ທາງການສະຫະລັດອາເມຣິກາ ຕົກລົງໃຫ້ການຊ່ວຍເຫຼືອລາວ ໃນການພັດທະນາ ຢ່າງຮອບດ້ານ ແລະສືບຕໍ່ຈັດຕັ້ງປະຕິບັດ ບັນດາໂຄງການຮ່ວມມືຕ່າງໆ ລະຫວ່າງກັນ ແລະໃນປະຊາຄົມອາຊຽນ.
ທ່ານແສງເພັດ ຮຸ່ງບຸນຍວງ ລັດຖະມົນຕີຊ່ວວ່າການຕ່າງປະເທດ ຖະແຫລງລາຍງານ ສະລຸບຜົນກອງປະຊຸມ ປຶກສາຫາລືຮອບດ້ານ ກ່ຽວກັບການພົວພັນ-ຮ່ວມມື ລະຫວ່າງ ສປປ ລາວ ກັບ ສະຫະລັດອາເມຣິກາ ຄັ້ງທີ 7 ຢູ່ນະຄອນວຽງຈັນ ເມື່ອບໍ່ນານມານີ້ ວ່າ ທາງການສະຫະລັດ ໄດ້ຕົກລົງໃຫ້ການຊ່ວຍເຫຼືອລາວ ເຂົ້າໃນການພັດທະນາ ຢ່າງ ຮອບດ້ານ ແລະຈະປະກອບສ່ວນ ຢ່າງເໝາະສົມເຂົ້າໃນບັນດາ ໂຄງການພັດທະນາ ຕ່າງໆ ທີ່ສະຫະລັດ ມີສ່ວນຮ່ວມກັບລາວ ແລະບັນດາປະເທດສະມາຊິກ ໃນປະຊາຄົມ ອາຊຽນ.
ໂດຍຫຼ້າສຸດ ທາງການສະຫະລັດ ກໍໄດ້ໃຫ້ການຊ່ວຍເຫຼືອລາວ ເຂົ້າໃນການປັບປຸງ ໂພຊະນາການ ສຳລັບເດັກນ້ອຍອາຍຸຕ່ຳກວ່າ 5 ປີ ທີ່ຈະຈັດຕັ້ງປະຕິບັດໄປ ຈົນເຖິງ ປີ 2018 ດ້ວຍງົບປະມານລວມ 27 ລ້ານໂດລາ ດ້ວຍເປົ້າໝາຍ ທີ່ຈະພັດທະນາ ການຕອບ ສະໜອງດ້ານໂພຊະນາການ ທີ່ດີສຳລັບການເຕີບໂຕ ຂອງເດັກນ້ອຍອາຍຸຕ່ຳກວ່າ 5 ປີ ຈຳນວນຫຼາຍກວ່າ 170,000 ຄົນ ໃນເຂດຊົນນະບົດຂອງລາວ.
ຊຶ່ງຕໍ່ບັນຫາດັ່ງກ່າວນີ້ ກະຊວງສາທາລະນະສຸກຂອງລາວ ກໍໄດ້ສະເໜີລາຍງານວ່າ ບັນຫາການຂາດສານອາຫານ ຂອງເດັກນ້ອຍອາຍຸຕ່ຳກວ່າ 5 ປີ ໄດ້ເປັນສາເຫດ ທີ່ເຮັດໃຫ້ການລົດຈຳນວນເດັກນ້ອຍ ທີ່ຕົວເຕ້ຍ ສາມາດດຳເນີນການໄດ້ຢ່າງຊັກຊ້າ ຄືສາມາດລົດໄດ້ ຈາກອັດຕາສະເລ່ຍ 40 ເປີເຊັນ ໃນປີ 2006 ລົງມາເປັນ 38 ເປີເຊັນ ໃນປັດຈຸບັນນີ້ ໝາຍຄວາມວ່າ ລົດລົງໄດ້ພຽງ 2 ເປີເຊັນ ເທົ່ານັ້ນ ໃນລະຍະກວ່າ 8 ປີ ທີ່ຜ່ານມາ ສ່ວນເດັກນ້ອຍອາຍຸຕ່ຳກວ່າ 5 ປີ ທີ່ມີນ້ຳໜັກຕ່ຳກວ່າເກນ ກໍຍັງສູງເຖິງ 32 ເປີເຊັນ ໃນຂະນະທີ່ເປົ້າໝາຍສະຫັດສະວັດ ໄດ້ວາງເອົາໄວ້ທີ່ອັດຕາສະເລ່ຍບໍ່ເກີນ 22 ເປີເຊັນ ຂອງຈຳນວນເດັກນ້ອຍອາຍຸ ຕ່ຳກວ່າ 5 ປີ ໃນທົ່ວປະເທດ.
ຍິ່ງໄປກວ່ານັ້ນ ເດັກນ້ອຍລາວ ທີ່ມີໂອກາດໄດ້ຮັບການລ້ຽງດູດ້ວຍນ້ຳນົມແມ່ ນັບຕັ້ງ ແຕ່ມື້ເກີດຈົນຮອດ ອາຍຸ 6 ເດືອນ ຍັງຄິດເປັນອັດຕາສະເລ່ຍພຽງ 40 ເປີເຊັນ ເທົ່ານັ້ນ ຊຶ່ງກໍເຮັດໃຫ້ມີຄວາມສ່ຽງສູງ ຕໍ່ການເສຍຊີວິດ ຍ້ອນໂຣກໄພຕ່າງໆ ຂອງເດັກນ້ອຍລາວ ດັ່ງທີ່ທ່ານນາງຄຳແສງ ພິລາວົງ ຮອງຫົວໜ້າສູນໂພຊະນາການ ກະຊວງສາທາລະນະສຸກ ໄດ້ໃຫ້ການຢືນຢັນວ່າ:
“ເພິ່ນໄດ້ເຮັດການຄົ້ນຄວ້າ ແລະສົມທຽບກັນແລ້ວ ເຫັນວ່າ ເດັກນ້ອຍທີ່ບໍ່ໄດ້ຖືກ ລ້ຽງລູກດ້ວຍນ້ຳນົມແມ່ ຫັ້ນນ່ະ ຫລະແມ່ນມີຄວາມສ່ຽງ ຕໍ່ການຕາຍຍ້ອນພະຍາດ ຖອກທ້ອງ 7 ເທົ່າ ແລ້ວກະມີຄວາມສ່ຽງ ຕໍ່ການຕາຍຍ້ອນພະຍາດອັກເສບປອດ 5 ເທົ່າ ແຕ່ວ່າກິນນົມແມ່ຢູ່ແຕ່ວ່າ ກິນເຂົ້າກິນນ້ຳໄປນຳ ນີ້ນ່ະ ລະຍະຫົກເດືອນທຳອິດ ກະຍັງມີຄວາມສ່ຽງ ຕໍ່ການຕາຍເພີ້ມຂຶ້ນ 2 ເທົ່າ.”
ນອກຈາກການຊ່ວຍເຫຼືອດັ່ງກ່າວແລ້ວ ທ່ານ Daniel Clune ເອກອັກຄະລັດຖະທູດ ສະຫະລັດອາເມຣິກາ ປະຈຳລາວ ໄດ້ປະກາດການໃຫ້ຄວາມຊ່ວຍເຫຼືອ ງົບປະມານ ສຳລັບການເກັບກູ້ລະເບີດບໍ່ທັນແຕກ (UXO) ທີ່ຕົກຄ້າງຢູ່ໃນລາວ ເພີ້ມຂຶ້ນ ເປັນ 13 ລ້ານໂດລາ ໃນປີ 2015 ທີ່ຜ່ານມາ.
ໂດຍການເພີ້ມການຊ່ວຍເຫຼືອແກ່ລາວ ຂອງທາງການສະຫະລັດດັ່ງກ່າວ ກໍຍັງລວມເຖິງ ການສົມທົບທຶນ ໃນມູນຄ່າ 2 ລ້ານໂດລາ ສຳລັບໃຫ້ກຸ່ມທີ່ປຶກສາ MAG ເພື່ອນຳໃຊ້ໃນ ການເກັບກູ້ລະເບີດ UXO ຢູ່ທີ່ແຂວງຊຽງຂວາງ ອັນຖືເປັນພາກສ່ວນໜຶ່ງໃນໂຄງການ ທີ່ທາງການສະຫະລັດ ໄດ້ລິເລີ້ມຂຶ້ນໃໝ່ ເພື່ອໃຫ້ການຊ່ວຍເຫຼືອແກ່ປະຊາຊົນລາວ ທີ່ ໄດ້ຮັບຜົນກະທົບຈາກລະເບີດ UXO ອີກດ້ວຍ.
ກ່ອນໜ້ານີ້ ທ່ານ Daniel Clune ໃຫ້ການຢືນຢັນວ່າ ລັດຖະບານ ສະຫະລັດ ໄດ້ອະນຸ ມັດງົບປະມານ ໃນມູນຄ່າລວມ 6 ລ້ານ 5 ແສນໂດລາ ຊຶ່ງແບ່ງອອກເປັນ 5 ລ້ານໂດລາ ສຳລັບໃຫ້ການຊ່ວຍເຫຼືອຜູ້ທີ່ພິການ ຈາກລະເບີດ UXO ໃນລາວ ຫຼາຍກວ່າ 70,000 ຄົນ ຊຶ່ງດຳເນີນໂຄງການໂດຍອົງການ World Education ພາຍໃຕ້ 4 ເປົ້າໝາຍ ຄືການຝຶກ ອົບຮົມ ການເພີ້ມຂີດຄວາມສາມາດດ້ານເສດຖະກິດ ການເຂົ້າເຖິງເທັກໂນໂລຈີ ແລະ ການຟື້ນຟູທາງການແພດສຳລັບຄົນພິການ ໃນລາວ ເປັນເວລາ 3 ປີ ຕິດຕໍ່ກັນ.
ສ່ວນເງິນທຶນອີກ 1 ລ້ານ 5 ແສນໂດລານັ້ນ ເປັນການສະໜັບສະໜູນ ໃຫ້ແກ່ໂຄງການ ຮ່ວມມື ດ້ານການຜະລິດອົງຄະທຽມ ແລະ ເພື່ອຄ້ຳຊູ ສຳລັບຄົນພິການ ໃນລະຍະ 3 ປີ ຕໍ່ໄປນີ້ ທັງນີ້ ໂດຍນັບແຕ່ປີ 1993 ເປັນຕົ້ນມາ ທາງການສະຫະລັດ ໄດ້ໃຫ້ການຊ່ວຍ ເຫຼືອ ສຳລັບການເກັບກູ້ລະເບີດ UXO ໃນລາວ ໄປແລ້ວເຖິງ 83 ລ້ານໂດລາ ລວມໄປ ເຖິງການຊ່ວຍເຫຼືອ ໃນການສຶກສາຄວາມສ່ຽງ ຈາກລະເບີດ UXO ໃນລາວດ້ວຍ.
