ເບິ່ງວີດີໂອ ພາສາລາວ:
ທ່ານນາງ Hillary Clinton ລັດຖະມົນຕີຕ່າງປະເທດສະຫະລັດໄດ້ປະກາດຂ່າວການງົດ
ຂໍ້ຫ້າມຫລາຍໆຢ່າງຕໍ່ມຽນມາໄວ້ຊົ່ວຄາວ ໃນດ້ານທີ່ກ່ຽວກັບການທໍາທຸລະກໍາດ້ານການ
ເງິນ ການລົງທຶນແລະການເຂົ້າເຖິງດ້ານສິນເຊື່ອຂອງສະຫະລັດນັ້ນ ຫລັງຈາກການພົບປະ
ກັບທ່ານ U Wunna Maung Lwin ລັດຖະມົນຕີຕ່າງປະເທດມຽນມາ ໃນອາທິດແລ້ວນີ້
ຢູ່ກະຊວງການຕ່າງປະເທດສະຫະລັດ ຊຶ່ງທ່ານນາງກ່າວໃນກອງປະຊຸມໃຫ້ສໍາພາດຂ່າວ
ຮ່ວມກັນວ່າ:
"ນີ້ເປັນຊ່ວງທີ່ພວກເຮົາຄວນຈະຮັບຮູ້ວ່າ ຄວາມກ້າວໜ້າທີ່ໄດ້ເກີດຂື້ນໃນຮອບປີ
ຜ່ານມາ ໃນການຫັນປ່ຽນໄປສູ່ປະຊາທິປະໄຕ ແລະການສ້າງຄວາມປອງດອງຊາດ
ນັ້ນ ແມ່ນຈະຕ່າວປິ້ນຄືນອີກບໍ່ໄດ້ແລ້ວ ດັ່ງທີ່ທ່ານລັດຖະມົນຕີຕ່າງປະເທດໄດ້ເວົ້າ
ກັບຂ້າພະເຈົ້າ. ສະຫະລັດຢາກເຮັດທຸກສິ່ງທຸກຢ່າງເທົ່າທີ່ສາມາດເຮັດໄດ້ ເພື່ອໃຫ້
ແນ່ໃຈວ່າມັນເປັນຄວາມຈິງຂຶ້ນມາ."
ທ່ານນາງລັດຖະມົນຕີຄລິນຕັນ ໄດ້ຊົມເຊີຍການເລືອກຕັ້ງຜູ້ແທນໃນມຽນມາ ທີ່ໃນທີ່ສຸດ
ກໍໄດ້ນໍາເອົາພັກຝ່າຍຄ້ານຂອງທ່ານນາງອອງຊານ ຊູຈີ ເຂົ້າໄປນັ່ງຢູ່ໃນສະພາແຫ່ງຊາດນັ້ນ
ແຕ່ກໍກ່າວວ່າ ມາດຕະການບາງຢ່າງຂອງສະຫະລັດ ເຊັ່ນການຫ້າມຂາຍອາວຸດນັ້ນ ຈະຍັງ
ຄົງມີຜົນບັງຄັບໃຊ້ຕໍ່ໄປຢູ່ ໄປຈົນກວ່າວ່າການປະຕິຮູບດ້ານຕ່າງໆຂອງມຽນມາ ສໍາເລັດລຸ
ລ່ວງລົງ.
ໃນການຖະແຫລງຜ່ານທາງຜ່ານ Skype ຕໍ່ກອງປະຊຸມນຶ່ງທີ່ອະດີດປະທານາທິບໍດີ
George W. Bush ເປັນເຈົ້າພາບຈັດຂຶ້ນນັ້ນ ທ່ານນາງ ອອງ ຊານ ຊູຈີ ກ່າວວ່າ ການໂຈະ
ການລົງໂທດຕໍ່ມຽນມາໄວ້ຊົ່ວຄາວກ່ອນ ແທນທີ່ຈະຍົກເລີກໂດຍເຕັມນັ້ນ ແມ່ນຈະຮັກສາ
ການກົດດັນຕໍ່ຝ່າຍທະຫານໄວ້ ເພື່ອໃຫ້ເຂົາເຈົ້າຍຶດໝັ້ນຢູ່ໃນແນວທາງ ການປະຕິຮູບດ້ານ
ການເມືອງຕໍ່ໄປ. ທ່ານນາງກ່າວຕໍ່ໄປວ່າ:
"ບາງຄັ້ງຂ້າພະເຈົ້າກໍຄິດວ່າ ປະຊາຊົນພາກັນມອງໃນແງ່ດີຫລາຍເກີນໄປ ກ່ຽວກັບ
ສະພາບການໃນມຽນມານັ້ນ. ພວກເຮົາຕ້ອງຈື່ຈໍາວ່າ ການດໍາເນີນການໄປສູ່ປະຊາ
ທິປະໄຕນັ້ນ ບໍ່ແມ່ນວ່າ ຕ່າວປິ້ນບໍ່ໄດ້. ຂ້າພະເຈົ້າໄດ້ເວົ້າມາຢ່າງເປີດແປນແລ້ວວ່າ
ພວກເຮົາຈະມອງເບິ່ງວ່າ ມັນເປັນສິ່ງທີ່ຕ່າວປິ້ນຄືນໄດ້ ຈົນກວ່າເວລາໃດ ຝ່າຍທະ
ຫານໝາຍໝັ້ນຕົນເອງ ຕໍ່ການຫັນປ່ຽນໄປສູ່ປະຊາທິປະໄຕ ເສຍກ່ອນ."
ດ້ວຍຊັບພະຍາກອນທໍາມະຊາດທີ່ມີຢ່າງມະຫາສານນັ້ນ ມຽນມາແມ່ນພ້ອມທີ່ຈະຮອງຮັບ
ເອົາທຸລະກິດໃໝ່ໆ ແລະທ່ານນາງລັດຖະມົນຕີຄລິນຕັນ ກໍໄດ້ຮຽກຮ້ອງໃຫ້ບັນດານັກລົງທຶນ
ຂອງສະຫະລັດ ໄປສຶກສາສໍາຫລວດເບິ່ງໂອກາດອັນດີຕ່າງໆໃນທົ່ວປະເທດ ເພື່ອສ້າງຜົນ
ປະໂຫຍດໃຫ້ແກ່ຂົງເຂດຂອງພວກຊົນເຜົ່ານ້ອຍນັ້ນນໍາ. ທ່ານນາງກ່າວວ່າ:
"ມື້ນີ້ ພວກເຮົາຂໍເວົ້າຕໍ່ວົງການທຸລະກິດອາເມຣິກັນວ່າ ຈົ່ງພາກັນໄປລົງທຶນໃນມຽນມາ
ແລະໃຫ້ເຮັດຢ່າງມີຄວາມຮັບຜິດຊອບ. ຈົ່ງເປັນຕົວແທນແຫ່ງການປ່ຽນແປງໃນທາງບວກ."
ທ່ານນາງອອງຊານ ຊູຈີ ກ່າວວ່າ ການແຜ່ກະຈາຍການລົງທຶນຊຸດໃໝ່ຢ່າງເທົ່າທຽມກັນ
ຫລາຍຂຶ້ນນັ້ນ ແມ່ນຈະຊ່ວຍຜ່ອນເບົາຄວາມບໍ່ສະເໝີພາບໃນລະຫວ່າງບັນດາຊົນເຜົ່າຂອງ
ມຽນມາໄດ້.
ເບິ່ງວີດີໂອລາຍງານພາສາອັງກິດ:
ທີ່ສະຖາບັນ Brookings Institution ທີ່ວໍຊິງຕັນດີຊີ ທ່ານ Lex Rieffel ກ່າວວ່າ ການລົງ
ທຶນຫລາຍເກີນໄປແລະໄວວາເກີນໄປນັ້ນ ອາດຈະໜັກເກີນກ່ວາທີ່ມຽນມາຈະຮອງຮັບເອົາ
ໄດ້. ທ່ານກ່າວວ່າ:
"ເພື່ອໃຫ້ປະສົບຜົນສໍາເລັດ ເຮົາຈະຕ້ອງເຮັດຢ່າງລອບຄອບ ເພາະວ່າສິ່ງທີ່ເກີດຂື້ນຢູ່ໃນ
ປັດຈຸບັນນີ້ ກໍຄືວ່າມຽນມາກໍາລັງເຕັມໄປດ້ວຍນັກທ່ອງທ່ຽວ ກໍາລັງຫຼົງໄຫຼຕາຍໃຈນໍາ
ຄວາມຊື່ນຊົມ ຊຶ່ງນີ້ແມ່ນຈະເຮັດໃຫ້ລໍາບາກຫຼາຍຂຶ້ນ ສໍາລັບລັດຖະບານທີ່ຈະທໍາການ
ຕັດສິນໃຈດ້ານນະໂຍບາຍທີ່ດີໆໄດ້."
ບັນດານັກເຄຶ່ອນໄຫວມຽນມາບາງຄົນ ຢ້ານວ່າສະຫະລັດກໍາລັງເຄຶ່ອນໄຫວໄວເກີນໄປ.
ກຸ່ມສົນທະນາພາຍໃນສະພາສະມາຄົມອາຊ່ຽນກ່ຽວກັບມຽນມາ ໄດ້ຮຽກຮ້ອງໃຫ້ວໍຊິງຕັນ
ຈົ່ງຮັກສາການລົງໂທດດ້ານທຸລະກິດທັງໝົດຂອງຕົນນັ້ນໄວ້ຕໍ່ໄປສາກ່ອນ ໂດຍຕັກເຕືອນ
ວ່າ ການລົງທຶນຊຸດໃໝ່ຢ່າງລົ້ນເຫຼືອນັ້ນອາດສາມາດເປັນເຊື້ອໄຟ ກໍ່ໃຫ້ມີການຝ່າຝືນສິດທິ
ມະນຸດອອກໄປອີກ ແລະບ່ອນທໍາລາຍການປະຕິຮູບຕ່າງໆເພື່ອປະຊາທິປະໄຕນັ້ນໄດ້.