ເຈົ້າໜ້າທີ່ການທູດອະວຸໂສທ່ານນຶ່ງຂອງສະຫະລັດ ໄດ້ໄປເຖິງມຽນມາແລ້ວ ໃນການ
ຢ້ຽມຢາມຢ່າງເປັນທາງການຄັ້ງທໍາອິດ ຫຼັງຈາກການເລືອກຕັ້ງໃນເດືອນແລ້ວນີ້ ແລະ
ການປ່ອຍຕົວຜູ້ນໍາພັກສັນນິບາດແຫ່ງຊາດເພື່ອປະຊາທິປະໄຕ ທ່ານນາງ ອອງຊານ
ຊູ ຈີ ອອກຈາກການກັກບໍລິເວນ.
ເຈົ້າທີ່ສະຖານທູດສະຫະລັດກ່າວວ່າ ທ່ານ Joseph Yun ຈະຢູ່ໃນມຽນມາ ຈົນເຖິງ
ວັນສຸກ ເພື່ອສົນທະນາຫາລືກັບເຈົ້າໜ້າທີ່ລັດຖະບານມຽນມາ. ຄາດວ່າ ເຈົ້າທີ່ກະຊວງ
ການຕ່າງປະເທດສະຫະລັດ ຈະໄດ້ພົບກັບທ່ານນາງ ອອງຊານ ຊູ ຈີ ຜູ້ສະໜັບສະໜູນ
ແລະຕໍ່ສູ້ເພື່ອປະຊາທິປະໄຕ ທີ່ໄດ້ຖືກກັກຂັງ ບໍ່ໃນຮູບໃດກໍຮູບນຶ່ງ ເປັນເວລາ 15 ປີ
ຂອງໄລຍະ 21 ປີທີ່ຜ່ານມາ.
ຄາດວ່າ ທ່ານ Yun ຈະສະແດງເຖິງຄວາມເປັນຫ່ວງຂອງສະຫະລັດຕໍ່ການເລືອກຕັ້ງ
ທົ່ວປະເທດຂອງມຽນມາໃນວັນທີ 7 ເດືອນພະຈິກ ທີ່ທາງພັກຝ່າຍຄ້ານໄດ້ຈົ່ມວ່າ
ພວກເຂົາເຈົ້າບໍ່ໄດ້ຮັບໂອກາດໃຫ້ເຂົ້າແຂ່ງຂັນຢ່າງຍຸຕິທໍາ.
ນັບຕັ້ງແຕ່ໄດ້ຖືກປ່ອຍຕົວ ທ່ານນາງອອງຊານ ຊູ ຈີ ກ່າວວ່າ ທ່ານນາງພໍໃຈນໍານະໂຍ
ບາຍຂອງສະຫະລັດ ໃນການພະຍາຍາມເຂົ້າພົວພັນໂອ້ລົມສົນທະນາ ກັບລັດຖະບານ
ທະຫານມຽນມານັ້ນ ຕາບໃດທີ່ທາງວໍຊິງຕັນຖືທ່າທີ ທີ່ຖືກຕ້ອງກັບສະພາບຕົວຈິງ.
ໃນວັນອັງຄາມມື້ນີ້ ທ່ານນາງ ອອງຊານ ຊູ ຈີ ໄດ້ສັ່ງລາກັບລູກຊາຍ ທ້າວ Kim Aris
ທີ່ໄປຢ້ຽມຢາມຈາກປະເທດອັງກິດ ຊຶ່ງຄັ້ງທໍາອິດທີ່ທ່ານນາງໄດ້ພົບລູກ ໃນຮອບ 10 ປີ.
