ປະທານາທິບໍດີ ໂຈ ໄບເດັນ, ໃນວັນຈັນວານນີ້ ໄດ້ອອກຄຳສັ່ງຫ້າມບໍລິສັດຂຸດຄົ້ນເງິນ crypto ທີ່ໄດ້ຮັບການສະໜັບສະໜູນ ຈາກຈີນ ຈາກການເປັນເຈົ້າຂອງທີ່ດິນ ໃກ້ກັບຖານລູກສອນໄຟນິວເຄລຍ ໃນລັດ ໄວໂອມິງ (Wyoming), ອີງຕາມອົງການຂ່າວເອພີ.
ຄໍາສັ່ງດັ່ງກ່າວ ບັງຄັບໃຫ້ມີການຂາຍຊັບສິນທີ່ໃຊ້ໃນດໍາເນີນການເປັນສິ່ງອຳນວຍຄວາມສະດວກໃນການຂຸດຄົ້ນ crypto ໃກ້ກັບຖານທັບອາກາດ Francis E. Warren. ຄຳສັ່ງດັ່ງກ່າວ, ຍັງບັງຄັບໃຫ້ຖອນອຸປະກອນບາງຢ່າງທີ່ເປັນຂອງບໍລິສັດ MineOne Partners Ltd., ເຊິ່ງເປັນບໍລິສັດທີ່ລັດຖະບານຈີນ ເປັນເຈົ້າຂອງບາງສ່ວນ.
ສິ່ງນີ້ ແມ່ນເກີດຂຶ້ນໃນຂະນະທີ່ສະຫະລັດ ມີກໍານົດທີ່ຈະອອກອັດຕາພາສີໃຫມ່ທີ່ສໍາຄັນສໍາລັບຍານພາຫະນະໄຟຟ້າ, ຊີມີຄອນດັກເຕີ (semiconductors), ອຸປະກອນພະລັງງານແສງຕາເວັນ ແລະອຸປະກອນການແພດທີ່ນໍາເຂົ້າຈາກຈີນ ໃນວັນອັງຄານມື້ນີ້, ອີງຕາມການກ່າວຂອງເຈົ້າຫນ້າທີ່ສະຫະລັດ ແລະບຸກຄົນອື່ນທີ່ຄຸ້ນເຄີຍກັບແຜນດັ່ງກ່າວ.
ຄໍາສັ່ງຂາຍເງິນລົງທຶນດັ່ງກ່າວ ໄດ້ຖືກດໍາເນີນການໂດຍການປະສານງານກັບຄະນະກໍາມະການລົງທຶນຕ່າງປະເທດຂອງສະຫະລັດ ຢູ່ໃນສະຫະລັດ ຫຼື CFIUS, ເຊິ່ງເປັນໜ່ວຍງານທີ່ບໍ່ຄ່ອຍມີຄົນຮູ້ຈັກ ແຕ່ມີອິດທິພົນຂອງລັດຖະບານ ທີ່ໄດ້ຮັບມອບໝາຍໃຫ້ຮັບຜິດຊອບໃນການສືບສວນຂໍ້ຕົກລົງຂອງບໍລິສັດ ກ່ຽວກັບຄວາມກັງວົນດ້ານຄວາມໝັ້ນຄົງແຫ່ງຊາດ, ທີ່ມີອໍານາດບັງຄັບໃຫ້ບໍລິສັດມີການປ່ຽນແປງ.
ກົດໝາຍປີ 2018 ໄດ້ໃຫ້ສິດອຳນາດ CFIUS ໃນການກວດສອບທຸລະກຳອະສັງຫາລິມະຊັບໃກ້ກັບສະຖານທີ່ທີ່ລະອຽດອ່ອນໃນທົ່ວສະຫະລັດ, ລວມທັງຖານທັບອາກາດ F.E. Warren.
ຄໍາສັ່ງດັ່ງກ່າວ ແມ່ນບໍ່ຈະແຈ້ງກ່ຽວກັບຄວາມກັງວົນດ້ານຄວາມໝັ້ນຄົງແຫ່ງຊາດທີ່ສະເພາະເຈາະຈົງ, ໂດຍກະຊວງການເງິນກ່າວພຽງແຕ່ວ່າ ມີບັນຫາກັບ “ອຸປະກອນພິເສດ ແລະແຫຼ່ງທີ່ມາຈາກຕ່າງປະເທດທີ່ມີຄວາມສາມາດທີ່ຈະອໍານວຍຄວາມສະດວກໃນກິດຈະກໍາການສອດແນມ ແລະຈາລະກຳ” ທີ່ “ສະແດງໃຫ້ເຫັນຄວາມສ່ຽງດ້ານຄວາມໝັ້ນຄົງແຫ່ງຊາດທີ່ສໍາຄັນ.”
ຟໍຣັມສະແດງຄວາມຄິດເຫັນ