ທ່ານ Robert Gates ລັດຖະມົນຕີປ້ອງກັນປະເທດ
ສະຫະລັດໄດ້ທໍາການຢ້ຽມຢາມອັຟການິສຖານໂດຍບໍ່ໄດ້
ປະກາດໃຫ້ຮູ້ລ່ວງໜ້າ ເພື່ອພົບປະກັບພວກຜູ້ບັນຊາການ
ທະຫານສະຫະລັດແລະປະທານາທິບໍດີ Hamid Karzai ແຫ່ງອັຟກາສຖານນັ້ນ.
ທ່ານ Gates ເດີນທາງໄປຮອດອັຟການິສຖານໃນວັນອັງຄານມື້ນີ້ ໃນຂະນະທີ່ທໍານຽບຂາວກະກຽມຈະເປີດເຜີຍລາຍງານຄວາມຄືບໜ້າກ່ຽວກັບສົງຄາມໃນອັຟການິສຖານໃຫ້ປະຊາຊົນຮູ້ ຊຶ່ງຄາດວ່າຈະມີຂຶ້ນໃນເວລາອີກບໍ່ເທົ່າໃດມື້.
ການຢ້ຽມຢາມຄັ້ງນີ້ມີຂຶ້ນ ນຶ່ງມື້ຫລັງຈາກຜູ້ບັນຊາການກອງທັບສະຫະລັດແລະກໍາລັງເນໂຕໃນອັຟການິສຖານ ນາຍພົນ David Petraeus ກ່າວວ່າ ທ່ານບໍ່ສາມາດເວົ້າໄດ້ຢ່າງຄັກແນ່ວ່າ ກອງທັບອັຟການິສຖານຈະຕຽມພ້ອມທີ່ຈະຮັບເອົາພາລະກິດດ້ານຄວາມປອດໄພຈາກກໍາລັງກຸ່ມເນໂຕໄດ້ຫລືບໍ່ ພາຍໃນກໍານົດເວລາທີ່ຕັ້ງໄວ້ ຄື ປີ 2014 ນັ້ນ.
ໃນວັນຈັນວານນີ້ ນາຍພົນ Petraeus ໄດ້ກ່າວໃນການໃຫ້ສໍາພາດກັບອົງການ ຂ່າວ ABC ວ່າ ທ່ານມີກໍາລັງໃຈນໍາຄວາມກ້າວໜ້າໃນອັຟການິສຖານ ນັບແຕ່ ສະຫະລັດໄດ້ສົ່ງກໍາລັງໄປເສີມຕື່ມອີກ 30 ພັນຄົນໃນປີແລ້ວນີ້. ແຕ່ທ່ານກ່າວ ຕື່ມວ່າ ບໍ່ມີຜູ້ບັນຊາການຄົນໃດດອກ ທີ່ຈະກ່າວອອກມາໄດ້ວ່າ ຂ້າພະເຈົ້າມີຄວາມໜັ້ນໃຈວ່າ ພວກເຮົາສາມາດເຮັດໃນສິ່ງນິ້ີ້ໄດ້.