ທ້າວ ເຊຊາ ຊາຢອກ ທີ່ຖືກກ່າວຫາວ່າ ໄດ້ສົ່ງຫໍ່ວັດຖຸລະເບີດຢ່າງໜ້ອຍ 13 ກ່ອງໄປ
ໃຫ້ຜູ້ຕໍາໜິວິຈານທ່ານປະທານາທິບໍດີ ດໍໂນລ ທຣໍານັ້ນ ມີລາຍຊື່ຂອງຄົນທີ່ຢູ່ໃນ
ເປົ້າໝາຍ ທີ່ອາດຖືກໂຈມຕີຄົນອື່ນໆ ອີກຫຼາຍກວ່າ 100 ຄົນ, ອີງຕາມຄໍາເວົ້າຂອງ
ເຈົ້າໜ້າທີ່ປະຕິບັດກົດໝາຍ ໃນມື້ວັນຈັນວານນີ້.
ບັນດາອົງການຂ່າວສານຂອງສະຫະລັດເວົ້າວ່າ ເຈົ້າໜ້າທີ່ເຊື່ອວ່າທ້າວຊາຢອກ ກໍາ
ລັງສົ່ງສິ່ງຂອງໄປຕາມລາຍຊື່ນັ້ນຢູ່, ຊຶ່ງອົງການຂ່າວ NBC ເວົ້າວ່າ ລວມ ທັງພວກ
ນັກຂ່າວ ແລະພວກຢູ່ໃນວົງການບັນເທິງຕ່າງໆ ໃນຕອນທີ່ລາວຖືກຈັບກຸມໃນອາທິດ
ແລ້ວນີ້. ລາວຖືກກ່າວຫາວ່າໄດ້ສົ່ງວັດຖຸທີ່ສົງໄສວ່າແມ່ນ ລະເບີດ ໄປໃຫ້ຫລາຍຄົນ
ຊຶ່ງໃນນັ້ນ ລວມມີອະດີດປະທານາທິບໍດີ ບາຣັກ ໂອບາມາ, ອະດີດຮອງປະທານາທິ
ບໍດີ ໂຈ ບາຍເດັນ ຊຶ່ງເປັນຄົນທີ່ອາດເປັນຄູ່ແຂ່ງຂອງທ່ານທຣຳ ໃນການເລືອກຕັ້ງປີ
2020, ທ່ານນາງຮິລແລຣີ ຄລິນຕັນ ທີ່ເປັນຄູ່ແຂ່ງຂອງທ່ານທຣຳ ໃນການເລືອກຕັ້ງ
ປີ 2016, ພ້ອມກັບບັນດາເຈົ້າໜ້າທີ່ຮັກສາຄວາມປອດໄພແຫ່ງຊາດ ທີ່ໄດ້ປະຕິບັດ
ໜ້າທີ່ໃນລັດຖະບານຂອງທ່ານ ໂອບາມາ 2 ທ່ານ.
ທ້າວຊາຢອກ ອາຍຸ 56 ປີ ໄດ້ໄປປາກົດຕົວຢູ່ສານເປັນຄັ້ງທໍາອິດໃນນະຄອນໄມອາມີ,
ເຊິ່ງຕັ້ງຢູ່ບໍ່ໄກຈາກບ່ອນທີ່ເຈົ້າໜ້າທີ່ລັດຖະບານກາງຈັບລາວນັ້ນ.
ພວກໄອຍະການບອກຜູ້ພິພາກສາທ່ານນຶ່ງວ່າ ພວກເພິ່ນເຊື່ອວ່າ ທ້າວຊາຢອກອາດຈະ
ໂຕນໜີແລະເປັນອັນຕະລາຍຕໍ່ຊຸມຊົນໄດ້ ແລະບໍ່ຄວນໃຫ້ຖືກປ່ອຍໂດຍການປະກັນຕົວ.
ຜູ້ພິພາກສາ ມີກໍານົດຈັດໃຫ້ມີການຮັບຟັງຄຳໃຫ້ການອີກ ໃນວັນສຸກທີ່ຈະມາເຖິງນີ້ເພື່ອ
ຈະຕັດສິນວ່າ ຈະປ່ອຍຕົວທ້າວຊາຢອກໃນເວລາທີ່ລໍ ຖ້າ ການໄຕ່ສວນຄະດີຢູ່ນັ້ນຫລືບໍ່
ແລະ ຄວນຈະສົ່ງຄະດີຂອງລາວໄປຫາສານລັດນິວຢອກ ຫລືບໍ່.
ນັກສືບຂອງລັດຖະບານກາງໄດ້ຈັບກຸມລາວ ໃນວັນສຸກຜ່ານມາ ຢູ່ໃກ້ກັບລົດຕູ້ບ່ອນທີ່ປາ
ກົດວ່າລາວໄດ້ເຮັດເປັນເຮືອນຢູ່ອາໄສແລະຕໍາຫຼວດໄດ້ແກ່ໄປແລ້ວ. ປ່ອງຢ້ຽມຫຼາຍປ່ອງ
ຂອງລົດຕູ້ນັ້ນ ໄດ້ຕິດສະຕິກເກີ ທີ່ເວົ້າເຖິງການສະໜັບສະໜູນທ່ານທຣຳ, ທຸງອາເມຣິກາ
ຫຼື ຂີດກາໄຂວ່ໃສ່ໜ້າຂອງຄູ່ປໍລະປັກຂອງທ່ານ ທຣຳໃສ່ເຕັມ. ສະຕິກເກີອັນນຶ່ງໃນນັ້ນ
ແມ່ນແນໃສ່ໂຈມຕີເຄືອຂ່າຍຂ່າວທາງໂທ ລະພາບ ທີ່ທ່ານທຣໍາເອີ້ນວ່າ “ຂ່າວຂີ້ຕົວະ”
ຫລື "Fake News," ນັ້ນ ຂຽນ ວ່າ "ອົງການຂ່າວ CNN ຂີ້ກາກ."
ຫໍ່ສິ່ງຂອງທີ່ໜ້າສົງໄສອີກອັນນຶ່ງ ທີ່ຄາດວ່າຈະສົ່ງໄປເຖິງອົງການຂ່າວ CNN ທີ່ທ້າວຊາ
ຢອກ ໄດ້ສົ່ງວັດຖຸລະເບີດຂອງລາວ 2 ລູກທີ່ຖືກກ່າວຫາໄປໃຫ້ກ່ອນແລ້ວນັ້ນໄດ້ຖືກກວດ
ພົບຢູ່ຫ້ອງການໄປສະນີໃນນະຄອນແອັດແລນຕາ, ລັດຈໍ ເຈຍ ໃນວັນຈັນມື້ວານນີ້. ອົງ
ການສັນຕິບານກາງ ຫລື FBI ເວົ້າວ່າ ຫໍ່ສິ່ງຂອງ ນັ້ນ ຄ້າຍຄືກັນກັບກ່ອງໄປສະນີ ທີ່ໄດ້
ສົ່ງໄປຫາຫ້ອງການຂອງເຄືອຂ່າຍໂທລະ ພາບດັ່ງກ່າວ ຢູ່ນະຄອນນິວຢອກ ໃນອາທິດ
ແລ້ວນີ້. ແຕ່ວ່າ ປະທານຂອງອົງ ການຂ່າວ CNN ທ່ານ ແຈັຟ ຊັກເກີ (Jeff Zucker)
ເວົ້າວ່າ ບໍ່ໄດ້ເຮັດໃຫ້ ສໍານັກງານໃຫຍ່ຂອງອົງການຂ່າວດັ່ງກ່າວ ໃນນະຄອນແອັດ
ແລນຕາ ຕົກຢູ່ໃນ ສະພາບທີ່ອັນຕະລາຍແຕ່ຢ່າງໃດເລີຍ.
