ທໍານຽບຂາວກ່າວວ່າ ນາຍໂອຊາມາບິນລາເດັນ ຜູ້ນໍາເຄືອຂ່າຍal-Qaida ບໍ່ມີອາວຸດຕິດໂຕເວລາຜູ້ກ່ຽວຖືກຂ້າຕາຍໂດຍກໍາລັງໜ່ວຍລົບພິເສດຂອງສະຫະລັດໃນປາກີສຖານໃນວັນຈັນມື້ກ່ອນນີ້.
ແຕ່ທ່ານ Jay Carney ໂຄສົກປະຈໍາທໍານຽບຂາວກ່າວຕໍ່ບັນດານັກຂ່າວໃນວັນອັງຄານວານນີ້ວ່າ ນາຍບິນລາເດັນບໍ່ໄດ້ທໍາການຕໍ່ສູ້ໃດໆກັບໜ່ວຍກ້າຕາຍ Navy SEALS ທີ່ທໍາການບຸກລຸກເຂົ້າໄປໃນບໍລິເວນບ່ອນທີ່ນາຍບິນລາເດັນກໍາລັງລີ້ຊ່ອນຢູ່ນັ້ນ. ທ່ານ Carney ກ່າວວ່າ ການຕໍ່ຕ້ານບໍ່ຈໍາເປັນຈະຕ້ອງໃຊ້ອາວຸດ ແຕ່ທ່ານບໍ່ໃຫ້ລາຍລະອຽດເພີ່ມຕື່ມ.
ຜູ້ຊາຍທີ່ໂລກຕ້ອງການໂຕຫລາຍທີ່ສຸດໃນໂລກ ໄດ້ຖືກພົບເຫັນຢູ່ໃນບໍລິເວນບ້ານເຮືອນແຫ່ງນຶ່ງມູນຄ່າ 1 ລ້ານໂດລາ ໃນພາກເໜືອຂອງກຸງອີສລາມາບັດ ນະຄອນຫລວງຂອງປາກີສຖານ. ທ່ານ Carney ກ່າວວ່າ ນາຍບິນລາເດັນຖືກຍິງໃສ່ຫົວແລະໜ້າເອິກແລະກ່າວວ່າ ເມຍຄົນນຶ່ງຂອງນາຍບິນລາເດັນຖືກຍິງໃສ່ຂາ ແຕ່ບໍ່ໄດ້ເສຍຊີວິດເວລາລາວແລ່ນໃສ່ພວກກໍາລັງຂອງສະຫະລັດນັ້ນ.
ໂຄສົກປະຈໍາທໍານຽບຂາວ ກ່າວວ່າ ຈະມີການຕັດສິນໃຈໃນຂັ້ນຕໍ່ໄປກ່ຽວກັບວ່າຈະມີການ
ເປີດເຜີຍຮູບພາບວີດີໂອໃດໆກ່ຽວກັບການບຸກເຂົ້າໂຈມຕີຂອງກໍາລັງສະຫະລັດນັ້ນໃຫ້ປະ
ຊາຊົນເຫັນໄດ້ຫລືບໍນັ້ນ.
ໃນຂະນະດຽວກັນທ່ານ Carney ກ່າວວ່າ ທາງການຫວັງວ່າ ຂ່າວຂໍ້ມູນລັບທີ່ເກັບກຳມາ
ໄດ້ຈາກເຮືອນນາຍບິນລາເດັນນັ້ນຈະອໍານວຍຫລັກຖານກ່ຽວກັບການໂຈມຕີທີ່ວາງແຜນ
ໄວ້ລ່ວງໜ້າ ແລະຂໍ້ມູນກ່ຽວກັບເປົ້າໝາຍທີ່ມີຄຸນຄ່າສູງອື່ນໆຕະຫລອດທັງເຄືອຂ່າຍທີ່ໄດ້
ລ້ຽງດູນາຍບິນລາເດັນຢູ່ໃນປາກີສຖານນັ້ນ.
ທ່ານ Leon Panetta ຜູ້ອໍານວຍການອົງການສືບລັບ CIA ຂອງສະຫະລັດໄດ້ລາຍງານ
ໂດຍສັງເຂບໃນກອງປະຊຸມລັບໃນວັນອັງຄານວານນີ້ຕໍ່ພວກສະມາຊິກສະພາຕໍ່າແລະສະ
ມາຊິກສະພາສູງ. ໃນການໃຫ້ສໍາພາດກັບວາລະສານ Time ຫົວຫໜ້າອັງການສືບລັບ
CIA ກ່າວວ່າ ສະຫະລັດໄດ້ຕັດສິນໃຈບໍ່ໃຫ້ທາງການຂອງປາກີສຖານເຂົ້າຮ່ວມໃນການ
ບຸກໂຈມຕີ ເພາະຢ້ານວ່າ ພວກເຂົາເຈົ້າຈະເຕືອນໃຫ້ນາຍບິນລາເດັນຮູ້ລ່ວງໜ້າ.
ບໍ່ໄດ້ມີການແຈ້ງໃຫ້ລັດຖະບານປາກີສຖານຮູ້ຈັກນໍາກ່ຽວກັບການປະຕິບັດງານດັ່ງກ່າວ
ຈົນຮອດເວລາພວກເຮືອບິນເຮລີຄອບເຕີບິນອອກຈາກເຂດນ່ານຟ້າຂອງປາກິສຖານໄປ.