ລິ້ງ ສຳຫລັບເຂົ້າຫາ

ຜບຊ ທະຫານອະເມຣິກັນ ໃນອັຟການິສຖານ ລາອອກ

  • ໄພສານ ວໍຣະຈັກ

ປະທານາທິບໍດີ ສະຫະລັດ ທ່ານບາຣັກ ໂອບາມາ ໄດ້ຮັບເອົາ ການລາອອກ ຂອງນາຍພົນ STANLEY McCHRYSTAL ຜູ້ບັນຊາການ ກຳລັງສະຫະລັດ ໃນອັຟການິສຖານ ຫຼັງຈາກ ວາລະສານ ສະບັບນຶ່ງ ໄດ້ລົງບົດຂຽນ​ ກ່ຽວ​ກັບ​ທ່ານ ຊຶ່ງ​ຢູ່​ໃນ​ນັ້ນ ນາຍພົນ McCHRYSTAL ແລະບັນດາ ຜູ້ຊ່ອຍຂອງ​ທ່ານ ໄດ້ໃຫ້ສຳພາດ ແບບເຍາະເຍີ້ຍຫົວຂວັນ ຕໍ່ສະມາຊິກ ຈຳນວນນຶ່ງ ໃນຄະນະ ລັດຖະບານ ຂອງທ່ານໂອບາມາ.

ປະທານາທິບໍດີ ສະຫະລັດ ກ່າວໃນມື້ວານນີ້ວ່າ ທ່ານໄດ້ແຕ່ງຕັ້ງ ນາຍພົນ DAVID PETRAEUS ຫົວໜ້າ​ກອງບັນຊາການ ສະຫະລັດ ສຳລັບເຂດພາກກາງ ຂອງ​ໂລກ ໃຫ້ເຂົ້າຮັບໜ້າທີ່ ແທນນາຍພົນ McCHRYSTAL. ທ່ານໂອບາມາ ໄດ້ຮ້ອງຂໍ ໃຫ້ສະພາສູງ ສະຫະລັດ ອະນຸມັດ ການແຕ່ງຕັ້ງ ຂອງທ່ານ ຢ່າງວ່ອງໄວ.

ປະທານາທິບໍດີ ໂອບາມາ ເວົ້າວ່າ ທ່ານໄດ້ຮັບເອົາ ການລາອອກ ຂອງນາຍພົນ McCHRYSTAL ດ້ວຍຄວາມເສຍໃຈ ຢ່າງໃຫຍ່ ແຕ່ມັນກໍເປັນ ສິ່ງທີ່ຖືກຕ້ອງ ສຳລັບການ ປະຕິບັດງານ ຂອງສະຫະລັດ ໃນອັຟການິສຖານ ສຳລັບກອງທັບ ສະຫະລັດ ແລະສຳລັບ ສະຫະລັດ ນຳດ້ວຍ.

ປະທານາທິບໍດີ ໂອບາມາ ໃຫ້ທັດສະນະດັ່ງກ່າວ ຫຼັງຈາກ ໄດ້ພົບປະ ກັບນາຍພົນ McCHRYSTAL ທີ່ທຳນຽບຂາວ.

ໃນບົດ​ຂຽນ ທີ່ພິມເຜີຍແຜ່ ໂດຍວາລະສານ ROLLING STONE ນັ້ນ ນາຍພົນ McCHRYSTAL ແລະພວກຜູ້ຊ່ອຍ ຂອງທ່ານ ໄດ້ໃຫ້ສຳພາດ ແບບເຍາະເຍີ້ຍ ຫົວຂວັນ ກ່ຽວກັບ ຮອງປະທານາທິບໍດີ ໂຈ ໄບເດັນ ​ແລະທີ່ປຶກສາ ດ້ານຄວາມໝັ້ນຄົງ ແຫ່ງຊາດ ຂອງສະຫະລັດ ທ່ານ JAMES JONES ພ້ອມ​ກັບ ເອກອັກຄະລັດຖະທູດ ສະຫະລັດ ປະຈຳ ອັຟການິສຖານ ທ່ານ KARL EIKENBERRY ແລະ​ຄົນ​ອື່ນໆ​ອີກ ຫຼາຍໆຄົນ.

ໃນອີກດ້ານນຶ່ງ ນາຍພົນໂທ NICK PARKER ຂອງອັງກິດ ​ໄດ້​ເຂົ້າກຳໜ້າທີ່ ຜູ້ບັນຊາການ ກຳລັງເນໂຕ້ ໃນອັຟການິສຖານ ເປັນການຊົ່ວຄາວ ຫຼັງຈາກນາຍພົນ McCHRYSTAL ລາອອກ. ເຈົ້າໜ້າທີ່ອັງກິດ ກ່າວວ່າ ນາຍພົນ PARKER ເຂົ້າດຳລົງຕຳແໜ່ງ ຜູ້ບັນຊາການ ໃນລະຫວ່າງ ທີ່ລໍຖ້າ ການຮັບຮອງ​ ເອົາການແຕ່ງຕັ້ງ ນາຍພົນ PETRAEUS ​ໂດຍສະພາສູງ ສະຫະລັດ.

XS
SM
MD
LG