ໜັງສືພິມ Financial Times (FT) ໄດ້ລາຍງານວ່າ ສະຫະລັດ, ອັງກິດ ແລະ ອອສເຕຣເລຍ ກຽມເລີ່ມການເຈລະຈາກ່ຽວກັບການນຳເອົາສະມາຊິກໃໝ່ເຂົ້າມາໃນສົນທິສັນຍາຄວາມໝັ້ນຄົງອໍກັສ (AUKUS) ຂອງພວກເຂົາ ໃນຂະນະທີ່ວໍຊິງຕັນ ຊຸກຍູ້ໃຫ້ຍີ່ປຸ່ນເຂົ້າມາມີສ່ວນຮ່ວມ ໃນການຂັດຂວາງ ຈີນ, ອີງຕາມອົງການຂ່າວ ຣອຍເຕີສ໌.
ລັດຖະມົນຕີປ້ອງກັນປະເທດຂອງບັນດາປະເທດດັ່ງກ່າວ ຈະປະກາດການສົນທະນາ ໃນວັນຈັນມື້ນີ້ ກ່ຽວກັບ "ສອງເສົາຄໍ້າ" ຂອງສົນທິສັນຍາ, ເຊິ່ງກຳນົດໃຫ້ປະເທດສະມາຊິກ ຮ່ວມກັນພັດທະນາເທັກໂນໂລຈີ ໃນດ້ານການຄຳນວນຂອງຄອມພິວເຕີ້ ຫຼື quantum computing, ໃຕ້ທະເລ, ໄຮເປີໂຊນິກ ຫຼືໄວກວ່າສຽງ, ປັນຍາປະດິດ ແລະ ໄຊເບີ, ຫນັງສືພິມດັ່ງກ່າວ ໄດ້ລາຍງານໃນວັນເສົາຜ່ານມາ ໂດຍໄດ້ອ້າງເຖິງຜູ້ທີ່ຄຸ້ນເຄີຍກັບສະຖານະການດັ່ງກ່າວ.
ພວກເຂົາ ບໍ່ໄດ້ພິຈາລະນາທີ່ຈະຂະຫຍາຍເສົາຄ້ຳທຳອິດ ທີ່ຖືກອອກແບບມາເພື່ອສົ່ງເຮືອດຳນ້ຳໂຈມຕີພະລັງງານນິວເຄລຍໄປໃຫ້ອອສເຕຣເລຍ, ໜັງສືພິມ Financial Times ກ່າວ.
AUKUS ເຊິ່ງສ້າງຕັ້ງຂຶ້ນໂດຍທັງສາມປະເທດໃນປີ 2021 ແມ່ນເປັນສ່ວນຫນຶ່ງຂອງຄວາມພະຍາຍາມໃນການຕໍ່ຕ້ານການຂະຫຍາຍອຳນາດທີ່ເພີ້ມຂຶ້ນຂອງຈີນ ໃນພາກພື້ນອິນໂດປາຊີຟິກ. ຈີນໄດ້ເອີ້ນສົນທິສັນຍາ AUKUS ວ່າເປັນອັນຕະລາຍ ແລະໄດ້ເຕືອນວ່າ ມັນອາດຈະກະຕຸ້ນການແຂ່ງຂັນດ້ານອາວຸດໃນພາກພື້ນໄດ້.
ປະທານາທິບໍດີ ສະຫະລັດ ທ່ານ ໂຈ ໄບເດັນ ໄດ້ພະຍາຍາມຍົກລະດັບການຮ່ວມມືກັບພັນທະມິດຂອງສະຫະລັດ ໃນເອເຊຍ, ລວມທັງຍີ່ປຸ່ນ ແລະຟີລິບປິນ, ທ່າມກາງການເສີມສ້າງກຳລັງທາງທະຫານຄັ້ງປະຫວັດສາດຂອງຈີນ ແລະ ຄວາມກ້າສະແດງອອກຂອງຈີນ ໃນພາກພື້ນທີ່ນັບມື້ນັບເພີ່ມຂຶ້ນ.
ທ່ານ ຣາມ ເອັນມານູເອລ (Rahm Emanuel), ເອກອັກຄະລັດຖະທູດ ສະຫະລັດ ປະຈໍາ ນະຄອນຫຼວງໂຕກຽວ, ຂຽນໃນບົດສະແດງຄວາມເຫັນໃນໜັງສືພິມ Wall Street Journal ໃນວັນພຸດທີ່ຜ່ານມາວ່າ ຍີ່ປຸ່ນ “ກຳລັງຈະກາຍມາເປັນຄູ່ຮ່ວມມືທຳອິດ ໃນເສົາຄໍ້າທີ 2.”
ຟໍຣັມສະແດງຄວາມຄິດເຫັນ