ຜູ້ປະມູນຄົນນຶ່ງທີ່ບໍ່ບອກຊື່ໃຫ້ຊາບ ໄດ້ຕົກລົງທີ່ຈະຈ່າຍເງິນປະມານ 2 ລ້ານ 6 ແສນໂດລາ ສໍາລັບກິນເຂົ້າທ່ຽງຮ່ວມກັບທ່ານ Warren Buffet ມະຫາເສດຖີລົງທຶນອະເມລິກັນ.
ຄ່າປະມູນດັ່ງກ່າວ ຊຶ່ງມີຂຶ້ນໃນການປະມູນຫາເງິນເພື່ອການກຸສົນປະຈໍາປີຄັ້ງນີ້ ແມ່ນທໍາລາຍສະຖິຕິຂອງປີແລ້ວນີ້ ຫລາຍກວ່າ 100 ໂດລານ້ອຍນຶ່ງ. ເງິນປະມູນທີ່ວ່ານີ້ຈະນໍາໄປມອບໃຫ້ອົງການກຸສົນ Glide Foundation ຊຶ່ງໃຫ້ການບໍລິການທາງດ້ານສັງຄົມແກ່ພວກຄົນທຸກຍາກ ແລະບໍ່ມີບ່ອນພັກພາອາໄສໃນນະຄອນ San Francisco ລັດ California ທາງພາກຕາເວັນຕົກຂອງສະຫະລັດ.
ບໍ່ໄດ້ມີການເປີດເຜີຍຊື່ຂອງຜູ້ປະມູນໄດ້ນີ້ ໃຫ້ຊາບ.
ຕາມທໍາມະດານັ້ນ ຜູ້ທີ່ປະມູນໄດ້ ແມ່ນຈະໄດ້ກິນເຂົ້າທ່ຽງຮ່ວມກັບທ່ານ Warren Buffet ທີ່ຮ້ານອາຫານສະເຕັກ Smith & Wollensky ທີ່ນະຄອນນີວຢອກ ແລະມີສິດຖາມຫລືໂອ້ລົມກັບທ່ານໄດ້ຢ່າງເສລີໃນທຸກເລື້ອງ.
