ລິ້ງ ສຳຫລັບເຂົ້າຫາ

ວັນພະຫັດ, ໒໙ ກຸມພາ ໒໐໒໔

ຜູ້ຕ້ອງສົງໃສ ເປັນຄົນວາງລະເບີດ ຂອງອານກາອິດາ ເປັນນັກສືບ ເຮັດວຽກ ໃຫ້ສອງຝ່າຍ (ວີດີໂອ)


ຜູ້ໂດຍສານ ຍ່າງຜ່ານບ່ອນກວດຄວາມປອດໄພ ທີ່ສະໜາມບິນນາໆຊາດ Portland ລັດ Oregon (30 ເມສາ 2012)
ຜູ້ໂດຍສານ ຍ່າງຜ່ານບ່ອນກວດຄວາມປອດໄພ ທີ່ສະໜາມບິນນາໆຊາດ Portland ລັດ Oregon (30 ເມສາ 2012)

ລາຍ​ງານ​ສື່​ມວນ​ຊົນ​ສະຫະລັດ​ກ່າວ​ວ່າ ຜູ້​ຊາຍ​ທີ່​ຖືກ​ສົ່ງ​ມາ​ຈາກ​ສາຂາ​ນຶ່ງ​ຂອງ​ກຸ່ມ​ອານ​ກາ​ອິດາ​ໃນ​ເຢ​ເມນ ​ເພື່ອ​ທໍາລາຍ​ເຮືອບິນ​ໂດຍ​ສານທີ່​ບິນ​ມຸ້ງ​ໜ້າ​ມາ​ຍັງ​ສະຫະລັດ​ນັ້ນຄວາມ​ຈິງ​ແລ້ວ​ເປັນ​ນັກ​ສືບ​ໃຫ້​ທັງ​ສອງ​ຝ່າຍ​ທີ່​ແຊກ​ຊຶມ​ເຂົ້າ​ໄປ​ໃນ​ເຄືອ​ຂ່າຍ​ຂອງ​ກຸ່ມ​ກໍ່​ການ​ຮ້າຍແລະ​ຊັກຊວນ​ໃຫ້​ພວກ​ກໍ່​ການ​ຮ້າຍ​ໄວ້​ໃຈ​ລາວ ກ່ຽວ​ກັບ​ລູກ​ລະ​ເບີດ​ຊະນິດ​ໃໝ່ທີ່​ໄດ້​ອອກ​ແບບໃຫ້​ເລັດ​ລອດ​ຜ່ານລະ​ບົບຮັກສາ​ຄວາມ​ປອດ​ໄພໃນ​ສະໜາມ​ບິນ​ໄດ້​ນັ້ນ.

ບັນດາ​ເຈົ້າ​ໜ້າ​ທີ່​ສືບ​ຂ່າວ​ລັບ​ສະຫະລັດ​ແລະ​ຕ່າງປະ​ເທດ​ທີ່​ບໍ່​ບອກຊື່​ໃຫ້​ຮູ້ ກ່າວ​ໃນ​ວັນ​ອັງຄານ​ວານ​ນີ້​ວ່າ ນັກ​ສືບ​ຄົນ​ນີ້​ໄດ້​ເຮັດ​ວຽກ​ໃຫ້ພະ​ແນ​ກສືບ​ຂ່າວ​ລັບ​ຂອງ Saudi Arabia ​ແລະ​ໃຫ້​ອົງການ​ສືບ​ຂ່າວ​ລັບ CIA ຂອງ​ສະຫະລັດ ຊຶ່ງ​ພວກ​ເຈົ້າ​ໜ້າ​ທີ່​ເຫຼົ່າ​ນີ້​ກ່າວ​ວ່າ ລາວ​ທໍາທ່າ​ວ່າ​ຈະ​ເປັນ​ຜູ້​ວາງ​ລະ​ເບີດ​ສະລະ​ຊີບ ​ແລະ​ໄດ້​ອາສາ​ສະມັກ​ໃນ​ການ​ປະກອບ​ພາລະກິດ​ທີ່​ພົວພັນ​ກັບ​ວັດຖຸ​ລະ​ເບີດ​ທີ່​ຜູ້ກ່ຽວ​ຊຸກ​ເຊື່ອງໄວ້​ໃນ​ໂສ້ງ​ຊ້ອນ​ໃນ​ຂອງ​ລາວ. ນັກ​ສືບ​ຄົນ​ນີ້ ​ສາມາດ​ມອບ​ວັດຖຸ​ລະເບີດ​ທີ່​ທັນ​ສະໄໝ​ທີ່​ສຸດ​ຂອງ​ລາວ​ໃຫ້​ພວກ​ເຈົ້າ​ໜ້າ​ທີ່​ສະຫະລັດໄດ້ ຊຶ່ງ​ໃນ​ເວລາ​ນີ້ກໍາລັງ​ພາກັນ​ວິ​ເຄາະ​ເບິ່ງ​ລະ​ເບີດ​ດັ່ງກ່າວ​ໃນ​ຫ້ອງ​ຄົ້ນ​ຄວ້າ​ຂອງ​ອົງການສັນຕິ​ບານກາງ FBI ຂອງ​ສະຫະລັດ ​ທີ່​ຄ້າຍ​ທະຫານ Quantico ​ໃນ​ລັດ Virginia.

ພວກ​ເຈົ້າ​ໜ້າ​ທີ່​ເຫຼົ່າ​ນີ້​ກ່າວ​ວ່າ ນັກ​ສືບຄົນ​ນີ້ ​ໄດ້​ຮັບ​ຂ່າວ​ຂໍ້​ມູນເຊ່ນ​ກັນ​ທີ່​ພາ​ໃຫ້ການໂຈມ​ຕີທາງ​ອາກາດ​ ປະສົບ​ຜົນ​ສໍາ​ເລັດ​ໃນ​ວັນ​ອາທິດແລ້ວຕໍ່​ນາຍ Fahd Mohammed Ahmed al-Quso ຜູ້​ນໍາ​ເຄືອຂ່າຍ ອານ​ກາ​ອິດາ​ທີ່​ເຢນ​ເມນ​ນັ້ນ. ນາຍ Quso ເປັນ​ບຸກຄົນ​ ທີ່ທາງ​ການ​ຕ້ອງການ​ໂຕ​ມາ​ດໍາ​ເນີນ​ຄະດີ ກ່ຽວກັບ​ບົດ​ບາດຂອງ​ຜູ້ກ່ຽວ​ໃນ​ການວາງ​ລະ​ເບີດ​ໂຈມ​ຕີ​ກໍາ​ປັ່ນ​ລົບ USS Cole ຂອງ​ສະຫະລັດ​ໃນ​ປີ 2000 ທີ່​ຈອດ​ຢູ່​ນອກ​ຝັ່ງ​ທະ​ເລ​ຂອງ​ເຢ​ເມນ ຊຶ່ງ​ໄດ້​ເຮັດພວກ​ທະຫານເຮືອຂອງ​ສະຫະລັດ​ເສຍ​ຊີວິດ​ໄປ 17 ຄົນ.

ຊື່​ຂອງ​ນັກ​ສືບ​ລັບ​ຄົນ​ນີ້ ຍັງ​ບໍ່​ທັນ​ໄດ້​ເປີດ​ເຜີຍ​ໃຫ້​ຊາບ​ເທື່ອ ແຕ່​ບັນດາ​ເຈົ້າ​ໜ້ທີ່​ສະຫະລັດ​ທີ່​ບໍ່​ບອກ​ຊື່​ໃຫ້​ຮູ້ກ່າວ​ວ່າ ນັກ​ສືບ​ຄົນ​ນີ້ ​ໄດ້​ໃຊ້​ເວລາ​ຫຼາຍ​ສັບປະດາ ​ເພື່ອ​ໃຫ້​ໄດ້ຮັບ​ຄວາມ​ໄວ້ວາງ​ໃຈຈາກ​ພວກ​ສະມາຊິກ​ຂອງ​ເຄືອ​ຂ່າຍ​ອານ​ກາ​ອິດາ​ໃນ​ແຫຼມ​ອາຣາ​ເບຍນັ້ນ.

ລາຍ​ງານ​ຂ່າວ​ ສະ​ແດງ​ໃຫ້​ຮູ້​ວ່າ ລັດຖະບານ​ສະຫະລັດ​ໄດ້​ວາງ​ແຜນໄວ້​ກ່ອນ​ແລ້ວ ​ເພື່ອ​ຮັກສາ​ຄວາມ​ລັບ​ກ່ຽວ​ກັບ​ການວາງ​ລະ​ເບີດ​ນີ້ ​ແຕ່​ອົງການ​ຂ່າວ AP ​ໄດ້​ຮູ້ຈັກ​ເລື້ອງ​ວາງ​ລະ​ເບີດ​ໃນ​ສັບປະດາ​ຜ່ານ​ມາ​ນີ້. ອົງການ​ຂ່າວ​ດັ່ງກ່າວ​ໄດ້ຊັກ​ຊ້າ​ການ​ລາຍ​ງານເລື້ອງ​ນີ້​ໃຫ້​ຮູ້ ຕາມ​ຄໍາ​ຂໍ​ຮ້ອງ​ຂອງລັດຖະບານ​ທ່ານ​ໂອ​ບາ​ມາ.

XS
SM
MD
LG