ປະທານ ມະຫາວິທະຍາໄລ Missouri ແລະອະທິການບໍດີຂອງ ມະຫາວິທະຍາໄລ ແຕ່ລະຄົນຕ່າງກໍໄດ້ປະກາດ ໃນວັນຈັນວານນີ້ວ່າ ເຂົາເຈົ້າລາອອກຈາກຕຳແໜ່ງ ຕາມຄຳຮຽກຮ້ອງທີ່ສຳຄັນຂອງບັນດານັກສຶກສາປະທ້ວງ ຜູ້ທີ່ີກ່າວວ່າ ການນຳພາບໍ່ເປັນທີ່ພຽງພໍຕໍ່ເຫດການປະພຶດຊໍ້າແລ່້ວຊໍ້າອີກດ້ານຜີວພັນ ແລະການລຳອຽງຕ່າງໆຢູ່ໃນມະຫາວິທະຍາໄລ.
ທ່ານ Tim Wolf ປະທານປົກຄອງມະຫາວິທະຍາໄລ ໄດ້ປະກາດດ້ວຍຄວາມເສົ້າໃຈ ຢູ່ກອງປະຊຸມບໍລິຫານມະຫາວິທະຍາໄລຢູ່ ມະຫາວິທະຍາໄລ ບ່ອນທີ່ມີບັນດານັກສຶກສາ 35,000 ຄົນ ຢູ່ລັດ Missouri ທາງພາກກາງຂອງປະເທດ.
ທ່ານ Wolf ກ່າວວ່າ “ຂ້າພະເຈົ້າ ຮັບເອົາຄວາມຮັບຜິດຊອບທັງໝົດ ຕໍ່ຄວາມເປັນຫ່ວງ ແລະ ຂ້າພະເຈົ້າຮັບເອົາຄວາມຮັບຜິດຊອບ ຕໍ່ພາກປະຕິບັດທີ່ໄດ້ເກີດຂື້ນ”. ທ່ານໄດ້ຮຽກ ຮ້ອງໃຫ້ບັນດານັກສຶກສາໃຊ້ ການລາອອກຈາກຕຳແໜ່ງຊອງທ່ານ “ເພື່ອເປັນການປົວແປງ ແລະເລີ້ມສົນທະນາກັນໃໝ່ອີກ.”
ບັນຫາ ດັ່ງກ່າວໄດ້ເປັນທີ່ດືງດູດຄວາມສົນໃຈຢູ່ທົ່ວປະເທດ ຫລັງຈາກຄະນະກຳມະການນັກສຶກສາ ເຂົ້າຮ່ວມບັນດາຄູອາຈານຈຳນວນໜຶ່ງ ແລະທິມນັກຫລີ້ນກິລາຟຸດບານຂອງໂຮງຮຽນ ໃນການຮຽກຮ້ອງໃຫ້ ທ່ານ Wolf ລາອອກຈາກຕຳແໜ່່ງ. ບັນດາຄູອາຈານ ແລະນັກສຶກສາຈຳນວນໜຶ່ງໄດ້ຂົ່ມຂູ່ທີ່ຈະພາກັນຢ່າງອອກ ຈາກມະຫາວິທະຍາໄລ ກ່ຽວກັບເລື້ອງນີ້.
ອະທິການບໍດີມະຫາວິທະຍາ ໄລ ທ່ານ Brown Lofton ກ່າວວ່າ ທ່ານຈະຍ້າຍໄປມີບົດບາດໃໝ່ ທີ່ມະຫາວິທະຍາໄລ Columbia ທີ່ພົວພັນກັບການຄົ້ນຄວ້າ.
ສ່ວນທ້າວ Greg Carr ປະທານສະພານັກສຶກສາຂະແໜງ ອາຟຣິກັນ-ອາເມຣິກັນ ທີ່ມະຫາ ວິທະຍາໄລ Howard ທີ່ນະຄອນຫລວງ ວໍຊໍງຕັນ ດີ.ຊີ ກ່າວວ່າ ບັນດານັກສຶກສາ ໄດ້ພາກັນຢູ່ແຖວໜ້າໃນການເຄື່ອນໄຫວເພື່ອສິດທິພົນລະເມືອງ ນັບແຕ່ກາງສັດຕະວັດທີ່ 20 ເປັນຕົ້ນມາ.
