ທຳນຽບຂາວກ່າວວ່າ ປະທານາທິບໍດີສະຫະລັດ ທ່ານບາຣັກ ໂອບາມາ ຈະເປັນເຈົ້າພາບ ຕ້ອນຮັບພວກຜູ້ນຳ ຂອງບັນດາປະເທດ ຈາກເຂດເອເຊຍຕາເວັນອອກສຽງໃຕ້ ຫຼືສະມາຄົມອາຊ່ຽນ ຢູ່ທີ່ນະຄອນນິວຢອກ ໃນເດືອນນີ້.
ໃນຖະແຫຼງຂ່າວສະບັບນຶ່ງ ທີ່ນຳອອກເຜີຍແຜ່ ໃນມື້ວັນສຸກວານນີ້ ທຳນຽບຂາວ ໃຫ້ຂໍ້ສັງເກດວ່າ ການພົບປະ ໃນວັນທີ 24 ກັນຍາ ຈະມີຂຶ້ນຢູ່ຂ້າງນອກ ຂອງກອງປະຊຸມ ສະມັດຊາໃຫຍ່ ອົງການສະຫະປະຊາຊາດ.
ການພົບປະສຸດຍອດທີ່ວ່ານີ້ ຈະເປັນຄັ້ງທີ 2 ລະຫວ່າງສະຫະລັດ ແລະບັນດາສະມາຊິກ 10 ປະເທດ ຂອງສະມາຄົມອາຊ່ຽນ ລຸນຫຼັງການພົບ ທີ່ສິງກະໂປ ໃນປີກາຍ.
ທຳນຽບຂາວກ່າວວ່າ ການພົບປະກັນ ໃນປີກາຍນີ້ ໄດ້ພາໃຫ້ມີການຕົກລົງ ເພີ້ມການຮ່ວມມື ໃນຫຼາຍໆຂົງເຂດວຽກງານ ຮວມທັງການຄ້າ ພະລັງງານ ແລະຄວາມໝັ້ນຄົງ.
ທຳນຽບຂາວເວົ້າວ່າ ປະທານາທິບໍດີໂອບາມາ ຫວັງວ່າ ຈະໄດ້ດຳເນີນງານຮ່ວມກັບ ພວກຜູ້ນຳຂອງອາຊ່ຽນ ເພື່ອຊັ່ງຊາຕີລາຄາ ເບິ່ງຄວາມກ້າວໜ້າ ກ່ຽວກັບບັນຫາຕ່າງໆ ແລະກຳນົດຊ່ອງທາງເ ພື່ອຈະເສີມຂະຫຍາຍ ຄວາມສຳພັນ ໃຫ້ແໜ້ນແຟ້ນຍິ່ງຂຶ້ນ.
