ປະທານາທິບໍດີ ບາຣັກໂອບາມາກໍານົດຈະປະກາດແຜນການຖອນທະຫານຂັ້ນຕົ້ນອອກຈາກອັຟການີສຖານໃນວັນພຸດມື້ນີ້ ຊຶ່ງອາດຈະມີທະຫານສະຫະລັດຈໍານວນຫລາຍເຖິງ 10 ພັນຄົນຖອນອອກຈາກອັຟການີສຖານພາຍໃນທ້າຍປີນີ້.
ໄດ້ມີການອ້າງຄໍາເວົ້າຂອງພວກເຈົ້າໜ້າທີ່ປ້ອງກັນປະເທດທີ່ກ່າວວ່າ ທ່ານໂອບາມາຈະສັ່ງ
ໃຫ້ຖອນກໍາລັງຂອງສະຫະລັດຂັ້ນຕົ້ນຫລືຊຸດທໍາອິດ ຈໍານວນ 5 ພັນຄົນ ແລະຊຸດທີສອງ
ຕື່ມອີກ 5 ພັນຄົນພາຍໃນທ້າຍປີ 2011 ນີ້.
ແຕ່ທ່ານ Jay Carney ໂຄສົກປະຈໍາທໍານຽບຂາວເຕືອນກ່ຽວກັບການວິພາກວິຈານຂອງສື່ມວນຊົນໃນວັນອັງຄານວານນີ້ໂດຍກ່າວວ່າ ປະທານາທິບໍດີຈະໃຫ້ຄໍາຊີ້ແຈງກ່ຽວກັບວິທີ ທີ່ທ່ານຈະຈັດຕັ້ງປະຕິບັດຍຸດທະສາດທີ່ທ່ານໄດ້ປະກາດໃຫ້ຊາບໃນເດືອນທັນວາປີ 2009 ນັ້ນ ກ່ຽວກັບການຖອນທະຫານອະເມຣິກັນອອກນັ້ນ.
ທ່ານໂອບາມາໄດ້ປະກາດໃຫ້ຮູ້ ກ່ຽວກັບການລິເລີ້ມຖອນທະຫານອອກໃນເດືອນກໍລະກົດນີ້
ເມື່ອເດືອນທັນວາປີ 2009 ເວລາທ່ານສະເໜີຍຸດທະສາດທົ່ວໄປຂອງທ່ານສໍາລັບອັຟການີສ
ຖານທີ່ໂຮງຮຽນນາຍຮ້ອຍທະຫານບົກຂອງສະຫະລັດທີ່ West Point ລັດນີວຢອກນັ້ນ.
ໃນຄໍາປາໄສຂອງທ່ານທີ່ທໍານຽບຂາວໃນແລງວັນພຸດມື້ນີ້ ຄາດເຊ່ນກັນວ່າປະທານາທິບໍດີໂອບາມາຈະຢືນຢັນອີກຄັ້ງໃໝ່ເຖິງຄວາມໝັ້ນໝາຍຂອງສະຫະລັດແລະກຸ່ມເນໂຕ້ທີ່ຈະມອບ
ຄວາມຮັບຜິດຊອບດ້ານຄວາມປອດໄພຢ່າງຮອບດ້ານໃຫ້ທະຫານອັຟການີສຖານພາຍໃນປີ 2014ນັ້ນ. ປັດຈຸບັນນີ້ ສະຫະລັດມີທະຫານປະມານ 1 ແສນຄົນປະຈໍາການຢູ່ໃນອັຟການີສຖານ.
ທ່ານ Robert Gates ລັດຖະມົນຕີປ້ອງກັນປະເທດສະຫະລັດກ່າວໃນວັນອັງຄານວານນີ້ວ່າ ປະທານາທິບໍດີຈະຕ້ອງຄໍານຶງເຖິງການໄດ້ ຮັບຄວາມສະໜັບສະໜຸນພາຍໃນປະເທດທັງ
ຢູ່ໃນລັດຖະສະພາແລະໃນໝູ່ປະຊາຊົນອະເມລິກັນ ຕະຫລອດທັງສະພາບການທາງພາກພື້ນ
ດິນໃນອັຟການີສຖານນັ້ນນໍາ.
