ສະຫະລັດໄດ້ຜ່ອນຜັນການລົງໂທດຕໍ່ມຽນມາ ເພື່ອອະນຸຍາດໃຫ້ພວກກຸ່ມຈັດຕັ້ງຂອງສະຫະລັດທີ່ບໍ່ຂື້ນກັບລັດຖະບານ ເຂົ້າໄປໃນປະເທດນັ້ນໄດ້ ເພື່ອເຮັດວຽກຊ່ວຍເຫລືອດ້ານມະນຸດສະທໍາແລະການພັດທະນາ.
ກະຊວງການເງິນສະຫະລັດປະກາດເມື່ອວັນອັງຄານວານນີ້ວ່າ ຕົນຈະ ອະນຸຍາດໃຫ້ມີການປະກອບກິດຈະກໍາຕ່າງໆທີ່ບໍ່ຫວັງຜົນກໍາໄລ ລະຫວ່າງ ຊາວອາເມຣິກັນແລະຊາວມຽນມາ ໃນຂະນະທີ່ປະເທດຊາດໃນຂົງເຂດເອເຊຍຕາເວັນອອກສຽງໃຕ້ແຫ່ງນີ້ ດໍາເນີນການປະຕິຮູບໄປສູ່ປະຊາທິປະໄຕ ຫລັງຈາກໄດ້ຢູ່ພາຍໃຕ້ການປົກຄອງຂອງທະຫານມາ ເປັນເວລາຫລາຍສິບປີ.
ການເຄື່ອນໄຫວດັ່ງກ່າວຂອງລັດຖະບານທ່ານໂອບາມາ ແມ່ນຕິດຕາມມາ ຫລັງຈາກທີ່ພັກຝ່າຍຄ້ານຂອງທ່ານນາງອອງຊານ ຊູຈີ ໄດ້ຮັບໄຊຊະນະຢ່າງຖ້ວມລົ້ນ ໃນການເລືອກຕັ້ງຄັ້ງພິເສດເມື່ອຕົ້ນເດືອນນີ້.
ລັດຖະບານໂອບາມາໄດ້ກ່າວມາແລ້ວວ່າ ຕົນຍັງມີແຜນການທີ່ຈະຜ່ອນຜັນຂໍ້ກັດຮັດແຄບຕ່າງໆລົງເທື່ອລະຂັ້ນໄປ ເພື່ອອະນຸຍາດໃຫ້ບາງບໍລິສັດອາເມຣິກັນໄປລົງທຶນຢູ່ໃນມຽນມາໄດ້ໃນທີ່ສຸດ ແລະໃຫ້ມີການສົ່ງອອກການບໍລິການດ້ານການເງິນນໍາ.
