ການສະເຫຼີມສະຫຼອງວັນເອກກະລາດປະຈໍາປີໃນທົ່ວສະຫະລັດໄດ້ສິ້ນສຸດລົງເມື່ອວັນພຸດວານນີ້ ດ້ວຍການຈູດບັ້ງໄຟດອກຍາມແລງຕາມປະເພນີຢູ່ໃນຫຼາຍຫົວເມືອງ.
ສ່ວນທີ່ນະຄອນຫຼວງວໍຊິງຕັນດີຊີນັ້ນ ຝຸງຊົນຈໍານວນຫຼວງຫຼາຍ ໄດ້ເຕົ້າໂຮມກັນຢູ່ທີ່ບໍລິເວັນໜ້າຕຶກສະພາສະຫະລັດ ຫຼື US Capitol ເພື່ອຊົມ ລາຍການສະແດງດົນຕີ ປະເພດປຸກຄວາມຮັກຊາດ ໃນຂະນະທີ່ການຈູດບັ້ງໄຟດອກໄດ້ເລິ່ມສ່ອງແສງເຫຼື້ອມງາມຕາຢູ່ເທິງທ້ອງຟ້າດ້ານຫຼັງຂອງອະນຸສາວະລີວໍຊິງຕັນຫຼື Washington Monument ຊຶ່ງໃນຂະນະດຽວກັນ ຊາວນີວຢ໊ອກກໍທໍາການຈູດບັ້ງໄຟດອກຢ່າງສົດສວຍງາມຕາເຊັ່ນກັນເທິງທ່າເຮືອນີວຢ໊ອກທີ່ມີຊື່ສຽງ ຄືທີ່ຕັ້ງຂອງອະນຸສາວະລີອິດສະຫຼະພາບນັ້ນ.
ໃນຕອນເຊົ້າຂອງວັນພຸດວານນີ້ ທ່ານບາຣັກ ໂອບາມາ ປະທານາທິບໍດີ ສະຫະລັດ ໄດ້ຕ້ອນຮັບນາຍທະຫານປະຈໍາການສະຫະລັດ 25 ຄົນ ໃນພິທີສາບານຕົວເປັນສັນຊາດອາເມຣິກັນທີ່ທໍານຽບຂາວ. ໃນເວລາຕໍ່ມາ ປະທານາທິບໍດີກໍໄດ້ສະແດງຄວາມເຄົາລົບຕໍ່ຄອບຄົວຂອງບັນດາທະຫານ ແລະກໍໄດ້ເຊື້ອເຊີນພວກເຂົາເຈົ້າຮ່ວມຊຸມປິ້ງບາບີຄິວກັນ ແລະການສະແດງດົນຕີທີ່ບັນເລງໂດຍວົງດົນມາຣີນສະຫະລັດ. ຊຶ່ງທ່ານໂອບາມາກ່າວໃນຕອນນຶ່ງວ່າ:
“ພວກທ່ານທັງໝົດໄດ້ຕາງໜ້າໃຫ້ສິ່ງທີ່ດີທີ່ສຸດໃນອາເມຣິກາ. ພວກທ່ານໄດ້ຮັບໃຊ້ພາຍໃຕ້ທຸງຊາດອັນພາກພູມໃຈຂອງພວກເຮົາ. ພວກທ່ານແລະຄອບຄົວຂອງພວກທ່ານໄດ້ເສຍສະຫຼະຫຼາຍກວ່າທີ່ພວກເຮົາຈະຮູ້ ຊຶ່ງ ທັງໝົດແມ່ນຢູ່ໃນການປ້ອງກັນສິດທິຕ່າງໆທີ່ປະທານໃຫ້ໂດຍພະເຈົ້າ ທີ່ໄດ້ຈາລຶກໄວ້ໃນເອກກະສານເປັນເທື່ອທໍາອິດເມື່ອ 236 ປີກ່ອນ ນັ້ນກໍຄື ຊີວິດ ອິດສະຫຼະພາບ ແລະ ການຊອກສະແຫວງຄວາມສຸກ”
ທ່ານມິດ ຣອມນີ ຜູ້ທີ່ເບິ່ງຄືວ່າ ຈະເປັນຂູ່ແຂ່ງຈາກພັກຣີພັບບລິກັນຂອງທ່ານໂອບາມາໃນການເລືອກຕັ້ງທົ່ວປະເທດໃນເດືອນພະຈິກຕໍ່ໜ້ານີ້ ໄດ້ໃຊ້ເວລາໃນວັນພັກດັ່ງກ່າວຍ່າງປະກອບສ່ວນນໍາຂະບວນແຫ່ພິທີສະເຫຼີມ ສະຫຼອງວັນເອກກະລາດ ທີ່ລັດ New Hampshire ພາກຕາເວັນອອກ ສຽງເໜືອຂອງສະຫະລັດ ບ່ອນທີ່ທ່ານແລະຄອບຄົວຂອງທ່ານເອົາເວລາພັກຜ່ອນຈາກການໂຄສະນາຫາສຽງນັ້ນ.
ວັນພັກວັນທີ່ 4 ກໍລະກົດປະຈໍາປີນີ້ ເປັນວັນທີ່ສ້າງຄວາມຜິດຫວັງຢ່າງ ນຶ່ງແກ່ຊາວອາເມຣິກັນຫຼາຍຄົນ ນັ້ນກໍຄືຊາວອາເມຣິກັນຫຼາຍກວ່ານຶ່ງລ້ານ ຄົນໃນເຂດຕາເວັນອອກຂອງສະຫະລັດ ບໍ່ມີໄຟຟ້າໃຊ້ ຫຼັງຈາກໄດ້ເກີດ ລົມພາຍຸຂະໜາດແຮງແລະພາຍຸຝົນເມື່ອວັນສຸກອາທິດຜ່ານມານີ້. ນອກນີ້ ຊາວອາເມຣິກັນອີກຫຼາຍລ້ານຄົນ ຕ້ອງສູ້ທົນກັບຄວາມຮ້ອນເອົ້າ ທີ່ຮ້າຍແຮງຈາກອຸນຫະພູມສູງກວ່າ 38 ດີກຣີເຊລຊຽສ ຢູ່ໃນບາງແຫ່ງ.
ຄວາມຮ້ອນ ຄວາມແຫ້ງແລ້ງ ແລະໄຟປ່າ ກໍຍັງເຜົາໄໝ້ຢູ່ໃນເຂດພາກຕາເວັນຕົກຂອງສະຫະລັດ ທີ່ບັງຄັບໃຫ້ພວກເຈົ້າໜ້າທີ່ ຕ້ອງໄດ້ລົບລ້າງການຈູດບັ້ງໄຟດອກ ໃນເມືອງໃຫຍ່ແລະນ້ອຍ ຢູ່ໃນ 20 ລັດ.
ການສະເຫລີມສະຫລອງຢູ່ນະຄອນຫລວງວໍຊິງຕັນ: