ລິ້ງ ສຳຫລັບເຂົ້າຫາ

logo-print

ຜູ້ນໍາສະຫະລັດ ແລະອັງກິດ ພົບປະຫາລືກັນ (ວີດິໂອ)


ທ່ານ Barak Obama ປະທານາທິບໍດີສະຫະລັດ ແລະທ່ານ David Cameron, ນາຍົກລັດຖະມົນຕີອັງກິດ (ຊ້າຍ) ໃນກອງປະຊຸມສຸດຍອດຂອງອົງການເນໂຕ້ ທີ່ນະຄອນຊີຄາໂກ, ວັນທິ 21 ພືດສະພາ 2012.
ຄາດກັນວ່າ ປະທານາທິບໍດີສະຫະລັດ ທ່ານ Barak Obama
ແລະ ນາຍົກລັດຖະມົນຕີອັງກິດ ທ່ານ David Cameron
​ຈະເພັ່ງເລັງໃສ່​ເລື້ອງສະຖານະການໃນຊີເຣຍ ​ເວລາພວກທ່ານ
ພົບປະກັນໃນວັນຈັນມື້ນີ້ ຢູ່ນະຄອນຫລວງວໍຊິງຕັນ.

ການຢ້ຽມຢາມຂອງທ່ານ Cameron ແມ່ນມີຂຶ້ນລຸນຫລັງທີ່​ທ່ານ​
ໄດ້ພົບປະກັບ ປະທານາທິບໍດີຣັດ​ເຊຍ ທ່ານ Vladimir Putin
ໃນວັນສຸກຜ່ານມານີ້ ເພື່ອສົນ ທະນາຫາລືກັນກ່ຽວກັບການຫັນ
ປ່ຽນທາງການເມືອງ ເພື່ອຍຸຕິສົງຄາມໃນຊີເຣຍ.

ສະຫະລັດ ແລະຣັດ​ເຊຍຢາກຈັດຕັ້ງກອງປະຊຸມສາກົນຂຶ້ນ
ຢູ່ນະຄອນເຈນີວາ ເພື່ອກົດດັນ ​ໃຫ້ປະທານາທິບໍດີ Bashar al-Assad ແລະພວກກຸ່ມ
ທີ່ກໍາລັງຫາທາງເຮັດໃຫ້ການປົກຄອງຂອງທ່ານສິ້ນສຸດລົງນັ້ນ ເຂົ້າມາເຈລະຈາສັນຕິພາບ
ນໍາກັນ.

ຝ່າຍລັດຖະບານຊີເຣຍຍັງບໍ່ທັນໄດ້ໃຫ້ຄໍາຕອບຕໍ່ການຮ້ອງຂໍນັ້ນເທື່ອ ແລະກຸ່ມຝ່າຍຕໍ່
ຕ້ານໃຫຍ່ ກໍ​ໄດ້ຮຽກຮ້ອງວ່າ ຂໍ້ຕົກລົງໃດໆກໍຕາມ ຕ້ອງບໍ່ອະນຸຍາດໃຫ້ ທ່ານ Assad ຍັງດໍາລົງຕໍາແໜ່ງສືບຕໍ່ໄປ.

ພວກເຈົ້າໜ້າທີ່ທໍານຽບຂາວເວົ້າວ່າ ທ່ານ Obama ແລະທ່ານ Cameron ຍັງຈະສົນທະ
ນາກັນກ່ຽວກັບກອງປະຊຸມຂອງກຸ່ມ G8 ກໍ​ຄື​ກຸ່ມ 8 ປະເທດທີ່ ຮັ່ງມີສຸດຂອງໂລກ ທີ່​ຈະ​ຈັດ​ຂຶ້ນຢູ່ໃນໄອແລັນເໜືອ ໃນເດືອນໜ້ານີ້ ຕະຫລອດ​ທັງ​ເລື້ອງບັນຫາດ້ານການຄ້າ ແລະ
ຕ້ານຢັນຢາເສບຕິດ.

ພ້ອມກັນນັ້ນ ໃນວັນຈັນມື້ນີ້ ທ່ານ Cameron ຍັງຈະປະຊຸມກັບ​ເຈົ້າ​ໜ້າ​ທີ່​ອົງການສັນຕິ
ບານກາງສະຫະລັດ ຫລື FBI ແລ້ວກໍຈະເດີນທາງໄປຍັງນະຄອນບັອສຕັນ ເພື່ອຈະເບິ່ງ
ວ່າມີອັນໃດແດ່ ທີ່ອັງກິດຈະຖອດ​ຖອນ​ບົດຮຽນຈາກສະຫະລັດໄດ້ ໃນການຕອບໂຕ້ຕໍ່ເຫດ ການວາງລະເບີດຮ້າຍແຮງ ໃນເດືອນແລ້ວນີ້ ຢູ່ງານແຂ່ງຂັນແລ່ນທົນມາຣາທອນນັ້ນ.

ການຢ້ຽມຢາມເປັນເວລາສາມວັນຂອງທ່ານ Cameron ຈະສິ້ນສຸດລົງທີ່ນະຄອນນິວ
ຢອກ ບ່ອນທີ່ຄາດວ່າ ທ່ານຈະເຂົ້າຮ່ວມກັນສົນທະນາຫາລືກ່ຽວກັບເປົ້າໝາຍ​ໃໝ່ຂອງ
ການພັດທະນາຂອງໂລກ ຢູ່ທີ່ອົງການສະຫະປະຊາຊາດ.

ການເດີນທາງໃນຄັ້ງນີ້ ແມ່ນເປັນການຢ້ຽມຢາມສະຫະລັດຄັ້ງທໍາອິດຂອງທ່ານ Cameron
ນັບແຕ່ທ່ານໂອບາມາ ໄດ້ຖືກເລືອກຕັ້ງໃຫ້ດໍາລົງຕໍາແໜ່ງສະ​ໄໝ​ທີ່ສອງ ອີກ 4 ປີ ໃນປີ
ກາຍນີ້.

ເບິ່ງວີດິໂອກ່ຽວຂ້ອງ:

XS
SM
MD
LG