ໃນກອງປະຊຸມສຸກເສີນຂອງສູນກາງກຳນົດເປົ້າໝາຍການໃຫ້ເງິນທຶນພວກກໍ່ການຮ້າຍ ຫຼື TFTC ໃນອາທິດນີ້, ສະຫະລັດ ໄດ້ຮຽກຮ້ອງບັນດາພັນທະມິດໃນຕາເວັນອອກກາງໃຫ້ຂະຫຍາຍຄວາມພະຍາຍາມເພື່ອຕັດເງິນທຶນໃຫ້ພາຍ ນອກສຳລັບກຸ່ມຮາມາສ, ເຊິ່ງແມ່ນອົງການທີ່ໄດ້ທຳການໂຈມຕີຂະໜາດໃຫຍ່ຕໍ່ພົນລະເຮືອນ ອິສຣາແອລ ເມື່ອວັນທີ 7 ຕຸລາທີ່ຜ່ານມາ.
ກະຊວງການເງິນໄດ້ຮຽກຮ້ອງບັນດາປະເທດສະມາຊິກຂອງ TFTC ໃຫ້ໃຊ້ອິດທິພົນຂອງເຂົາເຈົ້າເພື່ອຕັດການຫຼັ່ງໄຫຼຂອງເງິນທຶນໄປໃຫ້ກຸ່ມຮາມາສ, ເຊິ່ງຄວບຄຸມເຂດກາຊາ, ທີ່ເປັນບ້ານຂອງປະຊາຊົນປາແລັສໄຕນປະມານສອງລ້ານສາມແສນຄົນ, ຜູ້ທີ່ໄດ້ຢູ່ພາຍໃນການລະດົມຍິງໃສ່ຢ່າງບໍ່ຢຸດຢັ້ງໂດຍ
ອິສຣາແອລ ເປັນເວລາດົນກວ່າສອງອາທິດແລ້ວ.
ສະຫະລັດ ໄດ້ຈັດພວກຮາມາສ ເປັນອົງການກໍ່ການຮ້າຍນັບຕັ້ງແຕ່ປີ 1997 ເປັນຕົ້ນມາ.
ຮອງລັດຖະມົນຕີກະຊວງການເງິນທີ່ຮັບຜິດຊອບສຳລັບລັດທິກໍ່ການຮ້າຍ ແລະ ການສືບລັບດ້ານການເງິນ ທ່ານ ບຣາຍອັນ ແນລສັນ ໄດ້ກ່າວໃນຖະແຫຼງການທີ່ຖືກເປີດເຜີຍຕໍ່ກຸ່ມດັ່ງກ່າວໃນວັນອົງຄານທີ່ຜ່ານມາວ່າ “ຈາກທັດສະນະຄະຕິຂອງພວກເຮົາ, ການບໍ່ດຳເນີນການຕໍ່ກຸ່ມຮາມາສ ແລະ ລັດທິກໍ່ການຮ້າຍຂອງພວກເຂົາແມ່ນອັນຕະລາຍຕໍ່ປະຊາຊົນ ປາແລັສໄຕນ.”
ທ່ານກ່າວຕື່ມວ່າ “ຈາກທັດສະນະດ້ານການເງິນ, ພວກເຮົາສາມາດເຫັນໄດ້ຢ່າງຈະແຈ້ງວ່າກຸ່ມຮາມາສ ໄດ້ສ້າງຄວາມລຳບາກທາງເສດຖະກິດເປັນເວລາຫຼາຍທົດສະວັດຢ່າງຮຸນແຮງໃນເຂດກາຊາ, ດ້ວຍການຫັນການຊ່ວຍເຫຼືອດ້ານມະນຸດສະທຳໄປສະໜັບສະໜູນການຕໍ່ສູ້ກໍ່ການຮ້າຍຂອງພວກເຂົາ, ແລະ ພວກເຮົາຕ້ອງປະນາມການກະທຳດັ່ງກ່າວນີ້ຢ່າງເປີດເຜີຍ.”
ກຸ່ມ TFTC ປະກອບມີປະເທດ ບາເຣນ, ຄູເຫວດ, ໂອມານ, ກາຕ້າ, ຊາອຸດີ ອາຣາເບຍ, ສະຫະລັດ ອາຣັບ ເອມີເຣັສ, ແລະ ສະຫະລັດ.
