ລັດຖະມົນຕີປ່ອງກັນປະເທດສະຫະລັດ ທ່ານໂຣເບີຕ ເກດສ໌ ທີ່ກໍາລັງຈະພົ້ນຈາກຕໍາແໜ່ງ ທໍາການສັ່ງລາເປັນຄັ້ງສຸດທ້າຍຕໍ່ທະຫານສະຫະລັດໃນອັຟການີສຖານ ໂດຍໄດ້ບິນໄປຍັງຖານທັບແຫ່ງນຶ່ງໃນແຂວງ Paktika ຕິດກັບກັບຊາຍແດນປາກີສຖານ.
ຖານທັບດັ່ງກ່າວ ຕັ້ງຢູ່ໃນເຂດສອກຫລີກຫ່າງໄກແລະອັນຕະລາຍຂອງ ເມືອງ Omnah ໃນແຂວງ Paktika.
ລັດຖະມົນຕີປ້ອງກັນປະເທດ ເກດສ໌ ຊຶ່ງຈະລາອອກກິນເບ້ຍບໍານານໃນທ້າຍເດືອນນີ້ ໄດ້ໄປຢ້ຽມຢາມພາກໃຕ້ຂອງອັຟການີສຖານໃນວັນອາທິດວານນີ້. ໃນຖ້ອຍຖະແຫລງຂອງທ່ານໃນລະຫວ່າງການຢ້ຽມຢາມຖານທັບແຫ່ງຕ່າງໆໃນແຂວງກັນດາຮາ ແລະແຂວງ Helmand ນັ້ນ ທ່ານເກດສ໌ກ່າວວ່າ ການຖອນທະຫານສະຫະລັດອອກຈາກອັຟການີສ ຖານຊຶ່ງຈະເລີ້ມຂຶ້ນໃນໄວໆນີ້ ຄວນຈະເລີ້ມດ້ວຍການຖອນພວກກອງ ກໍາລັງສະໜັບສະໜຸນອອກໄປ ບໍ່ແມ່ນທະຫານໜ່ວຍສູ້ລົບ.
ນອກນັ້ນ ທ່ານເກດສ໌ຍັງກ່າວເຕືອນປະທານາທິບໍດີ Hamid Karzai ວ່າ ປະເທດຂອງທ່ານຕ້ອງເພີ່ມການຮັກສາຄວາມປອດໄພຂຶ້ນ ແລະວ່າ ການບໍ່ເອົາມາດຕະການດັ່ງກ່າວຈະ ເຮັດໃຫ້ການຖອນທະຫານຂອງສະຫະລັດອອກຢ່າງລາບລື່ນຕົກຢູ່ໃນການສ່ຽງໄພ.
ພວກຜູ້ບັນຊາການສະໜາມທີ່ຖານທັບທັງສອງແຫ່ງ ກ່າວວ່າ ເຂົາເຈົ້າ ໄດ້ເຫັນຄວາມກ້າວໜ້າໃນການຮັກສາຄວາມປອດໄພຫລາຍສົມຄວນ ແຕ່ຄວາມຮຸນແຮງກໍຍັງດໍາເນີນຢູ່ຕໍ່ໄປ. ໃນວັນອາທິດວານນີ້ ທະຫານຂອງກຸ່ມເນໂຕ້ 4 ຄົນເສຍຊີວິດໃນພາກໃຕ້ແລະໃນພາກຕາເວັນອອກຂອງອັຟການີສຖານ.
