ກະຊວງການຕ່າງປະເທດສະຫະລັດກ່າວວ່າ ຕົນມີຄວາມໝັ້ນໃຈວ່າ ກອງປະຊຸມໃຫຍ່ຕາມປະເພນີຂອງບັນດາຜູ້ນໍາອັຟການີສຖານໃນສັບປະດານີ້ ຈະຢືນຢັນສາຍພົວພັນອັນໃກ້ຊິດລະຫວ່າງສະຫະລັດແລະອັຟການີສຖານນັ້ນ.
ພວກນັກການເມືອງອັຟການີສຖານ ພວກອາວຸໂສຊົນເຜົ່າ ແລະພວກຜູ້ນໍາປະຊາຄົມຕ່າງໆ ຈໍານວນຫລາຍກວ່າ 2 ພັນຄົນ ຈະໄປເຕົ້າໂຮມກັນຢູ່ນະຄອນຫລວງຄາບູລ ໃນວັນພຸດມື້ອື່ນນີ້ ເພື່ອເລີ້ມກອງປະຊຸມໃຫຍ່ປະຈໍາປີ ທີ່ເອີ້ນວ່າ loya jirga ເປັນເວລາຫລາຍມື້ເພື່ອທໍາການໂອ້ລົມສົນທະນາກັນເລື້ອງຄວາມສໍາພັນກັບສະຫະລັດອາເມຣິກາ ແລະຄວາມພະຍາຍາມໃນການປອງດອງກັນ ກັບພວກຕາລີບັນນັ້ນ.
ທ່ານ Mark Toner ໂຄສົກກະຊວງການຕ່າງປະເທດສະຫະລັດກ່າວ ໃນວັນຈັນວານນີ້
ວ່າ ສະຫະລັດມີຄວາມເຄົາລົບນັບຖືຢ່າງສູງທີ່ສຸດຕໍ່ກອງປະຊຸມນີ້ ແລະວ່າ ທ່ານມີຄວາມ
ໝັ້ນໃຈຫລາຍທີ່ສຸດວ່າ ກອງປະຊຸມດັ່ງກ່າວຈະຢືນຢັນອີກຄັ້ງໃໝ່ຕໍ່ການເປັນພາຄີກັນ
ຢ່າງແຂງແຮງລະຫວ່າງສອງປະເທດນັ້ນ.
ໃນວັນອາທິດຜ່ານມານີ້ ພວກຕາລີບັນອັຟການີສຖານໄດ້ຂົ່ມຂູ່ທີ່ຈະກໍ່ກວນທໍາລາຍ
ການພົບປະກັນນີ້ ໂດຍເປີດເຜີຍເອກກະສານຕ່າງໆອອກມາ ທີ່ກຸ່ມດັ່ງກ່າວເວົ້າວ່າ
ເປັນເອກະສານຈັດແຈງເລື້ອງການຮັກາສາຄວາມປອດໄພລະດັບສູງສຸດສໍາລັບກອງ
ປະຊຸມນີ້.
ທັງບັນດາເຈົ້າໜ້າທີ່ກຸ່ມເນໂຕ້ແລະອັຟການີສຖານ ໄດ້ປະຕິເສດຕໍ່ເອກກະສານເຫລົ່າ
ນັ້ນວ່າ ເປັນຂອງປອມ ໂດຍກ່າວວ່າ ການເປີດເຜີຍເອກກະສານດັ່ງກ່າວເປັນຄວາມ
ພະຍາຍາມອັນນຶ່ງເພື່ອນາບຂູ່ພວກທີ່ວາງແຜນຈະໄປຮ່ວມກອງປະຊຸມນີ້ໃຫ້ຢ້ານກົວ.
ບັນດາເຈົ້າໜ້າທີ່ອັຟການີສຖານໄດ້ເພີ່ມທະວີການຮັກສາຄວາມສະຫງົບຂຶ້ນລ່ວງໜ້າ
ກອງປະຊຸມ. ໃນມື້ວັນຈັນນັ້ນ ກໍາລັງຮັກສາຄວາມປອດໄພອັຟການີສຖານໄດ້ສັງຫານ
ຄົນຮ້າຍທີ່ພະຍາຍາມຈະວາງລະເບີດສະລະຊີບຄົນນຶ່ງຢູ່ນອກກອງປະຊຸມ Jirga
ແລະໄດ້ຈັບ ອີກ 2 ຄົນທີ່ຈະທໍາການໂຈມຕີຄືກັນ.
