ເຈົ້າໜ້າທີ່ທະຫານລະດັບສູງສຸດຂອງສະຫະລັດກ່າວວ່າ ກອງກຳລັງສະຫະລັດ ແລະອັຟການິສຖານ ກຳລັງທຳ ຄວາມພະຍາຍາມຢ່າງໃຫຍ່ຫລວງ ເພື່ອຊອກຫາທະຫານເຮືອ ອາເມຣິກັນສອງຄົນ ທີ່ຫາຍໄປຢູ່ໃນເຂດກໍ້າໃຕ້ຂອງ ນະຄອນຫລວງກາບູລເມື່ອວັນສຸກຜ່ານມານັ້ນ. ພົນເຮືອເອກ Mike Mullen ປະທານເສນາທິການຮ່ວມຂອງກອງທັບ ສະຫະລັດ ໄດ້ຖະແຫລງຕໍ່ພວກນັກຂ່າວຢູ່ນະຄອນຫລວງ ກາບູລ ໃນມື້ນີ້ ຫລັງຈາກທີ່ພວກຕາລີບານ ໄດ້ກ່າວວ່າ ຕົນໄດ້ຂ້າທະຫານອາເມຣິກັນຄົນນື່ງ ແລະຈັບອີກຄົນນື່ງໄວ້. ໂຄສົກກຸ່ມຕາລີບານເວົ້າວ່າ ທະຫານສອງຄົນນັ້ນໄດ້ເຂົ້າໄປໃນ ເຂດຄວບຄຸມ ຂອງພວກກະບົດ ຊຶ່ງໄດ້ກໍ່ໃຫ້ເກີດການຍິງຕໍ່ສູ້ກັນ ເຮັດໃຫ້ທະຫານອາເມຣິກັນຄົນນຶ່ງເສຍຊີວິດ.
ອົງການຂ່າວເອພີ ລາຍງານໃນວັນອາທິດມື້ນີ້ວ່າ ກຸ່ມຕາລີບານໄດ້ສະເໜີທີ່ຈະ ແລກສົບຂອງທະຫານອາເມຣິກັນ ກັບນັກໂທດຕາລີບານທີ່ຖືກກັກຂັງ.
ທະຫານເຮືອສະຫະລັດສອງຄົນນັ້ນໄດ້ຂັບລົດອອກຈາກຄ້າຍທີ່ນະຄອນຫລວງ ກາບູລໄປ ເມື່ອວັນສຸກຜ່ານມາ ແລ້ວກໍບໍ່ໄດ້ກັບຄືນມາອີກ. ເຈົ້າໜ້າທີ່ອັຟການິສ ຖານເວົ້າວ່າ ມີຄົນເຫັນທະຫານເຮືອສອງຄົນນັ້ນ ຂັບລົດຫຸ້ມເກາະເຂົ້າໄປໃນເຂດ Charkh ທີ່ຢູ່ໃຕ້ການຄວບຄຸມຂອງພວກກະບົດຕາລີບານ. ບັນດາວິທະຍຸທ້ອງຖິ່ນໄດ້ພາກັນອອກໂຄສະນາ ຂໍ້ສະເໜີໃຫ້ເງິນລາງວັນ 2 ໝື່ນ$ ຂອງສະຫະລັດ ສຳລັບຂໍ້ມູນທີ່ນຳໄປສູ່ການປ່ອຍໂຕສອງຄົນນັ້ນ ແຕ່ພົນເຮືອເອກ Mullen ກ່າວວ່າ ທ່ານບໍ່ໄດ້ຮູ້ວ່າໄດ້ມີການສະເໜີໃຫ້ເງິນລາງວັນໃດໆ.
