ຜູ້ຊາຍເຢເມນຄົນນຶ່ງ ຢູ່ໃນນະຄອນ New York ໄດ້ຖືກກ່າວຫາໃນວັນຈັນວານນີ້ວ່າ ພະຍາຍາມທີ່ຈະໃຫ້ການສະໜັບສະໜູນແກ່ກຸ່ມລັດອິສລາມ.
ສຳນວນຟ້ອງທີ່ໄດ້ຖືກເປີດເຜີຍຢູ່ທີ່ສານລັດຖະບານກາງ ໄດ້ໃຫ້ລາຍລະອຽດກ່ຽວກັບ ການກ່າວຫາຕໍ່ທ້າວ Mohamed Rafik Naji ອາຍຸ 37 ປີ ຮວມທັງສະແດງອອກ ທີ່ໃຫ້ເຫັນການສະໜັບສະໜູນ ຕໍ່ການໂຈມຕີຢູ່ຈະຕຸລັດ Times Square ໃນນະຄອນ New York ທີ່ຄ້າຍຄືກັນກັບການອ້າງເອົາຄວາມຮັບຜິດ ຊອບຂອງກຸ່ມລັດອິສລາມ ຢູ່ທີ່ເມືອງ Nice ໃນປະເທດຝຣັ່ງ.
ໄດ້ມີການອ້າງຄຳເວົ້າ ຂອງທ້າວ Naji ທີ່ໄດ້ກ່າວຕໍ່ພວກສາຍລັບຢູ່ໃນນຶ່ງຂອງ ການບັນ ທຶກສຽງການສົນທະນາວ່າ “ຂ້ອຍໄດ້ເວົ້າວ່າຖ້າຫາກມີລົດຂົນສົ່ງ ຂ້ອຍໝາຍຄວາມວ່າລົດແກ່ຂີ້ເຫຍື້ອ ແລະໃຫ້ຜູ້ນຶ່ງຂັບເຂົ້າໄປຈະຕຸລັດ Times Square ແລະແລ່ນເຂົ້າຢຽບຜູ້ຄົນ. ເຂົາເຈົ້າຕ້ອງການຢາກໃຫ້ມີການປະຕິບັດງານຢູ່ທີ່ຈະຕຸລັດ Times Square ກຸ່ມສຳຫຼວດໄດ້ວາງແຜນໄວ້ແລ້ວ ກຸ່ມລັດອິສລາມໄດ້ວາງແຜນໃສ່ຈະຕຸລັດ Times Square.”
ບັນດາໄອຍະການກ່າວວ່າ ຄະດີຕໍ່ທ້າວ Naji ແມ່ນຮວມທັງການລົງຂ່າວຢູ່ໜ້າ Facebook ທີ່ສະແດງໃຫ້ເຫັນເຖິງການສະໜັບສະໜູນຕໍ່ລັດອິສລາມ ຊຶ່ງນຶ່ງໃນນັ້ນກໍແມ່ນວີດີໂອທາງ YouTube ທີ່ໂຄສົກກຸ່ມຫົວຮຸນແຮງ ຮຽກຮ້ອງໃຫ້ທຳການໂຈມຕີຕໍ່ເປົ້າ
ໝາຍ ພົນລະເຮືອນແລະເປົ້າໝາຍທາງທະຫານຢູ່ໃນບັນດາປະ ເທດຕາເວັນຕົກ.
ສຳນວນຟ້ອງກ່າວວ່າ ທ້າວ Naji ໄດ້ເດີນທາງໄປເທີກີ ແລະເຢເມນ ໃນຄວາມພະຍາຍາມໄປເຖິງເຂດຄວບຄຸມຂອງກຸ່ມລັດອິສລາມແລະແຟນຂອງລາວສົ່ງເງິນໄປໃຫ້ລາວຢູ່ໃນເຢເມນຫລາຍຄັ້ງ. ເອກກະສານກ່າວວ່າ ສາຍລັບໄດ້ເລີ້ມຕິດຕໍ່ທາງ Facebook ມາແຕ່ເດືອນສິງຫາ ປີ 2015 ແລະທັງສອງຄົນໄດ້ພົບພໍ້ກັນດ້ວຍຕົນເອງໃນເດືອນທັນວາປີກາຍນີ້ ແລະອີກເທື່ອນຶ່ງ ໃນເດືອນກໍລະກົດ ປີ 2016.
