ກະຊວງຍຸຕິທຳສະຫະລັດ ໄດ້ຈັບກຸມພະນັກງານສັນຍາຈ້າງຂອງລັດຖະບານ ໂດຍກ່າວວ່າ ໄດ້ສົ່ງຂໍ້ມູນລັບ ໄປໃຫ້ແຫຼ່ງຂາວທາງອິນເຕີແນັດ.
ການປະກາດທີ່ວ່ານີ້ ແມ່ນມີຂຶ້ນໃນວັນຈັນວານນີ້ ໃນຂະນະທີ່ແຫຼ່ງຂ່າວທາງອິນເຕີແນັດ
The Intercept ໄດ້ລາຍງານວ່າ ເອກກະສານລັບທີ່ຕົນເກັບກຳມາໄດ້ນັ້ນ ໄດ້ສະແດງໃຫ້ເຫັນວ່າ ໜ່ວຍສືບລັບທາງທະຫານຂອງຣັດເຊຍ ແມ່ນໄດ້ພະຍາຍາມຢ່າງຜິດກົດໝາຍທີ່ຈະເຈາະເຂົ້າໄປໃນລະບົບການເກັບກຳຂໍ້ມູນ ຂອງການລົງຄະແນນເລືອກຕັ້ງ ກ່ອນການເລືອກຕັ້ງປີກາຍນີ້.
ເອກກະສານທີ່ຍື່ນໂດຍເຈົ້າໜ້າທີ່ສືບສວນພິເສດຂອງອົງການ FBI ໄດ້ກ່າວວ່າ ແມ່ຍິງທີ່ຖືກຈັບ Reality Leigh Winner ໄດ້ຍອມຮັບວ່າ ໄດ້ພິມເອກກະສານລັບສຸດຍອດທີ່ວ່ານີ້ ແລະສົ່ງໄປໃຫ້ແຫຼ່ງຂ່າວຕ່າງໆ.
ເອກກະສານດັ່ງກ່າວ ຍັງເວົ້າອີກວ່າ ປະຊາຄົມສືບລັບສະຫະລັດ ພິຈາລະນາໃນການສືບ ສວນວ່າ ມີ 6 ຄົນ ທີ່ໄດ້ພິມເອກກະສານລັບນີ້ ຮວມທັງນາງ Winner ແລະລາວໄດ້ສົ່ງຂໍ້ມູນທາງອີແມລໃຫ້ຜູ້ຕິດຕໍ່ ກັບແຫຼ່ງທີ່ບໍ່ເປີດເຜີຍຊື່.
ວັນທີ ທີ່ເອກກະສານທັງສອງກ່າວເຖິງ ໃນເອກກະສານທີ່ຍື່ນໄປນັ້ນ ແລະທີ່ອົງ
ການຂ່າວ Intercept ກ່າວອ້າງນັ້ນ ແມ່ນເປັນອັນດຽວກັນ.
ລັດຖະບານ ຍັງບໍ່ທັນ ໄດ້ກ່າວວ່າ ຈາກອົງການໃດແທ້ ທີ່ນາງ Winner ຖືກກ່າວຫາວ່າ ໄດ້ເອົາຂໍ້ມູນລັບທີ່ວ່ານີ້ ໂດຍກ່າວແຕ່ພຽງວ່າ ລາວໄດ້ຖືກແຕ່ງໃຫ້ປະຕິບັດໜ້າທີ່ ໃນສະ ຖານທີ່ແຫ່ງນຶ່ງ ຂອງລັດຖະບານສະຫະລັດ ໃນລັດ Georgia ເທົ່ານັ້ນ.
ໃນລາຍງານ ອົງການຂ່າວ Intercept ໄດ້ກ່າວວ່າ ເອກກະສານລັບສຸດຍອດຂອງ
ອົງການ NSA ທີ່ຕົນ ໄດ້ຮັບມານັ້ນ ແຈ້ງວ່າ ພວກເຈາະຂໍ້ມູນຣັດເຊຍ ໄດ້ໃຊ້ເວລາຫຼາຍໆເດືອນພະຍາຍາມທີ່ຈະເຂົ້າໄປໃນຄອມພິວເຕີ ທີ່ໃຊ້ໂດຍເຈົ້າໜ້າທີ່ຂົງເຂດ.
ຄວາມພະຍາຍາມທີ່ວ່ານີ້ ພົວພັນກັບໃນອັນທີ່ເອີ້ນວ່າ ເທັກນິກແບບກົນລວງ ທີ່ໃຊ້ລໍ້ຜູ້ຄົນແບບບໍ່ຮູ້ຕົວ ທີ່ກຳກັບຂໍ້ມູນທີ່ເຊັນເຂົ້າແລະອອກ ໄປໃຫ້ນັກເຈາະຂໍ້ມູນ ທີ່ສາມາດຈະເຂົ້າເຖິງຂໍ້ມູນຕ່າງໆ ໄດ້ນັ້ນ.
ອ່ານຂ່າວນີ້ເພີ້ມຕື່ມເປັນພາສາອັງກິດ
