ສະຫະລັດແລະອັຟການິສຖານໄດ້ລົງນາມໃນຂໍ້ຕົກລົງກັນສະບັບນຶ່ງໃນວັນອາທິດວານນີ້ ມອບໃຫ້ອັຟການິສຖານເປັນຜູ້ກໍາກັບດູແລນໍາການປະຕິບັດງານພິເສດ ຮວມທັງການບຸກເຂົ້າກວດຄົ້ນໃນຍາມກາງຄືນໃນບ້ານເຮືອນຂອງຊາວອັຟການິສຖານ ທີ່ເປັນບັນຫາໂຕ້ແຍ່ງກັນແລະແຫຼ່ງທີ່ມາທີ່ສໍາຄັນຂອງການຂັດແຍ່ງລະຫວ່າງສອງຝ່າຍນັ້ນ.
ທ່ານ Abdul Rahim Wardak ລັດຖະມົນຕີປ້ອງກັນປະເທດອັຟການິສຖານແລະນາຍພົນສະຫະລັດ ທ່ານ John Allen ຊຶ່ງເປັນຜູ້ບັນຊາການກອງກໍາລັງກຸ່ມເນໂຕ້ໃນອັຟການິສຖານ ໄດ້ລົງນາມໃນຂໍ້ຕົກລົງດັ່ງກ່າວໃນພິທີທີ່ມີຂຶ້ນໃນກຸງຄາບູລ.
ຂໍ້ຕົກລົງດັ່ງກ່າວປາກົດວ່າ ອໍານວຍໃຫ້ທາງການອັຟການິສຖານມີສິດຍັບຍັ້ງການປະຕິບັດງານທາງທະຫານ ທີ່ໄດ້ວາງແຜນໄວ້ນັ້ນໄດ້ ພ້ອມທັງອະນຸມັດໃຫ້ຈັດຕັ້ງກຸ່ມປະສານງານເລື່ອງປະຕິບັດການຂອງອັຟກາ ນິສຖານຂຶ້ນມາ ທີ່ຈະເປັນຝ່າຍໃຫ້ການອະນຸມັດແຜນການປະຕິບັດງານພິເສດຕ່າງໆ ຊຶ່ງຈະດໍາເນີນການໂດຍກໍາລັງອັຟການິສຖານ ໂດຍໄດ້ຮັບການສະໜັບສະໜຸນຈາກກໍາລັງສະຫະລັດ ແລະໃຫ້ສອດຄ່ອງກັບກົດໝາຍຂອງອັຟການິສຖານ. ນອກນັ້ນ ຂໍ້ຕົກລົງດັ່ງກ່າວຍັງບົ່ງໄວ້ວ່າ ພວກກໍາລັງສະຫະລັດຈະປະກອບສ່ວນກັບກໍາລັງຮັກສາຄວາມປອດໄພຂອງອັຟການິສຖານໃນການບຸກເຂົ້າກວດຄົ້ນບ້ານເຮືອນສ່ວນຕົວຂອງຊາວອັຟການິສຖານໄດ້ໃນສະເພາະກໍລະນີທີ່ຈໍາເປັນແລະມີການຮ້ອງຂໍເທົ່ານັ້ນ.
ນອກນັ້ນຂໍ້ຕົກລົງດັ່ງກ່າວຍັງອະນຸມັດໃຫ້ທາງການອັຟການິສຖານມີປາກສຽງຫຼາຍຂຶ້ນໃນເລື່ອງການປະຕິບັດຕໍ່ພວກທີ່ຖືກຈັບກຸມນັ້ນ.