ສະຫະພັນກຳມະກອນລົດຍົນ ສະຫະລັດ ໄດ້ບັນລຸຂໍ້ຕົກລົງຊົ່ວຄາວກັບບໍລິສັດ Ford ເມື່ອແລງວັນພຸດວານນີ້, ເຊິ່ງແມ່ນຄວາມສຳເລັດໃນການຢຸດເຮັດວຽກ 41 ວັນຢູ່ໂຮງງານຜະລິດລົດສາມແຫ່ງຂອງເມືອງ ດີທຣອຍ.
ຂໍ້ຕົກລົງດັ່ງກ່າວ, ເຊິ່ງກຳມະກອນທົ່ວໄປຕ້ອງໄດ້ຮັບຮອງເອົາໃນການລົງຄະແນນສຽງ, ທີ່ລວມມີການຂຶ້ນຄ່າຈ້າງ 25 ເປີເຊັນໃຫ້ພະນັກງານທີ່ເຮັດວຽກເປັນຊົ່ວໂມງ, ອີງຕາມການກ່າວຂອງສະຫະພັນກຳມະກອນລົດຍົນ ສະຫະລັດ.
ອົງປະກອບທີ່ສຳຄັນອື່ນໆລວມມີການຮັບປະກັນການປັບຕົວເຂົ້າກັບຄ່າຄອງຊີບ, ການລົບລ້າງຄວາມແຕກຕ່າງໃນລະດັບຄ່າຈ້າງ ຫຼື “ຊັ້ນ” ທີ່ສ້າງຄວາມເສຍປຽບໃຫ້ພະນັກງານລຸ້ນນ້ອງ, ແລະ ມີສິດທີ່ຈະນັດຢຸດງານ ກ່ຽວກັບ ການປິດໂຮງງານ.
ປະທານກຳມະກອນລົດຍົນ ສະຫະລັດ ທ່ານ ຊອນ ເຟນ ໄດ້ກ່າວໃນຖະແຫຼງການສະບັບນຶ່ງວ່າ “ເປັນເວລາຫຼາຍເດືອນແລ້ວທີ່ພວກເຮົາໄດ້ກ່າວວ່າ ລາຍໄດ້ທີ່ສູງເປັນປະຫວັດການໝາຍເຖິງການເຮັດສັນຍາທີ່ເປັນປະຫວັດການ. ແລະຄອບຄົວກຳມະກອນລົດຍົນ, ການລຸກຂຶ້ນນັດຢຸດງານຂອງພວກເຮົາແມ່ນໄດ້ບັນລຸຜົນແລ້ວ.”
ບໍລິສັດ Ford ໄດ້ຢືນຢັນຂໍ້ຕົກລົງດັ່ງກ່າວໂດຍເວົ້າວ່າ “ພວກເຮົາຍິນດີທີ່ຈະບັນລຸຂໍ້ຕົກລົງຊົ່ວຄາວ ກ່ຽວກັບ ສັນຍາແຮງງານໃໝ່ກັບກຳມະກອນລົດຍົນ ສະຫະລັດ ທີ່ປົກຄຸມການປະຕິບັດງານຂອງພວກເຮົາໃນ ສະຫະລັດ.”
ພ້ອມກັນນັ້ນຜູ້ທີ່ສະແດງຄວາມດີໃຈແມ່ນປະທານາທິບໍດີ ສະຫະລັດ ທ່ານ ໂຈ ໄບເດັນ, ຜູ້ທີ່ໄດ້ຍົກຍ້ອງ “ຂໍ້ຕົກລົງຄັ້ງປະຫວັດສາດ” ດັ່ງກ່າວໂດຍເວົ້າວ່າ, “ຂ້າພະເຈົ້າຂໍຊົມເຊີຍກຳມະກອນລົດຍົນສະຫະລັດ ແລະ ບໍລິສັດ Ford ສຳລັບການຕົກລົງກັນ ຫຼັງຈາກການຕໍ່ສູ້ຢ່າງໜັກ, ການເຈລະຈາທີ່ມີຈຸດປະສົງດີ ແລະ ບັນລຸຂໍ້ຕົກລົງຊົ່ວຄາວຄັ້ງປະຫວັດສາດໃນຄືນນີ້.”
