ເຈົ້າໜ້າທີ່ສະຫະລັດຮັບຜິດຊອບ ກ່ຽວກັບເລື້ອງການເຮັດສົງ
ຄາມໃນອັຟການິສຖານ ກ່າວວ່າ ກຳລັງສະຫະລັດ ໄດ້ໂຈມຕີ
ໃນອັນທີ່ເຊື່ອກັນວ່າ ເປັນຄ້າຍຝຶກແອບທີ່ໃຫຍ່ທີ່ສຸດຂອງກຸ່ມ
ກໍ່ການຮ້າຍ ອາລກາອີດາ ເທົ່າທີ່ເຄີຍ ພົບເຫັນມາ ໃນໄລຍະ
14 ປີ ຂອງການເຮັດສົງຄາມຢູ່ໃນອັຟການິສຖານ.
ນາຍພົນ John Campbell ແຫ່ງກອງທັບບົກຂອງສະຫະລັດ
ກ່າວຕໍ່ໜັງສືພິມວໍຊິງຕັນໂພສຕ໌ສະບັບທີ່ອອກໃນວັນສຸກວານ
ນີ້ວ່າ ມີໜ່ວຍປະຕິບັດງານ ຂອງກຸ່ມກໍ່ການຮ້າຍອາລກາອີດາ
ປະມານ 160 ຄົນຖືກຂ້າຕາຍໃນການໂຈມຕີດັ່ງກ່າວທີ່ພົວພັນ
ກັບການໂຈມຕີທາງອາກາດຂອງສະຫະລັດຫຼາຍສິບຄັ້ງ ແລະ
ກຳລັງພິເສດປະມານ 200 ຄົນ.
ທ່ານກ່າວຕື່ມວ່າ ການປະຕິບັດງານທີ່ວ່ານີ້ ມີຂຶ້ນໃນລະຫວ່າງວັນທີ 11 ຕຸລາ ດ້ວຍການ
ໂຈມຕີບໍລິເວນຄ້າຍຝຶກແອບ ທີ່ກວມເອົາພື້ນທີ່ 80 ກິໂລແມັດມົນທົນ ໃກ້ເຂດຊາຍແດນ
ທາງໃຕ້ຂອງອັຟການິສຖານທີ່ຕິດກັບປາກິສຖານ. ຄ້າຍຝຶກແອບເຫຼົ່ານີ້ເຊື່ອວ່າຕັ້ງຂຶ້ນມາ
ໄດ້ນຶ່ງປີແລ້ວ.
ການປະຕິບັດງານນີ້ ມີຂຶ້ນພຽງບໍ່ເທົ່າໃດມື້ ກ່ອນທີ່ ປະທານາທິບໍດີ ບາຣັກ ໂອບາມາ ປະ
ກາດກ່ຽວກັບແຜນການທີ່ຈະຮັກສາກຳລັງທະຫານ 9,800 ຄົນໄວ້ໃນສ່ວນໃຫຍ່ຂອງອັຟ
ການິສຖານໄປຈົນຮອດປີ 2016 ແລະປະມານ 5,500 ຄົນ ໄປຈົນຮອດປີ 2017.
ນາຍພົນ Campbell ເວົ້າວ່າ ຄ້າຍຝຶກແອບເຫຼົ່ານີ້ແມ່ນຢູ່ໃນເຂດທີ່ທ່ານຄິດວ່າອາດຈະ
ບໍ່ມີໜ່ວຍປະຕິບັດງານ ຂອງກຸ່ມກໍ່ການຮ້າຍອາລກາອີດາຢູ່ເລີຍ. ສະຫະລັດໄດ້ກ່າວມາ
ເປັນເວລາດົນນານແລ້ວວ່າ ບໍ່ມີຮ່ອງຮອຍຫຍັງຫຼາຍທີ່ພາໃຫ້ເຊື່ອວ່າໜ່ວຍປະຕິບັດງານ
ຂອງກຸ່ມອາລກາອີດາທີ່ຍັງຫຼົງເຫລືອຢູ່ໃນອັຟການິສຖານໄດ້ຕັ້ງຢູ່ໃນຫຼາຍໆຮ່ອມພູທາງ
ພາກຕາເວັນອອກຂອງປະເທດດັ່ງກ່າວ.
ໜັງສືພິມວໍຊິງຕັນໂພສຕ໌ ກ່າວວ່າ ຂໍ້ມູນໃໝ່ໄດ້ກໍ່ໃຫ້ເກີດມີຄຳຖາມກ່ຽວກັບປະສິດທິພາບ
ໃນການຊອກຫາແລະໂຈມຕີພວກຫົວຮຸນແຮງຈຸນີ້ ໂດຍກອງກຳລັງສະຫະລັດ 14 ປີຫລັງ
ຈາກການໂຈມຕີໃນວັນທີ 11 ກັນຍາ ປີ 2001 ຢູ່ສະຫະລັດ ທີ່ເຮັດໃຫ້ກອງທັບສະຫະລັດ
ເປີດສາກໂຈມຕີຕໍ່ພວກຫົວຮຸນແຮງ ທີ່ມີຖານປະຕິບັດງານຢູ່ອັຟການິສຖານຈຸນີ້.
