ລັດຖະມົນຕີການຕ່າງປະເທດປະເທດສະຫະລັດ ທ່ານນາງ Hillary Clinton ກຳລັງຢູ່ທີ່ Bosnia-Herzegovina ໃນລະຫວ່າງການຢ້ຽມຢາມແຫຼມ Balkans ເປັນເວລາ 3 ມື້ ຊຶ່ງເປັນການຢ້ຽມຢາມ ເຂດດັ່ງກ່າວເທື່ອທຳອິດ ນັບແຕ່ ທ່ານນາງ ໄດ້ເຂົ້າຮັບໜ້າທີ່.
ໃນວັນອັງຄານມື້ນີ້ ທ່ານນາງ Clinton ມີກໍານົດເຈລະຈາ ຫາລືກັບຄະນະປະທານາທິບໍດີ ທີ່ປະກອບດ້ວຍສະມາຊິກ 3 ຄົນ ຂອງປະເທດດັ່ງກ່າວ ຄືຜູ້ຕາງໜ້າຈາກປະຊາຄົມ ໂຄຣເອເຊຍ ມຸສລິມ ແລະເຊີເບຍ.
ເຈົ້າໜ້າທີ່ກະຊວງການຕ່າງປະເທດຂອງສະຫະລັດ ກ່າວວ່າ ທ່ານນາງມີແຜນການ ທີ່ຈະ ກ່າວຢໍ້າເຖິງຄວາມສຳຄັນ ກ່ຽວກັບການປະຕິຮູບ ທາງດ້ານການເມືອງ ແລະການເຂົ້າເປັນ ສະມາຊິກໃນສະຫະພາບຢູໂຣບ ແລະອົງການເນໂຕ້.
ລັດຖະມົນຕີຊ່ອຍວ່າການ ກະຊວງການຕ່າງປະເທດສະຫະລັດ ທ່ານ Philip Gordon ເວົ້າວ່າ ທ່ານນາງ Clinton ຈະບໍ່ບັງຄັບ ໃຫ້ມີການຮັບເອົາ ການຕົກລົງໃດໆທີ່ຈະກໍ່ໃຫ້ ເກີດຄວາມວຸ້ນວາຍໃນການເມືອງທີ່ມີການແບ່ງແຍກຢູ່ແລ້ວໃນບອສເນຍນັ້ນ. ທ່ານເວົ້າວ່າ ລັດຖະທຳມະນູນສະບັບໃໝ່ຂອງປະເທດ ແມ່ນສິ່ງທີ່ຊາວບອສເນຍຈະຕ້ອງໄດ້ດຳເນີນການ ດ້ວຍຕົນເອງ.
