ລິ້ງ ສຳຫລັບເຂົ້າຫາ

logo-print

ສະ​ຫະ​ລັດ ເລີ່ມ​ຖອນ​ກຳ​ລັງ​ທະ​ຫານ​ ທ່າມ​ກາງວິ​ກິດ​ການ​ ດ້ານ​ການ​ເມືອງ ​ທີ່ຮຸນ​ແຮງ​ໃນອັ​ຟ​ກາ​ນິ​ສ​ຖານ


ທະ​ຫານ ສະ​ຫະ​ລັດ ລໍ​ຖ້າ​ຂຶ້ນ​ເຮ​ລິ​ຄັອບ​ເຕີ ໄປ​ຖານ​ທັບ​ແຫ່ງ​ຊາດ ອັ​ຟ​ກາ​ນິ​ສ​ຖານ, ແຂ​ວງ ໂລ​ກາ, ປະ​ເທດ ອັ​ຟ​ກາ​ນິ​ສ​ຖານ. 7 ສິງ​ຫາ, 2018.

ປະ​ທາ​ນາ​ທິ​ບໍ​ດີ ອັ​ຟ​ກາ​ນິ​ສ​ຖານ ທ່ານ ອ​າ​ສ​ຣັ​ຟ ກາ​ນີ ໄດ້​ອອກ​ດຳ​ລັດ​ສະ​ບັບ​ນຶ່ງ​ໃນ​ຕອນ​ແລງ ວັນ​ອັງ​ຄ​ານ​ວານນີ້ ເພື່ອ​ເລີ່ມ​ຂະ​ບວນ​ການ ກ່ຽວ​ກັບ ການ​ປ່ອຍ​ຕົວ​ນັກ​ໂທດ​ຕາ​ລີ​ບານຫຼາຍ​ພັນ​ຄົນ ໃນ​ຂະ​ນະ​ທີ່ກອງ​ທັບ ສະ​ຫະ​ລັດ ໄດ້​ເລີ່ມ​ການ​ຖອນ​ກອງ​ທະ​ຫານ​ໃນ​ປະ​ເທດດັ່ງ​ກ່າວ​, ເຊິ່ງ​ແມ່ນ​ບາດ​ກ້າວ​ທີ່​ໄດ້​ກ່າວ​ໄວ້​ຢູ່​ໃນ​ຂໍ້​ຕົກ​ລົງ​ກັບ​ກຸ່ມ​ກະ​ບົດ​ອິ​ສ​ລາມ ທີ່​ແນ​ເປົ້າ​ໃສ່​ການ​ສິ້ນ​ສຸດ​ສົງ​ຄາມ​ເກືອບ 19 ປີ.

ຂໍ້​ຕົກ​ລົງ​ລະ​ຫວ່າງ ສະ​ຫະ​ລັດ ກັບ ​ກຸ່ມຕາ​ລີ​ບານ ທີ່​ແລ້ວ​ສຳ​ເລັດ​ໃນ​ປະ​ເທດ ກາ​ຕ້າ ເມື່ອ 10 ວັນ​ທີ່​ຜ່ານ​ມາ ໄດ້​ຮຽກ​ຮ້ອງ​ໃຫ້​ກອງ​ກຳ​ລັງ ອາ​ເມ​ຣິ​ກັນ ແລະ ພັນ​ທະ​ມິດ​ທັງ​ໝົດ ອອກ​ຈາກ​ປະ​ເທດ​ໃນ 14 ​ເດືອນ​ຂ້າງ​ໜ້າ, ​ຂຶ້ນ​ຢູ່​ກັບ​ການ​ຮັບ​ປະ​ກັນ​ໃນ​ການ​ປາບ​ປາມ​ການ​ກໍ່​ການ​ຮ້າຍ​ຂອງ​ພວກ​ກະ​ບົດ ແລະ ຄຳ​ໝັ້ນ​ສັນ​ຍາ​ຕ່າງໆ​ວ່າ ກຸ່ມ​ຕາ​ລີ​ບານ ຈະ​ພະ​ຍາ​ຍາມ​ສ້າງ​ຄວາມ​ປອງດອງ​ທາງ​ການ​ເມືອງ​ກັບ​ພັກ​ຝ່າຍ​ຕ່າງໆ ​ໃນ ອັ​ຟ​ກາ​ນິ​ສ​ຖານ.

ໂຄ​ສົກ​ກອງ​ທັບ ສະ​ຫະ​ລັດ ພັນ​ເອກ ຊອນ​ນີ ເລກ​ເກັດ ໄດ້​ກ່າວ​ວ່າ “ກອງ​ກຳ​ລັງ ສະ​ຫະ​ລັດ ​ໃນ ອັ​ຟ​ກາ​ນິ​ສ​ຖານ ໄດ້​ເລີ່ມ​ການຫຼຸດ​ກຳ​ລັງຂອງ​ເຂົາ​ເຈົ້າ​ລົງ​ໃຫ້ເຫຼືອ​ຢູ່ 8,600 ຄົນ​ໃນ 135 ວັນ​ຂ້າງ​ໜ້າ​ອີງຕາມ​ເງື່ອນ​ໄຂ.” ​ປັດ​ຈຸ​ບັນ​ນີ້ ສະ​ຫະ​ລັດ ມີ​ກຳ​ລັງ​ທະ​ຫານ​ປະ​ມານ 13,000 ຄົນ ​ທີ່​ປະ​ຈຳ​ການ​ໃນ​ປະ​ເທດ​ດັ່ງ​ກ່າວ.

ທ່ານ ເລກ​ເກັດ ໄດ້​ກ່າວ​ເນັ້ນ​ວ່າ ການຫຼຸດ​ກຳ​ລັງ​ຈະ​ຮັບ​ປະ​ກັບ​ວ່າ ກອງ​ທັບ ສະ​ຫະ​ລັດ ຈະ​ຮັກ​ສາ​ວິ​ທີ​ການ​ທີ່​ຈຳ​ເປັນ ແລະ ຄວາມ​ສາ​ມາດ​ຕ່າງໆ​ເພື່ອ​ສະ​ໜອງ​ການ​ສະ​ໜັບ​ສະ​ໜູນ​ໃຫ້​ກອງ​ກຳ​ລັງ​ຮັກ​ສ​າ​ຄວາມປອ​ດ​ໄພ ອັ​ຟ​ກາ​ນິ​ສ​ຖານ ແລະ ດຳ​ເນີນ​ການ​ປະ​ຕິ​ບັດ​ການ​ປາບ​ປາມ​ລັດ​ທິ​ກໍ່​ການ​ຮ້າຍ.

ບາດ​ກ້າວ​ທີ່​ສຳ​ຄັນ​ຕໍ່​ໄປ ກ່ຽວ​ກັບ ການ​ເປີດ​ການ​ເຈ​ລະ​ຈາ​ສັນ​ຕິ​ພາບ ລະ​ຫວ່າງ ພັກຝ່າຍ​ຕ່າງໆ​ຂອງ ອັ​ຟ​ກາ​ນິ​ສ​ຖານ ໃນ​ຄວາມ​ຂັດ​ແຍ້ງ ໄດ້​ຮຽກ​ຮ້ອງ​ໃຫ້​ປ່ອຍ​ຕົວ​ນັກ​ໂທດ​ກະ​ບົດ​ເຖິງ 5,000 ຄົນອອກ​ຈາກ​ຄຸກ ອັ​ຟກ​າ​ນິ​ສ​ຖານ ເພື່ອ​ແລກ​ປ່ຽນ​ກັບ​ນັກ​ໂທດ 1,000 ຄົນ, ສ່ວນ​ໃຫຍ່​ແມ່ນ ກອງ​ກຳ​ລັງ​ຮັກ​ສາ​ຄວາມ​ປອດ​ໄພ​ລັດ​ຖະ​ບານ ທີ່​ຖືກ​ຈັບ​ໂດຍ​ກຸ່ມ​ຕາ​ລີ​ບານ.

ຫົວ​ໜ້າ​ໂຄ​ສົກ​ປະ​ທາ​ນາ​ທິ​ບໍ​ດີ ທ່ານ ເຊ​ດິກ ເຊ​ດິກ​ກີ ໄດ້​ກ່າວ​ໃນ​ທວິດ​ເຕີ​ໃນ​ຕອນ​ເດິກຄືນ​ວານ ນີ້​ວ່າ “ປະ​ທາ​ນາ​ທິ​ບໍ​ດີ ກາ​ນີ ໄດ້​ເຊັນ​ດຳ​ລັດ​ທີ່​ຈະ​ອຳ​ນວຍ​ຄວາມ​ສະ​ດວກ​ໃຫ້​ການ​ປ່ອຍ​ຕົວ​ນັກ​ໂທດ ຕາ​ລີ​ບານ ທີ່​ສອດ​ຄ່ອງ​ກັບ​ຂໍ້​ຕົກ​ລົງ​ທີ່​ຖືກຍອມ​ຮັບ​ສຳ​ລັບ​ການ​ເລີ່ມ​ຕົ້ນ​ການ​ເຈ​ລະ​ຈາ​ລະ​ຫວ່າງ ກຸ່ມ​ຕາ​ລີ​ບານ ກັບ ລັດ​ຖະ​ບານ ອັ​ຟ​ກາ​ນິ​ສ​ຖານ.”

ຂໍ້ສະ​ເໜີໃນ​ການເຈ​ລະ​ຈາ​ລະ​ຫວ່າງ ອັ​ຟ​ກາ​ນິ​ສ​ຖານ, ​ທີ່ດັ້ງ​ເດີມ​ແລ້ວ​ມີ​ກຳ​ນົດ​ຈັດ​ຂຶ້ນ​ໃນ​ວັນ​ທີ 10 ມີ​ນາວານນີ້ ດັ່ງ​ທີ່​ໄດ້​ກ່າວ​ໄວ້​ໃນ​ຂໍ້​ຕົ​ກ​ລົງ​ລະ​ຫວ່າງ ສະ​ຫະ​ລັດ ກັບ​ກຸ່ມຕາ​ລີ​ບານ ນັ້ນ, ແມ່ນ ບໍ່​ສາ​ມາດຈັດ​ຂຶ້ນ​ໄດ້​ຍ້ອນ​ຄວາມບໍ່​ເຕັມ​ໃຈ​ຂອງ​ປະ​ທາ​ນາ​ທິ​ບໍ​ດີ ອັ​ຟ​ກາ​ນິ​ສ​ຖານ ທ່ານ ກາ​ນີ ທີ່​ຈະ​ອະ​ນຸ​ຍາດ​ການ​ແລກ​ປ່ຽນ​ນັກ​ໂທດ. ປະ​ກອບ​ກັບ​ວິ​ກິດ​ການ​ທາງ​ການ​ເມືອງ​ທີ່​ຮຸນ​ແຮງ ເຊິ່ງ​ມີ​ຜົນ​ມາ​ຈາກ​ບັນ​ຫາ​ທີ່​ມີ​ມາ​ຍາວ​ນານ ກ່ຽວ​ກັບ ຜູ້​ຊະ​ນະ​ເລີດ​ທີ່​ຖືກ​ຕ້ອງ​ຕາມ​ກົດ​ໝາຍ ຂອງ​ການ​ເລືອກ​ຕັ້ງ​ປະ​ທາ​ນາ​ທິ​ບໍ​ດີ ອັ​ຟ​ກາ​ນິ​ສ​ຖານ ທີ່​ໄດ້​ກໍ່​ໃຫ້​ເກີດ​ການ​ໂຕ້​ແຍ້ງ​ກັນ​ນັ້ນ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG