ຈີນກຳລັງພົວພັນ ໃນອັນທີ່ເອີ້ນວ່າ “ການໂຈມຕີທາງເສດຖະກິດແບບສາຍຟ້າແມບ” ເພື່ອແຍ່ງຊິງ ໃຫ້ເປັນມະຫາອຳນາດແທນສະຫະລັດ ພຽງປະເທດດຽວຂອງໂລກ ອີງຕາມການຄຳເວົ້າ ຂອງທ່ານວີລລ້ຽມ ບາ ລັດຖະມົນຕີກະຊວງຍຸຕິທຳ ໃນວັນພະຫັດວານນີ້ ໃນຂະນະດຽວກັນ ທ່ານຍັງໄດ້ຕໍ່ວ່າຕໍ່ຂານພວກທຸລະກິດທັງຫຼາຍ ທີ່ກົ້ມຫົວໃຫ້ແກ່ການກົດດົນຂອງຈີນ ໃນການສະແຫວງຫາຜົນກຳໄລ.
ຈາກ Hollywood ຈົນເຖິງ Silicon Valley ພວກທຸລະກິດຂອງອາເມຣິກາ “ຍັງໄດ້ປ່ອຍໃຫ້ພວກເຂົ້າເຈົ້າເອງກາຍເປັນເຄື່ອງມືຕໍ່ອິດທິພົນຂອງຈີນ” ນັ້ນຄືຄຳເວົ້າຂອງທ່ານບາ ທີ່ໄດ້ກ່າວອ້າງ ໃນການກ່າວຄຳປາໄສ ຢູ່ທີ່ຫໍພິພິທະພັນປະທານາທິບໍດີ ເຈີໂຣລດ໌ ອາຣ ຟອດ ໃນເມືອງແກຣນແຣບປິດ ລັດມິຊິແກັນ.
ທ່ານບາ ໄດ້ກ່າວຕືີ່ມອີກວ່າ ໃນຂະນະທີ່ຮໍລີວູດ “ກວດກາພວກຮູບເງົາຂອງຕົນເອງຢ່າງສະໝ່ຳສະເໝີເພື່ອເອົາອົກເອົາໃຈພັກຄອມມິວນິສຂອງຈີນ” ສ່ວນພວກບໍລິສັດ ເຊັ່ນວ່າ Google Microsoft Yahoo ແລະ Apple “ກໍໄດ້ສະແດງໃຫ້ເຫັນວ່າ ເຕັມໃຈຢ່າງຍິ່ງ ທີ່ຈະປະສານງານ ຮ່ວມໄມ້ຮ່ວມມື” ກັບພັກຄອມມິວນິສຂອງຈີນ ຫຼື CCP.
ສະມາຄົມຮູບເງົາ ຫຼື Motion Pictures Association ໄດ້ປະຕິເສດຕໍ່ຄວາມເຫັນດັ່ງກ່າວ.
ຄວາມເຫັນເຫຼົ່ານີ້ໄດ້ປາກົດອອກມາ ທ່າມກາງຄວາມເຄັ່ງຕຶງລະຫວ່າງສະຫະລັດແລະຈີນ ໄດ້ເພີ້ມທະວີຂຶ້ນ ຍ້ອນບັນຫາຕ່າງໆຫຼາຍປະການ ຕະຫຼອດເຖິງການລະບາດຂອງໄວຣັສໂຄໂຣນາໃນທົ່ວໂລກຮອດເລື້ອງອະທິປະໄຕຂອງຮົງກົງ ແລະທ່າທີດ້ານການທະຫານຂອງຈີນ ໃນທະເລຈີນໃຕ້.
ປະທານາທິບໍດີ ດໍໂນລ ທຣຳ ໃນຄັ້ງນຶ່ງ ໄດ້ຫາທາງຢ່າງຫ້າວຫັນທີ່ຈະບັນລຸຂໍ້ຕົກການຄ້າກັບຈີນ ແຕ່ມາບັດນີ້ ລັດຖະບານຂອງທ່ານ ໄດ້ເອົາທ່າທີທີ່ແຂງຂັນເພີ້ມຂຶ້ນຕໍ່ປັກກິ່ງ ໂດຍການຖິ້ມໂທດໃສ່ຈີນ ໃນການປົກປິດໄວຣັສໂຄໂຣນາໃນເບື້ອງຕົ້ນ ແລະບ່ອນທຳລາຍການປົກຄອງຕົນເອງຂອງຮົງກົງ ດ້ວຍການວາງຂໍ້ຈຳກັດຕ່າງໆ ໃນກົດໝາຍຄວາມໝັ້ນຄົງແຫ່ງຊາດ.
ທ່ານທຣຳຍັງໄດ້ປະທະກັບສື່ສັງຄົມຍັກໃຫຍ່ທັງຫຼາຍເຊັ່ນ Twitter Facebook ແລະ Apple ໃນບໍ່ເທົ່າໃດເດືອນຜ່ານມາ ກ່ຽວກັບບັນຫາຫຼາຍຢ່າງ ທີ່ລວມທັງ ຄວາມເຄັ່ງຕຶງລະຫວ່າງກະຊວງຍຸຕິທຳ ແລະບໍລະສັດເທັກໂນໂລນີ ກ່ຽວກັບນະ ໂຍບາຍການປົກປ້ອງຂໍ້ມູນຕ່າງໆເປັນຕົ້ນ.
ໃນຖານະທີ່ເປັນພາກສ່ວນນຶ່ງຂອງພາລະກິດການສ້າງອິດທະພົນຢູ່ໃນສະຫະລັດຂອງຕົນນັ້ນ CCP ໄດ້ທະວີຄວາມພະຍາຍາມຢູ່ເບື້ອງຫລັງ “ທີ່ຈະປູກຝັງແລະບີບບັງຄັບພວກຜູ້ບໍລິຫານທຸລະກິດຂອງອາເມຣິກາເພື່ອຂະຫຍາຍຈຸດປະສົງທາງດ້ານການເມືອງຂອງຕົນ” ດັ່ງທີ່ທ່ານບາ ໄດ້ກ່າວໄວ ແລະເຕືອນວ່າ ພວກນັກ ທຸລະກິດ ຜູ້ທີ່ບໍ່ເປີດເຜີຍການພົວພັນກັບຈີນຂອງພວກເຂົາເຈົ້ານັ້ນ ອາດຈະປະເຊີນບັນຫາກ່ຽວກັບກົດໝາຍວ່າດ້ວຍການເປັນຕົວແທນຂອງຕ່າງປະເທດ. ກົດໝາຍ ປີ 1938 ນີ້ ບັງຄັບໃຫ້ຜູ້ຕາງໜ້າຂອງລັດຖະບານຕ່າງປະເທດທັງຫຼາຍ ໃຫ້ເປີດເຜີຍກິດຈະກຳຕ່າງໆຂອງພວກເຂົາເຈົ້າແລະສາຍສຳພັນກັບອົງການ ຈັດຕັ້ງຕ່າງໆຂອງຕ່າງປະເທດ.
