ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ມີໝາຍກໍານົດທີ່ຈະ
ພົບປະກັບປະທານາທິບໍດີມຽນມາ ທ່ານ Thein Sein ໃນທ້າຍສັບປະດານີ້ ບໍ່ດົນຫຼັງຈາກ
ມີການປະກາດວ່າ ສະຫະລັດໄດ້ຍົກເລີກການລົງໂທດທາງເສດຖະກິດຢ່າງເປັນທາງ
ການຕໍ່ມຽນມາ ທີ່ຕັ້ງຢູ່ໃນເຂດເອເຊຍຕາເວັນອອກສຽງໃຕ້ນັ້ນ.
ເຈົ້າໜ້າທີ່ອະວຸໂສທ່ານນຶ່ງຂອງກະຊວງການຕ່າງປະເທດສະຫະລັດໄດ້ກ່າວກັບ VOA ວ່າ ການເຈລະຈາຫາລືກັນນີ້ຈະມີຂຶ້ນໃນວັນສຸກມື້ອື່ນ ຢູ່ນອກກອງປະຊຸມຂອງສະມາຄົມອາຊ່ຽນ ໃນກໍາປູເຈຍ. ທ່ານນາງ Clinton ເຄີຍໄດ້ພົບປະກັບປະທານາທິບໍດີມຽນມາຄັ້ງນຶ່ງມາແລ້ວ ໃນເດືອນທັນວາປີກາຍນີ້ ຕອນທີ່ທ່ານນາງໄດ້ໄປຢ້ຽມຢາມມຽນມາຄັ້ງປະວັດສາດນັ້ນ.
ສະຫະລັດໄດ້ຍຸຕິການລົງໂທດ ໃນວັນພຸດວານນີ້ ໂດຍອະນຸຍາດໃຫ້ບໍລິສັດອາເມຣິກັນເຂົ້າໄປລົງທຶນໃນມຽນມາໄດ້ເປັນຄັ້ງທໍາອິດ ໃນຮອບ 15 ປີ.
ທໍານຽບຂາວຖະແຫຼງວ່າ ການເຄື່ອນໄຫວທີ່ວ່ານີ້ ທີ່ໄດ້ມີການປະກາດໃຫ້ຊາບເປັນເທື່ອທຳ ອິດໃນເດືອນພຶດສະພາຜ່ານມາ ແມ່ນເປັນການຕອບຮັບຕໍ່ການປະຕິຮູບທາງດ້ານເສດຖະກິດແລະການເມືອງ ໂດຍລັດຖະບານພົນລະເຮືອນແຕ່ພຽງໃນນາມ ຂອງມຽນມາ.
