ລັດຖະມົນຕີປ້ອງກັນປະເທດສະຫະລັດ ທ່ານ Robert Gates ເດີນທາງໄປຮອດນະຄອນຫລວງປັກກິ່ງຂອງຈີນ ໃນວັນອາທິດມື້ນີ້ ເພື່ອຢ້ຽມເປັນເວລາ 3 ມື້ ທີ່ແນໃສ່ເພື່ອປັບປຸງສາຍພົວພັນທາງທະທານລະຫວ່າງວໍຊິງຕັນກັບປັກກິ່ງໃຫ້ດີຂຶ້ນ.
ໃນຂະນະທີ່ຢ້ຽມຢາມປັກກິງນັ້ນ ທ່ານ Gates ມີໝາຍກໍານົດທີ່ຈະພົບປະກັບທ່ານຫູຈິນເຖົາ ປະທານປະເທດຈີນ ແລະເຈົ້າໜ້າທີ່ອື່ນໆຂອງຈີນ. ທ່ານຍັງ ວາງແຜນທີ່ຈະທໍາຄວາມພະຍາຍາມຕື່ມອີກເພື່ອເກ້ຍກ່ອມໃຫ້ກອງທັບຈີນສ້າງຕັ້ງ ການສື່ສານທີ່ໝັ້ນຄົງກັບສະຫະລັດ ເພື່ອປ້ອງກັນບໍ່ໃຫ້ເກີດການເຂົ້າໃຈຜິດກັນ ທີ່ອາດສາມາດພາໃຫ້ເກີດການປະເຊີນໜ້າກັນໄດ້ນັ້ນ.
ໃນການກ່າວກັບບັນດານັກຂ່າວ ຢູ່ເທິງເຮືອບິນໃນລະຫວ່າງການເດີນທາງໃນວັນເສົາວານນີ້ ທ່ານ Gates ໄດ້ສະແດງຄວາມເປັນຫ່ວງອອກມາກ່ຽວກັບອາວຸດຍຸດໂທປະກອນເທັກໂນໂລຈີຂັ້ນສູງ ຫລ້າສຸດຂອງຈີນ ຊຶ່ງທ່ານກ່າວວ່າ ຈີນປາກົດວ່າໄດ້ທໍາຄວາມຄືບໜ້າ ໃນການຜະລິດເຮືອບິນລົບໄອພົ່ນ Stealth ລໍາທໍາອິດຂອງຕົນ ຫລາຍກວ່າທີ່ໄດ້ຄຶດກັນມາກ່ອນ ແລະທ່ານໄດ້ກ່າວເຖິງຄວາມຄືບໜ້າອື່ນໆທາງດ້ານທະຫານຂອງຈີນ ເຊ່ນລູກສອນໄຟຕໍ່ຕ້ານເຮືອນັ້ນ ວ່າເປັນເລື້ອງທີ່ໜ້າເປັນຫ່ວງເຊ່ນກັນ.
ການຢ້ຽມຢາມຈີນຂອງທ່ານ Gates ມີຂຶ້ນ 1 ສັບປະດາກ່ອນກໍານົດການຢ້ຽມຢາມກຸງວໍຊິງ ຕັນຂອງທ່ານຫູຈິນເຖົາ ປະທານປະເທດຈີນ.
