ລິ້ງ ສຳຫລັບເຂົ້າຫາ

ເຢເມນ ຈັບໂຕຜູ້ຕ້ອງສົງໄສ ສົ່ງລະເບີດໄປຍັງສະຫະລັດ

  • ສິງ ບູຣົມມະວົງ

ແມ່ຍິງຄົນນຶ່ງຍ່າງຜ່ານຫ້ອງການຂອງບໍລິວັດຂົນສົ່ງທາງອາກາດ UPS ທີ່ນະຄອນຫລວງ Sana'a, ປະເທດ Yemen, ວັນທີ 30 ຕຸລາ 2010

ບັນດາ​ເຈົ້າ​ໜ້າ​ທີ່​ເຢ​ເມນ ກ່າວໃຫ້​ຮູ້ໃນ​ຕອນ​ແລງ​ວັນ​ເສົາວານ​ນີ້​ວ່າ ພວກ​ເຂົາ​ເຈົ້າ​ໄດ້​ຈັບ​ກຸມ
ແມ່​ຂອງ​ນັກ​ສຶກສາ​ຍິງຄົນ​ນຶ່ງ​ ທີ່ໄດ້ຖືກ​ກັກ​ໂຕ​ໄວ້ແລ້ວ ໃນ​ຖານ​ມີ​ສ່ວນ​ພົວພັນກັບ​ການ​ສົ່ງ
ລະ​ເບີດ​ແຮງ​ສູງ 2 ລູກ​ໄປ​ທາງ​ເຮືອບິນ​ບັນທຸກ ​ສິນຄ້າ​ລໍາ​ນຶ່ງ​ ທີ່​ມຸ້ງ​ໜ້າ​ໄປ​ຍັງ​ສະຫະລັດ​ນັ້ນ.

ປະທານາທິບໍດີ Ali Abdullah Saleh ​ແຫ່ງ​ເຢ​ເມນ ໄດ້ກ່າວ​ໃຫ້​ຮູ້​ວ່າລູກ​ສາວ​ຂອງ​ແມ່ຍິງ​
ຄົນ​ນີ້ ​ໄດ້​ຖືກ​ຈັບ​ກຸມ​ດ້ວຍ​ການ​ຊ່ອຍ​ເຫລືອ​ຂອງຂ່າວ​ລັບ​ຈາກ​ບັນດາ​ເຈົ້າໜ້າ​ທີ່​ສະຫະລັດ​ ທີ່
ໄດ້ແຈ້ງໃຫ້​ທາງ​ເຢ​ເມນ ຊາບ​ວ່າ ຜູ້​ຕ້ອງ​ສົງໄສ​ຄົນ​ນີ້ ຊື່​ນາງ Hanan al Samawi ອາຍຸ
22 ປີ ເປັນ​ນັກ​ສຶກສາ​ມະຫາວິທະຍາ​ໄລ Sana’a ​ແລະ​ອາໄສ​ຢູ່​ໃນ​ຄຸ້ມນຶ່ງ​ທີ່​ທຸກ​ຈົນ​ທີ່​ສຸດ​ໃນ ​ນະຄອນຫລວງ Sana’a ນັ້ນ.

ທະນາຍ​ຄວາມ​ຂອງ​ນາງ​ເວົ້າ​ວ່າ ທາງ​ເຈົ້​າໜ້າ​ທີ່​ສາມາດ​ສືບ​ໄດ້​ວ່າ ນາງ​ເປັນ​ຜູ້​ສົ່ງ​ຫໍ່​ວັດຖຸ​
ລະ​ເບີດ​ເຫລົ່ານັ້ນຈາກ​ໃບ​ບິ​ລຈ່າຍ​ເງິນ​ຄ່າ​ສົ່ງ ​ແຕ່​ເຂົາ​ເຈົ້າ​ກ່າວ​ວ່າ ນາງ​ອາດ​ໄດ້​ຖືກ​ຫລອກ ໃຫ້​ເປັນ​ຄົນ​ສົ່ງ​ຫໍ່​ເຫລົ່າ​ນັ້ນ​ໄປ ​ກໍເປັນໄດ້.

ໄດ້​ມີ​ການ​ພົບ​ເຫັນ​ຫໍ່​ຂອງ​ເຫລົ່າ​ນັ້ນໃນ​ວັນ​ສຸກ​ຜ່ານ​ມາ ຢູ່​ສະໜາມ​ບິນ ​ໃນ​ປະ​ເທດ​ອັງກິດ
ແລະ​ສະຫະລັດ​ອາຣັບ​ເອມິ​ເຣດສ໌. ປ້າຍຢູ່​ເທິງຫໍ່ ບອກ​ວ່າ​ ສົ່ງ​ໄປ​ຍັງໂບດ​ຊາວ​ຍິວສອງ​ແຫ່ງ ​ທີ່​ນະຄອນ Chicago ລັດ ອິລລີ​ນອຍ​ສ໌.

ເຈົ້າ​ໜ້າ​ທີ່​ສະຫະລັດເວົ້າ​ວ່າ ​ແຜນການໂຈມ​ຕີ​ທີ່​ວ່າ​ນີ້ ​ແມ່ນ​ສໍ່ສະ​ແດງ​ຍີ່​ຫໍ້ຜົນງານຂອງ​ພວກ ອາລ ​ເກ​ອີ​ດາ.

XS
SM
MD
LG