ກະຊວງຍຸຕິທຳ ສະຫະລັດ ເປີດເຜີຍໃນວັນສຸກທີ່ຜ່ານມານີ້ວ່າ ລັດຖະບານອາເມຣິກາໄດ້ຕັ້ງຂໍ້ຫາຊາວອີຣ່ານທີ່ພົວພັນກັບແຜນການທີ່ສົງໄສວ່າ ມາຈາກກອງທັບອີຣ່ານ ກັບຄວາມພະຍາຍາມທີ່ຈະລອບສັງຫານວ່າທີ່ປະທານາທິບໍດີສະຫະລັດ ທ່ານ ດໍໂນລ ທຣໍາ.
ກະຊວງຍຸຕິທຳກ່າວໃນຖະແຫຼງການວ່າ ຜູ້ຊາຍຊື່ ຟາຮາດ ຊາເກີຣີ (Farhad Shakeri), ຜູ້ໄດ້ຮັບຄຳສັ່ງຈາກກອງກຳລັງປ້ອງກັນປະຕິວັດ ຫຼື IRGC ຂອງອີ່ຣ່ານ ໄດ້ບອກບັນດາເຈົ້າໜ້າທີ່ດ້ານກົດໝາຍວ່າ ລາວໄດ້ຮັບໜ້າທີ່ໃນການວາງແຜນລອບສັງຫານ ທ່ານ ທຣໍາ ເມື່ອວັນທີ 7 ຕຸລາ ທີ່ຜ່ານມານີ້.
ກະຊວງດັ່ງກ່າວລະບຸວ່າ ທ້າວ ຊາເກີຣີ ເຮັດວຽກໃຫ້ໜ່ວຍງານ IRGC ແລະອາໄສຢູ່ໃນນະຄອນຫຼວງເຕຫະຣ່ານ, ເຊິ່ງລາວໄດ້ອົບພະຍົບມາຢູ່ ສະຫະລັດຕັ້ງແຕ່ລາວຍັງນ້ອຍ ແລະໄດ້ຖືກເນລະເທດອອກໄປເມື່ອປະມານ 16 ປີກ່ອນ ລຸນຫຼັງຖືກຕັດສິນມີຄວາມຜິດຈາກຄະດີປຸ້ນຈີ້, ແລະຕ້ອງຕິດຄຸກຢູ່ໃນສະຫະລັດ, ອີງຕາມການລາຍງານຂອງອົງການຂ່າວ Reuters.
ເຈົ້າໜ້າທີ່ກ່າວວ່າ ທ້າວ ຊາເກີຣີ ຍັງຄົງຮັກສາການພົວພັນກັບເຄືອຂ່າຍອາຊະຍາກອນທີ່ໄດ້ຮັບມອບໝາຍໃຫ້ດໍາເນີນວຽກງານຕ່າງໆໂດຍລັດຖະບານເຕຫະຣ່ານເຊັ່ນ ການສອດແນມ ແລະການວາງແຜນການຄາດຕະກໍາ.
ເມື່ອຖືກສອບສວນ ທ້າວ ຊາເກີີຣີ ກ່າວຕໍ່ເຈົ້າໜ້າທີ່ວ່າ ໃນເດືອນກັນຍາ, ໜ່ວຍງານ IRGC ໄດ້ສັ່ງໃຫ້ລາວຍຸຕິພາລະກິດອື່ນໆທັງຫມົດທີ່ມີຢູ່ ແລະຕ້ອງທໍາການວາງແຜນການໃຫ້ສໍາເລັດພາຍໃນ 7 ມື້ ເພື່ອທໍາການສອດແນມ ແລະສັງຫານ ທ່ານ ທຣໍາ, ອີງຕາມລາຍງານຂອງອົງການຂ່າວ AP ທີ່ອ້າງເຖິງເອກະສານກ່ຽວກັບຄະດີທີ່ເປີດເຜີຍຢູ່ໃນສານແມນຮັດຕັນ.
ເຈົ້າຫນ້າທີ່ໄດ້ອ້າງເຖິງຄໍາເວົ້າຂອງ ທ້າວ ຊາເກີີຣີ ທີ່ກ່າວວ່າ “ພວກເຮົາໄດ້ໃຊ້ເງິນໄປເປັນຈໍານວນຫຼາຍ” ແລະ “ເງິນບໍ່ແມ່ນຈຸດສໍາຄັນ.”
ລາວບອກກັບເຈົ້າໜ້າທີ່ສືບສວນວ່າ ຖ້າລາວບໍ່ສາມາດວາງແຜນສໍາເລັດພາຍໃນ 7 ມື້ ກໍສາມາດລໍຖ້າຫຼັງຈາກການເລືອກຕັ້ງ ເພື່ອເຊື່ອວ່າ ທ່ານ ທຣໍາ ອາດຈະສູນເສຍການເລືອກຕັ້ງປະທານາທິບໍດີສະຫະລັດ, ແລະອາດຈະງຖືກສັງຫານງ່າຍກວ່າຖ້າສະຖານະການຫາກອອກມາດັ່ງນັ້ນ.
ຟໍຣັມສະແດງຄວາມຄິດເຫັນ