ອົງການສືບລັບສັນຕິບານກາງ ຫລື FBI ກຳລັງສືບສວນກ່ຽວ
ກັບການໂຈມຕີຕໍ່ບັນຊີ Twitter ແລະ Youtube ທີເປັນຂອງ
ກອງບັນຊາການທະຫານສະ ຫະລັດ ໃນເຂດພາກຕາເວັນ
ອອກກາງ ອາຟຣິກາເໜືອແລະເອເຊຍກາງ ຫລື CENTCOM
ທີ່ກຳກັບດູແລການໂຈມຕີທາງອາກາດພາຍໃຕ້ການນຳພາ
ຂອງ ສະຫະລັດ ໃສ່ກຸ່ມລັດອິສລາມ ຢູ່ໃນອີຣັກ ແລະຊິເຣຍ.
ພວກໂຈມຕີ ທີ່ກ່າວວ່າ ເຂົາເຈົ້າຈົງຮັກພັກດີຕໍ່ກຸ່ມລັດອິສລາມ
ໄດ້ເຂົ້າຢຶດເອົາ ບັນຊີທັງສອງຢ່າງຜິດກົດໝາຍເປັນເວລາລະ
ຍະສັ້ນໆ ໃນວັນຈັນວານນີ້ ໂດຍຂົ່ມຂູ່ທະຫານສະຫະລັດ
ດ້ວຍການສົ່ງຂໍ້ຄວາມວ່າ “ພວກເຮົາຈະມາ ເບິ່ງທາງຫລັງ
ຂອງພວກເຈົ້າ. ຈາກກຸ່ມ ISIS.”
ສ່ວນຂໍ້ຄວາມອື່ນໆ ແມ່ນຮວມທັງ ລິ້ງໄປຫາເອກກະສານຕ່າງໆ ທີ່ປາກົດວ່າບັນຈຸນຳ້ເບີ
ໂທລະສັບ ແລະອີແມລ ແລະທີ່ຢູ່ຂອງບັນດາເຈົ້າໜ້າທີ່ທະຫານສະ ຫະລັດຫລາຍສິບ
ຄົນ. ເຂົາເຈົ້າຍັງໄດ້ສະແດງອັນທີ່ປາກົດວ່າ ເປັນແຜນທີ່ໆມີການຮົ່ວໄຫລຂອງທະຫານ
ກ່ຽວກັບຈີນ ແລະເກົາຫລີເໜືອ.
CENTCOM ກ່່າວວ່າ ການປະຕິບັດງານທາງທະຫານຂອງຕົນບໍ່ໄດ້ຮັບຄວາມ ເສຍຫາຍ
ແລະພວມຊັ່ງຊາໃນຂັ້ນຕົ້ນເບິ່ງວ່າ ພວກໂຈມຕີບໍ່ໄດ້ເຂົ້າໄປເຖິງຂໍ້ມູນລັບໃດໆ.
ກອງບັນຊາການສະຫະລັດກ່າວວ່າ ຕົນເຫັນວ່າການໂຈມຕີດັ່ງກ່າວນີ້ແມ່ນເປັນ ກໍລະນີ
ການທຳລາຍຊັບສິນທາງຄອມພິວເຕີ.
ຢູ່ໃນຫລາຍກໍລະນີນັ້ນ ສິ່ງຕ່າງໆທີ່ພິມເຜີຍແຜ່ ໂດຍບັນຊີ Twitter ຂອງ CENTCOM
ປາກົດວ່າ ເປັນຂອງເດັກນ້ອຍ ຫລື ບໍ່ເຊື່ອມໂຍງກັນ ຮວມທັງຮູບແກະແຜ່ນນຶ່ງ ຢູ່ໃນຫ້ອງ
ການທີ່ບອກວ່າ “ພວກເຮົາຢູ່ໃນ ໜ່ວຍຄອມພິວເຕີ ຫຼື PC ຂອງທ່ານ” ແລະຮູບທີ່ບັນຈຸຂໍ້
ຂຽນວ່າ “ຂ້ອຍຮັກເຈົ້າ ຈາກກຸ່ມ ISIS.”
ການໂຈມຕີໃນວັນຈັນ ໄດ້ເກີດຂື້ນໃນຂະນະປະທານາທິບໍດີ Barack Obama ໄດ້ກ່າວ
ຄຳປາໄສກ່ຽວກັບການຂະຫຍາຍການຮັກສາຄວາມປອດໄພທາງອິນເຕີ ແນັດ. ໃນການ
ຖະແຫຼງຢູ່ທີ່ຄະນະກຳມາທິການ ການຄ້າລັດຖະບານກາງ ທ່ານ Obama ກ່່າວວ່າ ການ
ໂຈມຕີເຈາະຂໍ້ມູນ ແມ່ນເປັນການຂົ່ມຂູ່ໂດຍຕົງ ຕໍ່ຜູ້ບໍລິໂພກຊາວອາເມຣິກັນ.
