ອະດີດປະທານກອງປະຊຸມສະມັດຊາໃຫຍ່ ອົງການສະຫະ
ປະຊາຊາດ ໄດ້ຖືກຈັບກຸມ ຢູ່ໃນນະຄອນນິວຢອກ ແລະຖືກ
ກ່າວຫາວ່າ ຮັບສິນບົນ ຫຼາຍກວ່ານຶ່ງລ້ານໂດລາ ແລະທຳການ
ສໍ້ໂກງພາສີ ໃນແຜນການສົ່ງເສີມຜົນປະໂຫຍດນັກທຸລະກິດຈີນ
ຄົນນຶ່ງ ເປັນເວລາຫຼາຍປີຜ່ານມານີ້.
ບັນດາເຈົ້າໜ້າທີ່ ກ່າວວ່າ ທ່ານ John Ashe ອາຍຸ 61 ປີ ເຄີຍ
ເປັນເອກອັກຄະລັດຖະທູດ ປະຈຳອົງການສະຫະປະຊາຊາດ
ຈາກປະເທດອັງຕີກົວແລະບາບູດາ ແຕ່ປີ 2004 ຈົນເຖິງເວລາທີ່
ໄດ້ຖືກເລືອກ ໃຫ້ເປັນປະທານສະມັດຊາໃຫຍ່ອົງການສະຫະ
ປະຊາຊາດສະໄໝທີ 68 ໃນປີ 2013. ທ່ານໄດ້ຖືກຈັບກຸມ ເມື່ອ
ຕອນເຊົ້າ ວັນອັງຄານວານນີ້ ຢູ່ທີ່ເຮືອນຂອງຜູ້ກ່ຽວ ໃນເຂດຊານເມືອງນະຄອນນິວຢອກ.
ຢູ່ໃນສຳນວນຟ້ອງ 37 ໜ້ານັ້ນ ທ່ານ Preet Bharara ໄອຍະການສະຫະລັດ ໃນເຂດພາກ
ໃຕ້ຂອງນະຄອນນິວຢອກ ໄດ້ໃຫ້ລາຍລະອຽດກ່ຽວກັບຂໍ້ກ່າວຫາຕໍ່ທ່ານ Ashe ທີ່ປະກອບມີ
ການຮັບສິນບົນຢ່າງນ້ອຍ 1 ລ້ານ 3 ແສນໂດລາ ໃນປີ 2013 ແລະ 2014 ແລະ ບໍ່ໄດ້ເສຍ
ພາສີ ໃຫ້ສະຫະລັດ ສຳຫລັບເງິນຈຳນວນດັ່ງກ່າວ.
ທ່ານ Bharara ກ່າວຢູ່ທີ່ກອງປະຊຸມຖະແຫລງຂ່າວ ເພື່ອແຈ້ງໃຫ້ຊາບ ກ່ຽວກັບການຟ້ອງ
ຮ້ອງວ່າ "ຕາມທີ່ມີການກ່າວຫາ ທ່ານ John Ashe ຮັບເອົາໂມງ Rolexe ຫຼາຍໜ່ວຍ ຊຸດໃຫຍ່ທີ່ຕັດໃຫ້ສະເພາະຫຼາຍໂຕ ແລະ ເດີ່ນເຫຼັ້ນກິລາບານບ້ວງສ່ວນຕົວ ຊຶ່ງຜູ້ທີ່ເປັນປະທານສະມັດຊາ ໃຫຍ່ອົງການສະຫະປະຊາຊາດ ສະໄໝທີ 68 ໄດ້ຂາຍຕົວເອງ ແລະ ສະຖາບັນຂອງໂລກ ທີ່ຜູ້ກ່ຽວໄດ້ນຳພານັ້ນ."
