ລິ້ງ ສຳຫລັບເຂົ້າຫາ

ສຫລ ປະກາດໃຫ້ ອັຟການິສຖານ ເປັນພັນທະມິດ ທີ່ສຳຄັນ ນອກກຸ່ມເນໂຕ້

  • ໄພສານ ວໍຣະຈັກ

ລັດຖະມົນຕີການຕ່າງປະເທດສະຫະລັດທ່ານນາງ Hillary Clinton (ຊ້າຍ) ແລະປະທານາທິບໍດີ Hamid Karzai ແຫ່ງ ອັຟການິສຖານ ພວມພາກັນຍ່າງໄປກອງປະຊຸມຖະແຫຼງຂ່າວ ທີ່ທຳນຽບປະທານາທິບໍດີ ໃນນະຄອນຫຼວງກາບູລ (7 ກໍລະກົດ 2012)

ວໍ​ຊິງ​ຕັນ​ໄດ້​ປະກາດ​ໃຫ້​ອັຟກາ​ນິສຖານ​ເປັນ​ປະ​ເທດ​ພັນທະ​ມິດ​ສຳຄັນທີ່​ບໍ່​ແມ່ນອົງການ​ເນ​ໂຕ້
​ຂອງ​ສະຫະລັດ ຊຶ່ງ​ຈະ​ອຳນວຍໃຫ້​ອັຟກາ​ນິສຖານ​ທີ່​ໄດ້​ຮັບ​ຄວາມ​ເສຍຫາຍຈາກ​ເສິກ​ສົງຄາມ​
ນັ້ນ ​ເຂົ້າຢູ່​ໃນໂຄງ​ຮ່າງ​ການ​ຮ່ວມ​ມື​ໄລຍະ​ຍາວ​ດ້ານຄວາມ​ໝັ້ນຄົງ​ ແລະ​ດ້ານ​ປ້ອງ​ກັນ​ປະ​ເທດ
ກັບ​ສະຫະລັດ.

ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານ​ນາງ Hillary Clinton ​ໄດ້​ປະກາດ​ກ່ຽວ​ກັບ
​ສະຖານະ​ພາບ​ໃໝ່ ທີ່​ນະຄອນຫຼວງກາ​ບູລ​ໃນ​ວັນ​ເສົາ​ມື້ນີ້ ບ່ອນ​ທີ່ທ່ານ​ນາງ​ໄດ້​ເຈລະຈາ​ຫາ
ລື​ກັບ​ປະທານາທິບໍດີ Hamid Karzai.

ທ່ານ​ນາງໄດ້​ກ່າວ ລຸນ​ຫຼັງການ​ພົບ​ປະ​ກັບ​ປະທາ​ນາ​ທິບໍດີ Karzai ວ່າ ອັຟການິສຖານ​ຈະ​
ບໍ່​ສາມາດ​ເປັນ​ບ່ອນ​ຫຼົບລີ້ ທີ່​ປອດ​ໄພ​ໄດ້​ອີກ ສຳ​ຫຼັບກຸ່ມ​ກໍ່​ການ​ຮ້າຍອາລກາຍ​ດາ ​ແລະ​ກຸ່ມ​
ກໍ່​ການ​ຮ້າຍ​ຂ້າມ​ຊາດ​ອື່ນໆ ທີ່​ເປັນ​ໄພ​ຂົ່ມຂູ່​ຕໍ່​ສະຫະລັດ ຕໍ່​ພູມີພາກ ​ແລະ​ຕໍ່​ໂລກ​ມະນຸດ.

ທ່ານ​ນາງ Clinton ​ເວົ້າວ່າ ສະຖານະພາບໃໝ່ນີ້ ​ແມ່ນ​ສັນຍາ​ລັກ​ທີ່​ມີ​ອິດ​ທິພົນ ກ່ຽວ​ກັບ​
ຄວາມ​ໝາຍໝັ້ນຂອງ​ວໍ​ຊິງ​ຕັນ ​ຕໍ່​ອະນາຄົດ​ຂອງ​ອັຟກາ​ນິສຖານ ໂດຍ​ກ່າວຕື່ມ​ວ່າ ສະຫະ
ລັດ​ຈະ​ບໍ່​ປະຖິ້ມອັຟກາ​ນິສຖານ. ຮວມຢູ່​ໃນ​ບັນດາ​ປະ​ເທດ​ທີ່​ສະຫະລັດ​ໄດ້​ປະກາດໃຫ້​ເປັນ
ພັນທະ​ມິດ​ສຳຄັນນອກກຸ່ມ​ເນ​ໂຕ້ ກໍ​ມີ​ອີ​ຈິບ ອິສຣາແອ​ລ ຍີ່ປຸ່ນ ​ແລະ​ປາ​ກິ​ສຖານ.

ຈາກ​ນະຄອນຫຼວງກາ​ບູລ ທ່ານ​ນາງ Clinton ຈະ​ເດີນທາງ​ໄປ​ຍັງ​ປະ​ເທດ​ຍີ່ປຸ່ນ ​ເພື່ອ​ເຂົ້າ
ຮ່ວມ​ກອງ​ປະຊຸມ​ໃຫ້​ຄວາມ​ຊ່ອຍ​ເຫຼືອ​ແກ່​ພົນ​ລະ​ເຮືອນ​ອັຟກາ​ນິສ ຖານ. ​ເປັນ​ທີ່​ຄາດ​ກັນ
​ວ່າ ບັນດາ​ປະ​ເທດ​ແລະ​ອົງການ​ໃຫ້​ຄວາມ​ຊ່ອຍເຫຼືອຕ່າງໆ​ ຈະ​ໃຫ້​ຄຳ​ໝັ້ນສັນຍາ 4 ພັນ
​ລ້ານ​ໂດ​ລາ​ຕໍ່​ປີ ​ໃນ​ການ​ໃຫ້​ຄວາມ​ສະໜັບສະ​ໜຸນ​ໄລຍະ​ຍາວ​ ຕໍ່​ພົນລະ​ເຮືອນ​ໃນ​ອັຟກາ​
ນິສຖານ.

ທ່ານ​ນາງ​ໄດ້​ຢຸດ​ແວ່​ ແບບ​ບໍ່​ມີ​ການ​ປະກາດ​ໃຫ້​ຊາບ​ລ່ວງ​ໜ້າ​ ທີ່​ນະຄອນຫຼວງກາບູລ​ໃນ
​ວັນ​ເສົາ​ມື້ນີ້ ລຸນ​ຫຼັງ​ໄດ້​ເດີນທາງ​ອອກ​ຈາກ​ກຸງ​ປາຣີບ່ອນ​ທີ່​ທ່ານ​ນາງ​ໄດ້ເຂົ້າຮ່ວມ​ກອງ​ປະ
ຊຸມ​ຂອງ​ປະ​ເທດ​ຕ່າງໆ​ກ່ຽວ​ກັບ​ເລື່ອງ​ຊີ​ເຣຍ.

XS
SM
MD
LG