ສະຫະລັດຕັ້ງຂໍ້ກ່າວຫາຕໍ່ນັກສືບຈີນວ່າ ພະຍາຍາມລັກເອົາຄວາມລັບທາງການຄ້າຂອງ
ບໍລິສັດການບິນ ແລະອະວະກາດທີ່ນຳໜ້າຈຳນວນນຶ່ງຂອງຕົນ.
ກະຊວງຍຸຕິທຳຂອງສະຫະລັດປະກາດໃນວັນພຸດວານນີ້ວ່າ ທ້າວ ຢັນຈຸນ ຊູ ໄດ້ຖືກຈັບ
ໃນວັນທີ 1 ເມສາທີ່ຜ່ານມາໃນປະເທດແບລຢ້ຽມ ຊຶ່ງຫລັງຈາກນັ້ນ ໄດ້ສົ່ງຜູ້ກ່ຽວມາຍັງ
ສະຫະລັດໃນວັນອັງຄານຜ່ານມານີ້. ທ້າວຊູທີ່ໄປປາກົດຕົວ ຢູ່ໃນສານລັດຖະບານກາງ
ໃນເມືອງຊິນຊິນເນຕີ ໃນວັນພຸດວານນີ້ ຖືກຄະນະຕຸລາການຂອງລັດຖະບານກາງຟ້ອງ
ຮ້ອງຢູ່ໃນເມືອງທີ່ຢູ່ທາງໃຕ້ແຫ່ງດັ່ງກ່າວຂອງ ລັດໂອຮາຍໂອ.
ພວກນັກຊ່ຽວຊານເຊື່ອວ່າ ນີ້ເປັນເທື່ອທຳອິດ ທີ່ນັກສອດແນມຂອງລັດຖະບານຈີນໄດ້
ຖືກນຳມາດຳເນີນຄະດີໃນສະຫະລັດ.
“ການສົ່ງເຈົ້າໜ້າທີ່ສືບລັບຂອງຈີນຂ້າມແດນ ທີ່ບໍ່ເຄີຍມີມາກ່ອນນີ້ ໄດ້ເຜີຍໂສມໜ້າ
ການສືບລັບທາງເສດຖະກິດທີ່ມີການຄຸ້ມຄອງໂດຍກົງຂອງລັດຖະບານຈີນ,” ນັ້ນຄື
ຄຳເວົ້າຂອງທ່ານ ບີລ ປຣີແອສແທັບ ຜູ້ຊ່ວຍຫົວໜ້າ ພະແນກຕ້ານການສືບລັບຂອງ
ອົງການສັນຕິບານກາງ ຫລື FBI ສະຫະລັດ.
ກະຊວງຍຸຕິທຳເວົ້າວ່າ ທ້າວ ຊູ ແມ່ນເປັນສະມາຊິກລະດັບສູງຄົນນຶ່ງຂອງກະຊວງປ້ອງ
ກັນຄວາມໝັ້ນຄົງຂອງລັດຖະບານ ຊຶ່ງເປັນອົງການສືບລັບຂອງຈີນ ທີ່ມີສະມາຊິກທີ່
ໄດ້ຮັບອະນຸຍາດໃຫ້ທຳການສືບລັບຢູ່ໃນຈີນ ແລະໃນທົ່ວໂລກ.
ທ່ານ ຈອນ ເດເມີສ໌ ຜູ້ຊ່ວຍລັດຖະມົນຕີກະຊວງຍຸຕິທຳສະຫະລັດເວົ້າວ່າ ກໍລະນີນີ້ ບໍ່
ໄດ້ແມ່ນເຫດການທີ່ເກີດຂຶ້ນແບບໂດດດ່ຽວເລີຍ.
ທ່ານກ່າວວ່າ “ມັນເປັນສ່ວນນຶ່ງຂອງນະໂຍບາຍເສດຖະກິດໂດຍລວມເພື່ອພັດທະນາ
ຈີນໂດຍສວຍໃຊ້ຜົນປະໂຫຍດຈາກສະຫະລັດ. ພວກເຮົາບໍ່ປ່ອຍໃຫ້ປະເທດໃດ ລັກ
ເອົາຄວາມຮູ້ຄວາມສາມາດ ແລະ ໝາກຜົນຂອງສະໝອງ ຂອງພວກເຮົາ. ພວກເຮົາຈະ
ບໍ່ຍອມປ່ອຍໃຫ້ຊາດອື່ນ ມາສວຍເອົາໝາກຜົນທີ່ພວກເຂົາບໍ່ໄດ້ຫວ່ານແກ່ນມັນເລີຍ.”
ອີງຕາມຂໍ້ກ່າວຫາດັ່ງກ່າວ, ໃນປີ 2017 ທ້າວ ຊູ ໄດ້ເກນເອົາພວກນັກຊ່ຽວຊານທີ່ເຮັດ
ວຽກໃຫ້ບໍລິສັດອະວະກາດ ທີ່ຢູ່ໃນ ແລະຢູ່ນອກສະຫະລັດ ໃຫ້ເດີນທາງໄປຍັງຈີນ ໃນ
ລັກສະນະທີ່ເປັນຄືວ່າໄປທຳການປະຖະກະຖາຢູ່ໃນມະຫາວິທະຍາໄລຕ່າງໆ. ຈີນຈ່າຍ
ຄ່າເດີນທາງ ແລະຈ່າຍຄ່າທຳນຽມໃຫ້ພວກນັກ ຊ່ຽວຊານເຫຼົ່ານີ້.
ອີງຕາມໜັງສືພິມວໍຊິງຕັນພໂພສທ໌, ນັກສືບຂອງສະຫະລັດ ໄດ້ຫລອກໃຫ້ທ້າວ ຊູ ເດີນ
ທາງໄປແບລຢ້ຽມ ບ່ອນທີ່ລາວຖືກຈັບ. ໂດຍອ້າງອີງໃສ່ຄຳຟ້ອງຮ້ອງຂອງອົງການ FBI
ໜັງສືພິມດັ່ງກ່າວເວົ້າວ່າ ທ້າວຊູພະຍາຍາມທີ່ຈະເກ້ຍກ່ອມ ໃຫ້ນັກຊ່ຽວຊານຄົນນຶ່ງເອົາ
ເອກະສານຂອງບໍລິສັດທີ່ຊ່ຽວຊານຄົນນັ້ນຖືໄປນຳໃຫ້ລາວ ໂດຍເປັນສ່ວນນຶ່ງຂອງການ
ໄປປະຖະກະຖາຢູ່ໃນມະຫາວິທະຍາໄລຕາມແຜນທີ່ວາງໄວ້.