ນັກການທູດຂັ້ນອາວຸໂສຂອງສະຫະລັດ 2 ທ່ານແລະສະມາຊິກສະພາຕໍ່າສະຫະລັດທ່ານ
ນຶ່ງ ຈະເດີນທາງໄປຢ້ຽມຢາມມຽນມາຄົນລະເທື່ອໃນສັບປະດາໜ້າ ເພື່ອຊຸກຍູ້ໃຫ້ລັດຖະ
ບານໃໝ່ມຽນມາດໍາເນີນໄປຕາມເສ້ນທາງການປະຕິຮູບຕໍ່ໄປ.
ສະມາຊິກສະພາຕໍ່າສະຫະລັດ Joe Crowley ຈະເດີນທາງຢ້ຽມຢາມມຽນມາເປັນເວລາ
2 ມື້ ໃນວັນທີ 12 ເດືອນນີ້ ເພື່ອທໍາການໂອ້ລົມສົນທະນາກັບບັນດາເຈົ້າໜ້າທີ່ລັດຖະ
ບານພ້ອມທັງພວກຜູ້ນໍາຊົນກຸ່ມນ້ອຍ ແລະທ່ານນາງອອງຊານຊູຈີ ຜູ້ນໍາຝ່າຍຄ້ານທີ່ສໍາ
ຄັນຂອງມຽນມາ. ຜ່ານມາ ທ່ານ Crowley ໄດ້ຮຽກຮ້ອງໃຫ້ລົງໂທດຢ່າງແຮງຂຶ້ນຕໍ່ພວກ
ອະດີດຜູ້ນໍາກອງທັບມຽນມາທີ່ທໍາການປາບປາມເສລີພາບແລະສິດທິມະນຸດນັ້ນ.
ທ່ານ Derek Mitchell ທີ່ເຄີຍຢ້ຽມຢາມມຽນມາມາຫລາຍເທື່ອນັບແຕ່ທ່ານໄດ້ຖືກແຕ່ງ
ຕັ້ງໃນເດືອນສິງຫາຜ່ານມາ ໃຫ້ເປັນທູດພິເສດກ່ຽວກັບມຽນມາ ຈະເດີນທາງໄປຍັງມຽນ
ມາໃນວັນຈັນມື້ອື່ນນີ້. ນອກຈາກທໍາການຢ້ຽມຢາມນະຄອນຫລວງ Naypiidaw ແລະນະ
ຄອນຢ້າງກຸ້ງ ເມືອງໃຫຍ່ທີ່ສຸດຂອງມຽນມາແລ້ວ ທ່ານ Mitchell ຍັງຈະເດີນທາງໄປຍັງ
ເມືອງ Bagan ເພື່ອໄປເບິ່ງໂຄງການການເງິນຂະໜາດນ້ອຍໆ ແລະວຽກການພັດທະນາ
ອື່ນໆ.
ນອກນີ້ ອອກເດີນທາງຢ້ຽມຢາມມຽນມາໃນວັນຈັນມື້ອື່ນນີ້ເຊ່ນກັນ ກໍຈະມີທ່ານ Luis
CdeBaca ທູດພິເສດວ່າດ້ວຍການຕໍ່ສູ້ຕ້ານການຄ້າມະນຸດຂອງກະຊວງການຕ່າງປະເທດ
ສະຫະລັດ ຊຶ່ງເປົ້າໝາຍຂອງການຢ້ຽມຢາມຂອງທ່ານ ແມ່ນເພື່ອທໍາການປະເມິນເບິ່ງ
ສະຖານະການດ້ານການຄ້າມະນຸດ ແລະຫາຊ່ອງທາງຕ່າງໆເພື່ອຊ່ອຍໃນຄວາມພະຍາຍາມ
ຂອງລັດຖະບານມຽນມາໃນການຕໍ່ສູ້ກັບການຄ້າມະນຸດນັ້ນ. ທີ່ນະຄອນຫລວງ Naypyidaw
ທ່ານ Luis CdeBaca ຈະຮ່ວມກັບທ່ານ Mitchell ໃນການໂອ້ລົມສົນທະນາກັນເລື້ອງ
ບາດກ້າວຕ່າງໆເພື່ອແກ້ໄຂບັນຫາການຄ້າປະເວນີຂ້າມຊາດ ແລະປັບປຸງສະພາບການດ້ານ
ແຮງງານໃຫ້ດີຂຶ້ນ.
ການຢ້ຽມຢາມຂອງບັນດາເຈົ້າໜ້າທີ່ສະຫະລັດ ໃນປະເທດໃນພາກພື້ນເອເຊຍຕາເວັນ
ອອກສຽງໃຕ້ແຫ່ງນີ້ ມີຂຶ້ນຫລັງຈາກການຢ້ຽມຢາມຂອງລັດຖະມົນຕີການຕ່າງປະເທດອັງ
ກິດ William Hague ທີ່ເສັດສິ້ນການຢ້ຽມຢາມຂອງທ່ານເປັນເວລາ 2 ມື້ໃນສັບປະດາ
ແລ້ວນີ້. ທ່ານ Hague ໄດ້ຮຽກຮ້ອງຊໍ້າແລ້ວຊໍ້າອີກ ໃຫ້ລັດຖະບານໃໝ່ມຽນມາ ຊຶ່ງຂຶ້ນກໍາ
ອໍານາດໃນເດືອນມີນາຜ່ານມາໃຫ້ປ່ອຍພວກນັກໂທດການເມືອງທັງໝົດທີ່ຍັງຖືກກັກຂັງຢູ່
ນັ້ນ. ໃນການຖະແຫລງຕໍ່ພວກນັກຂ່າວໃນວັນສຸກຜ່ານມານີ້ ທ່ານ Hague ກ່າວວ່າ ບໍ່ມີ
ເຫດຜົນໃດໆທີ່ຈະຊັກຊ້າກ່ຽວກັບເລື້ອງນີ້.
ເບິ່ງວີດີໂອກ່ຽວກັບການຢ້ຽມຢາມຂອງລັດຖະມົນຕີຕ່າງປະເທດອັງກິດ William Hague:
