພີ່ມການ​ຮ່ວມ​ມື​ກັນ​ໃນ​ວັນ​ອັງຄານ​ວານ​ນີ້​ກ່ຽວ​ກັບ​ການ​ເລັ່ງລັດ​ການ​ຟື້ນ​ໂຕ​ຄືນຂອງ​ສະພາບ​ເສດຖະກິດ​ໂລກ ​ທີ່​ກໍາລັງ​ຢູ່​ໃນ​ສະພາບ​ສະ​ລັບ​ຊັບຊ້ອນ​ແລະເຄັ່ງ​ຄຽດຢ່າງ​ຮ້າຍ​ແຮງໃນ​ເວລາ​ນີ້.

ແຕ່​ພາລະກິດ​ທີ່​ສໍາຄັນ​ຂອງທ່ານ Geithner ​ແມ່ນ​ເກ້​ຍກ່ອມ​ໃຫ້​ຈີນ​ເຫັນ​ພ້ອມ​ກັບ​ການ​ລົງ​ໂທດ​ຂອງ​ສະຫະລັດ ​ຕໍ່ວົງ​ການ​ອຸດສາຫະກໍາ​ນໍ້າມັນ​ຂອງ​ອີຣ່ານນັ້ນ. ແຕ່​ຄວາມ​ຄືບ​ໜ້າ​ກ່ຽວ​ກັບ​ເລື້ອງ​ນີ້ ປາກົດ​ວ່າຈະ​ບໍ່​ເກີດ​ຂຶ້ນ ​ເນື່ອງ​ຈາກຈີນ​ຊື້​ນໍ້າມັນ​ໃນ​ປະລິມານ​ເກືອບ 1 ສ່ວນ 3 ຂອງ​ນໍ້າມັນ​ທັງ​ໝົດ​ທີ່​ອີຣ່ານສົ່ງ​ອອກ​ຂາຍ​ໃນ​ຕ່າງປະ​ເທດ​ນັ້ນ ​ແລະ​ຈີນ​ກໍ​ໄດ້​ທໍາ​ການ​ຄັດຄ້ານ​ຊໍ້າ​ແລ້ວ​ຊໍ້າ​ອີກ ຕໍ່ການ​ລົງ​ໂທ​ດຕໍ່​ອີຣ່ານ ​ໃນ​ຖານະເປັນ​ເຄື່ອງມື​ເພື່ອ​ຍັບ​ຍັ້ງໂຄງການ​ນີວ​ເຄລຍຂອງ​ອີຣ່ານນັ້ນ.

ທ່ານ Geithner ​ຍັງ​ໄດ້​ທໍາ​ການ​ພົບ​ປະ​ກັບທ່ານ​ເວີນ​ ເຈ​ຍປາວ ນາຍົກລັດຖະມົນຕີຈີນ ​ແລະ​ເຈົ້າ​ໜ້າ​ທີ່​ຈີນ​ຄົນ​ອື່ນໆອີກໃນ​ວັນ​ພຸດ​ມື້​ນີ້

ແລະ​ຄາດ​ວ່າ​ທ່ານຈະອອກ​ເດີນທາງ ໃນ​ຕອນ​ບ່າຍມື້​ນີ້ ​ຕໍ່​ໄປ​ຍັງ​ຍີ່ປຸ່ນ ຊື່​ງ​ເປັນ​ອີກປະເທດ​ນຶ່ງທີ່ໃຊ້ນໍ້າມັນ​ຂອງ​ອີຣ່ານຫລາຍ​ເຊ່ນ​ກັນ.

XS
SM
MD
LG